នេះបើតាមការចុះផ្សាយរបស់សារព័ត៌មាន Nikkei។ ប្រទេសជប៉ុន នឹងដាក់សំណើលើការចែករំលែកខ្សែចង្វាក់ផ្គត់ផ្គង់ជាមួយប្រទេសអាស៊ាន ដើម្បីរឹតចំណងសេដ្ឋកិច្ចជាមួយតំបន់នេះដែលជាតំបន់ដើរតួនាទីសំខាន់ក្នុងឧស្សាហកម្មយានយន្ត និងឈីប។
ក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន បានចូលរួមក្នុងកិច្ចពិភាក្សានេះហើយ ខណៈដែលជប៉ុន និងអាស៊ាន ប្រារព្ធខួបលើកទី៥០ នៃកិច្ចសហប្រតិបត្តិការជាមួយគ្នា។
គោលដៅចម្បងមួយក្នុងកិច្ចសហប្រតិបត្តិការនេះ គឺត្រូវដាក់ប្រព័ន្ធក្នុងទីកន្លែងមួយដែលព័ត៌មានអំពីគ្រឿងបង្គុំ សមត្ថភាពផលិត និងហានិភ័យនៃការអាក់ខានខ្សែចង្វាក់ផ្គត់ផ្គង់ អាចនឹងត្រូវបានចែករំលែកក្នុងចំណោមក្រុមហ៊ុនអាស៊ាន និងជប៉ុន ដែលប្រតិបត្តិការក្នុងឧស្សាហកម្មយានយន្ត អេឡិចត្រូនិច និងឧស្សាហកម្មដទៃទៀត។
យ៉ាងណាមិញ ក្រៅពីរឿងខាងលើនេះ បណ្តាក្រុមហ៊ុនផ្សេងៗក៏អាចចូលរួមក្នុងការផ្លាស់ប្តូរព័ត៌មានដើម្បីការពារបរិស្ថានលុបបំបាត់ការបញ្ចេញផ្សែងកាបូនឌីអុកស៊ីត និងការពារសិទ្ធិមនុស្សផងដែរ។
អត្ថបទគួរអាន
គួរបញ្ជាក់ថា ក្រុមមួយដែលមានការចូលរួមពីក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន និងសមាគមសាជីវកម្មជប៉ុន នឹងកំណត់គំរូចំនួន ១០០ នៃការចែករំលែកទិន្នន័យ និងធ្វើសំណើច្បាប់សម្រាប់ការគ្រប់គ្រងទិន្នន័យ។ ចំណែកការសម្រេចផ្លូវការអ្វីមួយនោះ នឹងត្រូវប្រកាសក្នុងកិច្ចប្រជុំរដ្ឋមន្រ្តីសេដ្ឋកិច្ចជប៉ុន-អាស៊ាន នៅខែសីហាខាងមុខ។
បើតាមការចុះផ្សាយរបស់សារព័ត៌មាន Nikkei ថ្មីៗនេះបានឱ្យដឹងថា ឈីបក្នុងឧស្សាហកម្មយានយន្ត ត្រូវបានប៉ាន់ស្មានថា នឹងនៅតែខ្វះខាតក្នុងការផ្គត់ផ្គង់នៅពេញមួយឆ្នាំ២០២៣នេះទៀត។ ជាមួយគ្នានេះ តម្រូវការឈីបសម្រាប់ផលិតរថយន្តអគ្គិសនី គឺខ្ពស់ជាងតម្រូវការឈីបសម្រាប់ផលិតរថយន្តប្រើប្រាស់សាំងទៅទៀត ខណៈទំនោរប្រើរថយន្តអគ្គិសនីកាន់តែកើនឡើងខ្លាំង។
ទន្ទឹមនឹងនេះដែរ ក្រុមហ៊ុនរថយន្តធំៗមួយចំនួន បាននិយាយថា គ្រឿងបន្លាស់សំខាន់ៗនឹងមិនមានគ្រប់គ្រាន់ដូចធម្មតាវិញឡើយរហូតដល់ឆ្នាំ២០២៤។ ប្រសិនបើស្ថានភាពសេដ្ឋកិច្ចសាកលកាន់តែអាក្រក់ នោះវានឹងចំណាយពេលកាន់តែយូរក្នុងការរក្សាតុល្យភាពនៃការផ្គត់ផ្គង់ និងតម្រូវការ ព្រមទាំងបង្កើតហានិភ័យកាន់តែធ្ងន់ធ្ងរចំពោះទីផ្សារឈីបទៀតផង៕
អត្ថបទ៖ នៅ សំភី
