ទីបំផុតប្រទេសជប៉ុន រើសបាននាយករដ្ឋមន្ត្រីថ្មីហើយ ដែលជាអតីតរដ្ឋមន្ត្រីការពារជាតិ

លោក ស៊ីហ្គើរូ អ៊ីស៊ីបា (Shigeru Ishiba) ដែលជាអ្នកនយោបាយជើងចាស់សម្ដីត្រង់ និងជាអតីតរដ្ឋមន្ត្រីការពារជាតិត្រូវបានបោះឆ្នោតជ្រើសរើសជាប្រធានគណបក្សប្រជាធិបតេយ្យសេរីនិយម (LDP) ដែលកំពុងកាន់អំណាចរបស់ប្រទេសជប៉ុន នៅថ្ងៃសុក្រ ទី២៧ ខែកញ្ញា នេះ ហើយតាមរយៈតំណែងនេះនឹងធ្វើឱ្យលោកក្លាយជានាយករដ្ឋមន្ត្រីថ្មីរបស់ជប៉ុនផងដែរ។

លោក ស៊ីហ្គើរូ អ៊ីស៊ីបា (Shigeru Ishiba) បានយកឈ្នះរដ្ឋមន្ត្រីសន្តិសុខសេដ្ឋកិច្ចជប៉ុន គឺលោកស្រី សាណេ តាកាអ៊ីជិ (Sanae Takaichi) នៅក្នុងការប្រកួតប្រជែងជុំទី២ បន្ទាប់ពីក្នុងចំណោមបេក្ខភាពឈរឈ្មោះទាំង៩រូបគ្មានបេក្ខភាពរូបណាទទួលបានសំឡេងគាំទ្រភាគច្រើននៅក្នុងការប្រកួតជុំទី១។ ជ័យជម្នះរបស់លោកបានរារាំងលោកស្រី សាណេ តាកាអ៊ីជិ (Sanae Takaichi) ពីការក្លាយជានាយករដ្ឋមន្ត្រីស្ត្រីដំបូងគេរបស់ប្រទេសជប៉ុន។

លោក ស៊ីហ្គើរូ អ៊ីស៊ីបា (Shigeru Ishiba) ដែលមានវ័យ៦៧ឆ្នាំនឹងជំនួសនាយករដ្ឋមន្ត្រី ហ្វូមីអូ គីស៊ីដា (Fumio Kishida) ដែលបានជ្រើសរើសមិនឈរឈ្មោះបបោះឆ្នោតសម្រាប់អាណត្តិថ្មី។ លោក ស៊ីហ្គើរូ អ៊ីស៊ីបា (Shigeru Ishiba) នឹងត្រូវបោះឆ្នោតឱ្យឡើងកាន់តំណែងជានាយករដ្ឋមន្ត្រីនៅថ្ងៃអង្គារ សប្ដាហ៍ក្រោយ ខណៈដែលគណបក្សប្រជាធិបតេយ្យសេរីនិយម (LDP) មានសំឡេងភាគច្រើននៅក្នុងសភា។

ជាអតីតធនាគារិក ឬម្ចាស់ធនាគារ និងសមាជិកសភាអស់រយៈពេលជិត៤០ឆ្នាំមកនេះ លោក ស៊ីហ្គើរូ អ៊ីស៊ីបា (Shigeru Ishiba) មានបទពិសោធន៍យ៉ាងទូលំទូលាយក្នុងវិស័យការពារជាតិ កសិកម្ម និងតួនាទីសំខាន់ៗផ្សេងទៀត៕

ដោយ: តែម សុខុម