គេបានសន្និដ្ឋានថា ដោយសារហេតុផលនេះហើយ ទើបធ្វើឱ្យលោក ត្រាំ សម្រេចកាត់បន្ថយការធ្វើសមយុទ្ធជាមួយកូរ៉េខាងត្បូង ដែលធ្វើឱ្យបណ្តាប្រទេសសម្ពន្ធមិត្តនៅក្នុងតំបន់អាស៊ីមានការព្រួយបារម្ភយ៉ាងខ្លាំង។ នេះបើយោងតាមការចុះផ្សាយរបស់សារព័ត៌មាន CNBC។
មន្ត្រីយោធាកូរ៉េខាងត្បូង បានអះអាងនៅថ្ងៃទី១៩ ខែសីហា ថា ខ្លួននឹងកាត់បន្ថយការធ្វើសមយុទ្ធយោធារួមគ្នាប្រចាំឆ្នាំជាមួយសហរដ្ឋអាម៉េរិក ប្រហែលពាក់កណ្តាល តាមការស្នើសុំរបស់ទីក្រុងវ៉ាស៊ីនតោន ស្របពេលដែលលោកប្រធានាធិបតី ដូណាល់ ត្រាំ ត្រូវបានគេរាយការណ៍ថា កំពុងស្វែងរកជំនួបកំពូលជាមួយលោក គីម ជុងអ៊ុន មេដឹកនាំកូរ៉េខាងជើងសាជាថ្មី។ ពាក់ព័ន្ធនឹងព័ត៌មាននេះដែរសារព័ត៌មាន Wall Street Journal បានរាយការណ៍ថា លោក ត្រាំ កំពុងជំរុញឱ្យក្រុមជំនួយការរៀបចំកិច្ចប្រជុំជាមួយលោក គីម ជុងអ៊ុន ឱ្យបានឆាប់តាមដែលអាចធ្វើទៅបាន។
នៅក្នុងអំឡុងពេលកាន់កាប់សេតវិមានកាលពីអាណត្តិមុន លោក ត្រាំ និងមេដឹកនាំកំពូលកូរ៉េខាងជើង ធ្លាប់បានជួបគ្នាទល់មុខចំនួន៣លើក ដោយលើកដំបូងជួបគ្នានៅប្រទេសសិង្ហបុរី នាខែមិថុនា ឆ្នាំ២០១៨ ក្រោយមកនៅខែកុម្ភៈ ឆ្នាំ២០១៩ នៅទីក្រុងហាណូយ ប្រទេសវៀតណាម និងជំនួបត្រឹមចាប់ដៃគ្នានៅខែមិថុនា ឆ្នាំ២០១៩ នៅតំបន់គ្មានយោធារវាងកូរ៉េខាងជើង និងកូរ៉េខាងត្បូង៕
ដោយៈ សរ សុជាតិ
