ឯកឧត្ដម លាង មុនីរិទ្ធ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានអះអាងថា ការរីកចម្រើនវិស័យសំណង់នៅក្នុងឆ្នាំ២០១៩នេះ ដោយសារតែមានការស្នើសុំវិនិយោគពីគម្រោងធំៗ មានដូចជា អគារណិជ្ជកម្ម សណ្ឋាគារ រមណីយដ្ឋាន ផ្សារទំនើប អគារខ្ពស់ៗ ទីក្រុងរណប បុរីលំនៅដ្ឋាន សំណង់ផ្ទះល្វែង និងភូមិគ្រឹះ រោងចក្រផលិតគ្រឿងអេឡិចត្រូនិក រោងចក្រកាត់ដេរ សំលៀកបំពាក់ និងស្បែកជើង រោងចក្រម៉ាស៊ីនកិនស្រូវ និងឡត៌សម្ងួត តំបន់ឧស្សាហកម្ម និងតំបន់សេដ្ឋកិច្ចពិសេស។
ជាមួយគ្នានេះដែរ លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានឲ្យដឹងដែរថា វិស័យសំណង់ និងអចលទ្រព្យគិតរហូតមកពេលបច្ចុប្បន្ននេះនៅតែបង្ហាញទស្សនៈវិស័យមួយប្រកបដោយសុទិដ្ឋិនិយម ដោយបានឆ្លុះបញ្ចាំងឲ្យឃើញពីភាពវិជ្ជមាននៃកត្តានយោបាយ សន្តិសុខ និងសេដ្ឋកិច្ចរបស់កម្ពុជា ដែលជាការទាក់ទាញដ៏សំខាន់សម្រាប់អ្នកវិនិយោគ។
អត្ថបទទាក់ទង!
ផ្អែកលើរបាយការណ៍ ការអភិវឌ្ឍវិស័យសំណង់កម្ពុជា ឃើញថាមានការស្នើសុំចំពោះគម្រោង សំណង់សាធារណៈមានប្រមាណ ៥៦ គម្រោង ដោយបានប្រើប្រាស់ថវិការាជរដ្ឋាភិបាលមាន ១៨ គម្រោង ថវិកាវិស័យឯកជន ៣៦ គម្រោង និង គម្រោងសាងសង់លំនៅឋាន និងភូមិគ្រឹះជាង ២ ពាន់គម្រោង។ សំណង់ឧស្សាហកម្ម ១៣៨ គម្រោង។ សំណង់ពាណិជ្ជកម្ម ១៧៦ គម្រោង។ សំណង់ទេសចរណ៍ ៨២ គម្រោង និងសំណង់ផ្សេងៗទៀតមានចំនួន ១៨គម្រោង ។
យោងតាមសេចក្តីព្រាងច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២០ វិស័យសំណង់ត្រូវបានព្យាករថា នឹង បន្តកំណើនរឹងមាំក្នុងអត្រារង្វង់ជាង ១៧ភាគរយ នៅក្នុងឆ្នាំ២០១៩ និង ជាង១៦ភាគរយ នៅក្នុងឆ្នាំ២០២០ ក្នុងនោះមានការរំពឹងទុក នៃការកើនឡើង អគារលំនៅឋានដែលមានតម្លៃទាប និងមធ្យម ព្រមទាំងសំណង់អគារពាណិជ្ជកម្ម ជំនួសឲ្យកំណើនយឺត នៃសំណង់អគារលំនៅឋានដែលមានតម្លៃខ្ពស់៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
