បណ្ដាវិនិយោគិនកំពុងត្រៀមខ្លួនសម្រាប់ឆ្នាំ២០២៥ ខណៈប្រាក់យន់របស់ចិន ធ្លាក់ថ្លៃខ្លាំងបំផុតមិនធ្លាប់មាន

ការផ្លាស់ប្តូរគោលនយោបាយថ្មីៗនេះ និងការបង្កើនការបោះផ្សាយសញ្ញាបណ្ណ ឬ មូលបត្របំណុលនៅក្រៅប្រទេសបានឆ្លុះបញ្ចាំងឱ្យឃើញពីការប្ដេជ្ញាចិត្តរបស់ធនាគារកណ្តាលចិន ក្នុងការជួយគាំទ្រដល់ប្រាក់យន់ ពោលគឺទប់កុំឱ្យប្រាក់យន់ធ្លាក់ថ្លៃខ្លាំង។ ក្រុមអ្នកជំនាញលើកឡើងថា ប្រទេសចិន ដែលជាមហាអំណាចសេដ្ឋកិច្ចធំបំផុតទី២លើពិភពលោកគួរតែត្រៀមខ្លួនឱ្យបានល្អក្នុងការការពារតម្លៃប្រាក់យន់ ព្រោះកន្លងមកធ្លាប់ឆ្លងកាត់បទពិសោធន៍ជាមួយលោក ដូណាល់ ត្រាំ រួចមកហើយ នៅពេលលោកកាន់តំណែងជាប្រធានាធិបតីអាណត្តិទី១។

ទោះជាយ៉ាងណា ដោយសារស្ថានភាពសេដ្ឋកិច្ចបច្ចុប្បន្នស្ថិតក្នុងបរិបទថ្មី ហើយអតិរេកពាណិជ្ជកម្មក៏រីកកាន់តែធំទូទាំងពិភពលោក ដូច្នេះ​រដ្ឋាភិបាលចិន ចាំបាច់ត្រូវតែដាក់ចេញវិធានការដោយប្រុងប្រយ័ត្ន ដើម្បីរក្សាតុល្យភាព។ ហើយទន្ទឹមនឹងនេះ បណ្ដាពាណិជ្ជករកំពុងទទួលបានផលចំណេញពីការធ្លាក់ចុះនៃប្រាក់យន់ រួចទៅហើយ។

ទិន្នន័យផ្លូវការបង្ហាញថា ប្រាក់យន់ នៅក្នុងប្រទេសចិន បានធ្លាក់ថ្លៃខ្លាំងរហូតដល់ជាង៧,៣៣យន់ ក្នុង១ដុល្លារអាម៉េរិក កាលពីថ្ងៃទី១០ ខែមករា ដែលជាតម្លៃទាបបំផុតមិនធ្លាប់មានចាប់តាំងពីខែកញ្ញា ឆ្នាំ២០២៣ ហើយនៅក្នុងឆ្នាំ២០២៤ ប្រាក់យន់បានធ្លាក់ថ្លៃ២,៩% ដែលជាការធ្លាក់ថ្លៃរយៈពេល៣ឆ្នាំជាប់​ៗគ្នា។

គួររំឭកថា ធនាគារកណ្ដាលចិន បានចេញសេចក្ដីថ្លែងការណ៍កាលពីពេលថ្មីៗនេះថា ខ្លួននឹងគ្រប់គ្រងតម្លៃប្រាក់យន់ឱ្យបានល្អ ហើយបានសន្យាថា នឹងពង្រឹងទីផ្សារប្ដូរប្រាក់អន្តរជាតិ និងគ្រប់គ្រងវាឱ្យកាន់តែតឹងរ៉ឹង៕

ដោយ: តែម សុខុម