កោះហុកកៃដូ ដែលជាកោះធំទីពីរនៅក្នុងប្រទេសជប៉ុន កំពុងតែអភិវឌ្ឈន៍ខ្លួនក្លាយជាមូលដ្ឋាននៃផលិតកម្មផលិតផលឧស្សាហកម្មបន្ទះឈីបដ៏ធំរបស់ពិភពលោកនៅក្នុងទឹកប្រាក់វិនិយោគដែលមានតម្លៃប្រមាណ៦៧ពាន់លានដុល្លារ ស្របពេលដែលចិន និងសហរដ្ឋអាម៉េរិកកំពុងតែតានតឹងនឹងគ្នាលើបញ្ហានេះ។
នៅលើទីវាលដ៏ធំដែលគេដឹងថា ជាអតីតវាលស្មៅដ៏ល្វឹងល្វើយនៅភាគខាងជើងនៃកោះហុកកៃដូនេះ ទោះបីជាអាកាសធាតុកំពុងតែអាក្រក់ដោយសារតែការធ្លាក់ព្រិលដ៏ក្រាស់ក៏ដោយ ក៏នៅពេលនេះគ្រឿងចក្រដូចជាអេស្កាវ៉ាទ័រ និងរថយន្តដឹកទំនិញជាច្រើនបានបន្តសកម្មភាពយ៉ាងរស់រវើកចេញចូលការដ្ឋានសំណង់ ដែលគេដឹងថា ជាមូលដ្ឋានរោងចក្រឧស្សាហកម្មបន្ទះឈីបរបស់ជប៉ុន។
តាមសេចក្តីរាយការណ៍បានឲ្យដឹងថា មូលដ្ឋាននេះ គឺកំពុងតែអភិវឌ្ឈន៍ដោយក្រុមហ៊ុន រ៉ាភីតដឺស ខប (Rapidus Corp) ដែលជាក្រុមហ៊ុនបង្កើតថ្មីក្នុងស្រុក។ ក្រុមហ៊ុននេះមានផែនការប្រែក្លាយតំបន់ភាគខាងជើងកោះហុកកៃដូនេះ ទៅជាមជ្ឈមណ្ឌលនៃឧស្សាហកម្មផលិតបន្ទះឈីបដ៏ទំនើបនៅក្នុងឆ្នាំ២០២៧។
អត្តបទគួរអាន
នៅពេលនេះចិន និងសហរដ្ឋអាម៉េរិក ដែលជាមហាអំណាចសេដ្ឋកិច្ចទី២ និងទី១របស់ពិភពលោក កំពុងតែប្រទាំងប្រទើសគ្នាយ៉ាងខ្លាំងលើបញ្ហាអនាគត នៃឧស្សាហកម្មបន្ទះឈីបនេះ ខណៈដែលអាម៉េរិក បានចោទថា ឧស្សាហកម្មនេះអាចជាមូលដ្ឋានទំនើបកម្មខាងយោធារបស់ចិន ខណៈដែលចិនបានឆ្លើយតបមកថា សកម្មភាពរបស់ខ្លួនគ្រាន់តែ ដើម្បីបំពេញនូវសេចក្តីត្រូវការរបស់មនុស្សជាតិប៉ុណ្ណោះ។ ស្របពេលដែលចិន និងអាម៉េរិក ជាប់ដៃក្នុងជម្លោះលើបញ្ហាបន្ទះឈីបនេះ ប្រទេសជាច្រើនគឺកំពុងតែប្រជែងគ្នា ដើម្បីដណ្តើមឧត្តមភាពនេះ ដោយរួមមានតាំងពីកោះតៃវ៉ាន់ កូរ៉ខាងត្បូង និងជប៉ុនតែម្តង។
លោក អាតស៊ូអូ ស៊ីមីហ្សូ ( Atsuo Shimizu )នាយកប្រតិបត្តិក្រុម Rapidus ទទួលបន្ទុកក្នុងការបើកដំណើរការរោងចក្រថ្មី បាននិយាយថា គម្រោងនេះវាពាក់ព័ន្ធនឹងកត្តាភូមិសាស្ត្រនយោបាយ និងសេដ្ឋកិច្ច ប៉ុន្តែដើម្បីរស់នៅក្នុងនាមជាប្រជាជាតិមួយ ជប៉ុនត្រូវការក្លាយជាអ្នកលេងសាកលមួយជាមួយនឹងបច្ចេកវិទ្យា ហើយជប៉ុន ក៏ចង់បង្ហាញថា ខ្លួនជាអ្នកផ្គត់ផ្គង់មួយនៃឧស្សាហកម្មបន្ទះឈីប៕
ដោយៈ សរ សុជាតិ
None
