ឯកឧត្តម ហេង សុខគង់ រដ្ឋលេខាធិការ និងជាអ្នកនាំពាក្យក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ យល់ឃើញថា ការដំឡើងពន្ធលើទំនិញនាំចូលពីកម្ពុជា រហូតដល់៤៩% ពីសហរដ្ឋអាម៉េរិក ចង់ ឬមិនចង់វានឹងប៉ះពាល់ដល់ការធ្វើពាណិជ្ជកម្មមួយចំនួនរបស់កម្ពុជា និងប្រជាពលរដ្ឋអាម៉េរិក ដែលជាអ្នកប្រើប្រាស់ផលិតផលពីកម្ពុជា។ តែយ៉ាងណា ឯកឧត្តម មិនទាន់អាចវាយតម្លៃពីទំហំនៃផលប៉ះពាល់បាននៅឡើយទេ ហើយបញ្ហាពន្ធនេះអាចនឹងមានការប្រែប្រួល ដ្បិតថា កម្ពុជាក៏មានលទ្ធភាពក្នុងការចរចាជាមួយសហរដ្ឋអាម៉េរិក លើបញ្ហានេះផងដែរ។
បើតាមឯកឧត្តម ហេង សុខគង់ លទ្ធភាពដែលកម្ពុជា អាចចរចាដោះស្រាយបញ្ហានេះជាសហរដ្ឋអាម៉េរិក មានទាំងក្នុងក្រមបខណ្ឌពហុភាគី និងទ្វេភាគី ក្នុងនោះក្រមបខណ្ឌពហុភាគីតាមរយៈយន្តការរបស់អង្គការពាណិជ្ជកម្មពិភពលោក និងយន្តការអាស៊ាន-អាម៉េរិក ជាដើម ដែលបច្ចុប្បន្នកម្ពុជា នៅជាប្រធានសម្របសម្រួលកិច្ចពិភាក្សារវាងអាស៊ាន និងអាម៉េរិក នៅឡើយ។ ទន្ទឹមនេះ កម្ពុជា ក៏អាចចរចាដោយផ្ទាល់ជាមួយសហរដ្ឋអាម៉េរិក ឱ្យមានការយោគយល់មកលើកម្ពុជា ដែលជាប្រទេសតូច និងជាប្រទេសកំពុងអភិវឌ្ឍន៍តិចតួចនៅឡើយ ដែលពិបាកនឹងធ្វើឱ្យមានតុល្យភាពពាណិជ្ជកម្មជាមួយអាម៉េរិក ដែលជាប្រទេសធំ។ ម្យ៉ាងទៀត តាមរយៈការប្រើប្រាស់ប្រាក់ដុល្លារអាម៉េរិកច្រើននៅក្នុងចរន្តសេដ្ឋកិច្ចកម្ពុជា ក៏ជាកត្តាសំខាន់មួយដែលមានប្រៀបក្នុងការចរចាជាមួយអាម៉េរិកផងដែរ។
ជាមួយគ្នានេះលោក អាត់ ធន់ អនុប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា បានគូសបញ្ជាក់ថា រាជរដ្ឋាភិបាលកម្ពុជា ត្រូវតែគិតគូរលើការចរចាជាមួយសហរដ្ឋអាម៉េរិក ដើម្បីអាចមានលទ្ធភាពក្នុងការទម្លាក់អត្រាពន្ធមកវិញក្នុងកម្រិតណាមួយ ដ្បិតថា ការយកពន្ធនាំចូលពីកម្ពុជា ចំនួន៤៩%នេះ គឺជាបញ្ហាប្រឈមសម្រាប់កម្ពុជាក្នុងការនាំចេញទំនិញទៅកាន់សហរដ្ឋអាម៉េរិក។
ទន្ទឹមនឹងនេះ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្មកម្ពុជា បានអះអាងថា ការកំណត់ពន្ធគយលើកម្ពុជាចំនួន៤៩% ពីសហរដ្ឋអាម៉េរិក ហើយមានការលើកឡើងថា ដោយសារកម្ពុជា យកពន្ធពីអាម៉េរិក ចំនួន៩៧% វាជារឿងមិនពិតនោះទេ ពោលគឺកម្ពុជា យកពន្ធលើទំនិញអាម៉េរិក ត្រឹមតែ២៩,៤% ប៉ុណ្ណោះ។ បើតាមការពន្យល់រដ្ឋមន្ត្រីរូបនេះ ពន្ធ៩៧% ដែលអាចអាម៉េរិកយកមកប្រើធ្វើជាមូលដ្ឋានគិតពន្ធលើកម្ពុជានេះ គឺដោយសារអាម៉េរិក ផ្អែកទៅលើអតិរេកពាណិជ្ជកម្មដែលមានជាមួយកម្ពុជា នៅក្នុងឆ្នាំ២០២៤ កន្លងទៅ។ លោកជំទាវបានបន្ថែមថា កម្ពុជា បានប្រកាន់ភ្ជាប់ការអនុវត្តតាមច្បាប់របស់អង្គការពាណិជ្ជកម្មពិភពលោក ក្នុងនោះកម្ពុជា បានកំណត់ការយកពន្ធលើផលិតផលនាំចូលមិនថាសហរដ្ឋអាម៉េរិក ឬដៃគូពាណិជ្ជកម្មផ្សេងៗនោះទេ ក្នុងចន្លោះពី០% រហូតដល់ខ្ពស់បំផុត៣៥%។ រដ្ឋមន្ត្រីក្រសួងពាណិជ្ជកម្មរូបនេះ បានសង្កតធ្ងន់ថា ក្រោយការប្រកាសដាក់ពន្ធរបស់លោក ត្រាំ រាជរដ្ឋាភិបាលកម្ពុជាបានចាត់ក្រុមការងារតាមដានជាប់ជាប្រចាំជាមួយស្ថាប័នពាក់ព័ន្ធ ដើម្បីដាក់ចេញវិធានការមួយចំនួនឱ្យទាន់ពេលវេលា និងសមស្របក្នុងការឆ្លើយតប សំដៅជំរុញការធ្វើពាណិញជ្ជកម្មរបស់កម្ពុជាឱ្យកាន់តែប្រសើរបន្ថែមទៀត។
គួរជម្រាបថា នៅក្នុងឆ្នាំ២០២៤ កន្លងទៅការធ្វើពាណិជ្ជកម្មរបស់កម្ពុជាជាមួយសហរដ្ឋអាម៉េរិក សម្រេចបានទំហំជាង១០ពាន់លានដុល្លារកើនឡើងប្រមាណ១១% បើធៀបនឹងឆ្នាំ២០២៣ ក្នុងនោះកម្ពុជានាំចេញទៅសហរដ្ឋអាម៉េរិកមានទំហំជាង៩ពាន់៩រយលានដុល្លារ ខណៈអាម៉េរិកនាំចូលមកកម្ពុជាមានទំហំជាង២៦០លានដុល្លារ។ នេះបើយោងទិន្នន័យពីអគ្គនាយកដ្ឋានគយ និងរដ្ឋាករកម្ពុជា៕
អត្ថបទ សោម ស្រីពេជ្រ និងរូបភាពឯកសារ
