ជប៉ុន អាចប្រឈមនឹងគ្រោះរញ្ជួយដី ដែលអាចបំផ្លាញសេដ្ឋកិច្ចរហូតដល់១,៨ ទ្រីលានដុល្លារ

ជប៉ុន ជាប្រទេសមួយដែលរងគ្រោះច្រើនជាងគេបំផុតពីការរញ្ជួយនៅលើពិភពលោក។ ថ្មីៗនេះរដ្ឋាភិបាល បានមើលឃើញឱកាសប្រហែល៨០% នៃការកើតមានការរញ្ជួយដីកម្រិតដ៏ខ្លាំងបំផុតមួយចន្លោះពី៨ ទៅ៩ រ៉ិចទ័រ នៅតាមតំបន់បាតសមុទ្រ នៅខាងត្បូងតំបន់ណាន់កៃដូ នៃកោះហុងស៊ូ ប្រទេសជប៉ុន។

ប្រសិនបើករណីនេះពិតជាកើតឡើងនៅពេលអនាគតមែន របាយការណ៍របស់ការិយាល័យខុទ្ទកាល័យជប៉ុន បានប៉ាន់ប្រមាណថា វានឹងបំផ្លិចបំផ្លាញសេដ្ឋកិច្ចជប៉ុន ក្នុងតម្លៃប្រហែល១,៨ ទ្រីលានដុល្លារអាម៉េរិក ឬជិតស្មើនឹងពាក់កណ្ដាលនៃផលិតផលក្នុងស្រុកសរុបរបស់ជប៉ុន។ គ្រោះរញ្ជួយដីដែលនឹងកើតឡើងនៅជិតឆ្នេរសមុទ្រប៉ាស៊ីហ្វិករបស់ជប៉ុននេះ នឹងបង្កឱ្យមានរលកយក្សស៊ូណាមិ ដ៏មហន្តរាយ ការបំផ្លិចបំផ្លាញអគាររាប់រយកន្លែង និងលទ្ធភាពសម្លាប់មនុស្សប្រហែល៣០ម៉ឺននាក់ ប្រសិនបើវាកើតឡើងនៅពេលយប់ក្នុងរដូវត្រជាក់ ហើយវាក៏ទំនងជានឹងធ្វើឱ្យប្រជាជនជប៉ុន ជាង១លាននាក់ រត់ភៀសខ្លួនទៅរកកន្លែងសុវត្ថិភាពផងដែរ។

សូមរំលឹកថា តំបន់ណាន់កៃទ្រូនេះ ស្ថិតនៅលើឆ្នេរសមុទ្រប៉ាស៊ីហ្វិក ភាគនិរតីនៃប្រទេសជប៉ុន លាតសន្ធឹងរហូតដល់៩០០គីឡូម៉ែត្រ។ កាលពីឆ្នាំមុន ប្រទេសជប៉ុន បានចេញសេចក្តីណែនាំអំពីការរញ្ជួយដីកម្រិតខ្លាំងបំផុតលើកដំបូងរបស់ខ្លួនថា មានឱកាសកាន់តែខ្ពស់នៃការរញ្ជួយដីដែលមានកម្លាំងខ្លាំងកម្រិត៩ រ៉ិកទ័រ នៅក្នុងតំបន់ណាន់កៃត្រូនេះ បន្ទាប់ពីគ្រោះរញ្ជួយដីកម្រិតជាង៧ រ៉ិចទ័រ បានកើតឡើងនៅជាយតំបន់នេះ។

សូមរំលឹកថា មនុស្សជាង១៥,០០០នាក់ បានស្លាប់ក្នុងគ្រោះរញ្ជួយដីកម្រិត៩ រ៉ិកទ័រ នៅក្នុងឆ្នាំ២០១១ ដែលបង្កឱ្យមានរលកយក្សស៊ូណាមិ និងបំផ្លាញរោងចក្រថាមពលនុយក្លេអ៊ែ​ នៅភាគឦសាននៃប្រទេសជប៉ុន៕

អត្ថបទ៖ សុខ មង្គល