តើការរក្សាបានស្ថិរភាពតម្លៃប្រាក់រៀលមានសារៈសំខាន់យ៉ាងណាសម្រាប់សេដ្ឋកិច្ច និងការធ្វើពាណិជ្ជកម្ម?
នៅក្នុងរយៈពេលជាច្រើនឆ្នាំមកនេះ ប្រាក់រៀលបានរួមចំណែកយ៉ាងសំខាន់ក្នុងការជួយស្តារ និងកសាងអធិបតេយ្យភាព សេដ្ឋកិច្ច និងសង្គមជាតិ តាមរយៈការដើរ…
នាពិធីប្រគល់ស្ថានីយបូមទឹកដើរដោយថាមពលពន្លឺព្រះអាទិត្យជូនសហគមន៍នៅឃុំវត្តតាមិម ស្រុកសង្កែរ ខេត្តបាត់ដំបងកាលពីពេលថ្មីៗ លោក Noel Grealish TD រដ្ឋមន្ត្រីក្រសួងកសិកម្ម ស្បៀងអារហារ និងដែនសមុទ្រ នៃប្រទេសអៀរឡង់ បានចាត់ទុកកសិករខ្នាតតូចនៅកម្ពុជាជាឆ្អឹងខ្នងនៃវិស័យកសិកម្ម និងជាចំណុចស្នូលសម្រាប់អនាគតនៃវិស័យកសិកម្ម។ រដ្ឋមន្ត្រីរូបនេះរំពឹងថា តាមរយៈគម្រោងមូលនិធិប្រមាណ៨៧ម៉ឺនដុល្លារ ដែលរដ្ឋាភិបាលអៀរឡង់ផ្តល់ឱ្យកម្ពុជា វានឹងក្លាយជាផ្នែកមួយនៃការចូលរួមកាន់តែខ្លាំងរបស់អៀរឡង់នៅកម្ពុជា និងជាការស្វែងរកឱកាសថ្មីៗ ដើម្បីធ្វើការរួមគ្នាក្នុងការអភិវឌ្ឍតំបន់ជនបទប្រកបដោយចីរភាព និងការដោះស្រាយការប្រែប្រួលអាកាសធាតុ។
លោកស្រី ភាណ សោភ័ណ នាយិកាអង្គការអុកស្វាមបានគូសបញ្ជាក់ថា តាមរយៈស្ថានីយបូមទឹកដើរដោយថាមពលពន្លឺព្រះអាទិត្យ ដែលជាជំនួយរបស់រដ្ឋាភិបាលអៀរឡង់ខាងលើ នឹងរួមចំណែកជួយដោះស្រាយការប្រែប្រួលអាកាសធាតុនៅក្នុងខេត្តបាត់ដំបង ដែលបានបង្ហាញពីធ្វើការរួមគ្នាលើសកម្មភាពអាកាសធាតុ និងការផ្តល់នូវការអភិវឌ្ឍប្រកបដោយចីរភាពនៅកម្ពុជា។
ជាមួយគ្នានេះលោក អ៊ិម ស្វាង ប្រធានសហគមន៍ប្រើប្រាស់ទឹកឃុំវត្តតាមិមរំពឹងថា តាមរយៈគម្រោងស្ថានីយបូមទឹកដើរដោយថាមពលពន្លឺព្រះអាទិត្យនេះ វានឹងជួយធានាថាកសិករមានលទ្ធភាពទទួលបានទឹកគ្រប់គ្រាន់ប្រកបដោយនិរន្តរភាព និងតម្លៃសមរម្យពេញមួយឆ្នាំ ពោលគឺសហគមន៍អាចពង្រីកការដាំដុះ បង្កើនទិន្នផលដំណាំ និងបង្កើនប្រាក់ចំណូលរបស់ពួកគេ។
លោកស្រី ខៀវ ធីតា នាយិកាប្រតិបត្តិក្រុមហ៊ុនសូជីបានគូសបញ្ជាក់ថា ការបង្កើតឱ្យមានប្រព័ន្ធសូឡាបូមទឹកនេះ គឺដើម្បីឆ្លើយតបនឹងតម្រូវការទឹកក្នុងវិស័យកសិកម្ម សំដៅធានាបានថានឹងមានទឹកគ្រប់គ្រាន់ពេញមួយឆ្នាំសម្រាប់ការប្រើប្រាស់ និងធ្វើស្រែចម្ការរបស់ប្រជាកសិករ។ លើសពីនេះ ការបង្កើតស្ថានីយបូមទឹកដើរដោយថាមពលពន្លឺព្រះអាទិត្យរបស់ក្រុមហ៊ុនសូជីនេះ ក៏ដើម្បីរួមចំណែកទប់ទល់ជាមួយនឹងបញ្ហាប្រែប្រួលអាកាសធាតុ និងការការពារបរិស្ថានផងដែរ។
គួរជម្រាបថា ក្រៅពីការដំឡើងស្ថានីយបូមទឹកដើរដោយថាមពលពន្លឺព្រះអាទិត្យ គម្រោងមូលនិធិរបស់រដ្ឋាភិបាលប្រទេសអៀរឡង់នេះ ក៏បានផ្តល់ការបណ្តុះបណ្តាលដល់កសិករ ស្តីពីការគ្រប់គ្រង និងការប្រើប្រាស់ទឹកប្រកបដោយនិរន្តរភាពផងដែរ។ តាមរយៈគម្រោងនេះ គ្រួសារជាង២២០ នឹងទទួលបានអត្ថប្រយោជន៍តាមរយៈស្ថានីយបូមទឹកដើរដោយថាមពលពន្លឺព្រះអាទិត្យនេះ ដែលស្រោចស្រពលើផ្ទៃដីប្រមាណ២៣៤ហិកតា៕
អត្ថបទ សោម ស្រីពេជ្រ និងរូបភាពឯកសារ
