![វិស័យសណ្ឌាគារ](https://cdn.cambonomist.com/media/images/tkrvny21444.2e16d0ba.fill-960x540.jpg)
លោក ហូ វណ្ឌី ទីប្រឹក្សាសមាគមទេសចរណ៍កម្ពុជា បានអះអាងថា ការផ្គត់ផ្គង់សេវាបន្ទប់ស្នាក់នៅតាមផ្ទះសំណាក់ និងសណ្ឋាគារនៅកម្ពុជា នាពេលបច្ចុប្បន្ន គឺមានចំនួនច្រើនហួសកម្រិត ខណៈសណ្ឋាគារធំៗមានភ្ញៀវចូលស្នាក់នៅតែប្រមាណ២០%ប៉ុណ្ណោះ ដែលកត្តានេះ វាជាផលលំបាកមួយសម្រាប់អ្នកវិនិយោគក្នុងវិស័យបដិសណ្ឋារកិច្ច។ តែយ៉ាងណាអ្នកវិនិយោគក្នុងវិស័យនេះនៅតែដាក់ក្តីរំពឹងខ្ពស់លើយុទ្ធសាស្រ្តទាក់ទាញអ្នកទេសចររបស់រាជរដ្ឋាភិបាល ដែលបានដាក់ចេញកន្លងមកក្នុងការជួយស្រោងចស្រង់វិស័យនេះ។
ពាក់ព័ន្ធវិស័យបដិសណ្ឋារកិច្ចនេះដែរ លោក គឹម សេរីរដ្ឋ ប្រធាននាយកដ្ឋានគ្រប់គ្រងសេវាកម្មស្នាក់នៅ និងម្ហូបអាហារនៃក្រសួងទេសចរណ៍បានឱ្យដឹងថា មកទល់ពេលនេះមានសណ្ឋាគារខ្នាតធំមួយចំនួនក្នុងខេត្តសៀមរាប ដែលបានបិទទ្វារដោយសារការឆ្លងរាតត្បាតនៃជំងឺកូវីដ-១៩ មិនទាន់បានបើកដំណើរការអាជីវកម្មរបស់ខ្លួនពេញលេញនៅឡើយទេ បើទោះបីវិស័យទេសចរណ៍របស់កម្ពុជា ហាក់មានស្ថានភាពល្អប្រសើរឡើងវិញក៏ដោយ។ បើតាមការអះអាងរបស់មន្រ្តីរូបនេះ សណ្ឋាគារដែលបន្តបិទទ្វារទាំងនោះ មានមួយចំនួនកំពុងស្ថិតក្នុងការជួសជុលកែលម្អ និងមួយចំនួនទៀតនៅបន្តបិទទ្វារ រង់ចាំឱកាសភ្ញៀវទេសចរបរទេសមកលេងកម្សាន្តនៅកម្ពុជា ដូចមុនពេលមិនទាន់ផ្ទុះវិបត្តិជំងឺកូវីដ-១៩។
បើយោងតាមទិន្នន័យរបស់ក្រសួងទេសចរណ៍ នៅទូទាំងប្រទេសកម្ពុជា មានសណ្ឋាគារ និងផ្ទះសំណាក់សរុបជិត៣ពាន់កន្លែង ក្នុងនោះសណ្ឋាគារមានជាង៨រយកន្លែង និងផ្ទះសំណាក់ជាង២ពាន់កន្លែង។ នៅក្នុងអំឡុងផ្ទុះការឆ្លងរាតត្បាតនៃជំងឺកូវីដ-១៩ កន្លងទៅមានសណ្ឋាគារ និងផ្ទះសំណាក់ជាច្រើនត្រូវបានផ្អាក ឬបិទអាជីវកម្ម ខណៈបច្ចុប្បន្នសេវាសណ្ឋាគារ និងផ្ទះសំណាក់ភាគច្រើនត្រូវបានបើកអាជីវកម្មឡើងវិញ៕
អត្ថបទ៖ បូ ដូឡា, ឯកសារ