ក្រុមប្រឆាំងកំពុងដាក់សម្ពាធឲ្យរដ្ឋាភិបាលថៃ លុបចោលការចរចាជាមួយកម្ពុជា លើគម្រោងអភិវឌ្ឈន៍រួមនៅតំបន់ត្រួតស៊ីគ្នានៅឈូងសមុទ្រថៃ

ក្រុមអ្នកតវ៉ាជាតិនិយមថៃ បានប្រដូចគម្រោងចរចាក្នុងការទាញយកឧស្ម័នធម្មជាតិ និងធនធានរ៉ែប្រេងកាតរួមគ្នាជាមួយកម្ពុជា នៅតំបន់ត្រួតស៊ីគ្នានៅឈូងសមុទ្រថៃ ដែលរដ្ឋាភិបាលថៃ បានផ្តួចផ្តើមឡើងនេះទៅនឹងអំពើក្បត់ជាតិ នៅអំឡុងពេលពួកគេធ្វើបាតុកម្មនៅមុខការិយាល័យនាយករដ្ឋមន្ត្រី កាលពីថ្ងៃសុក្រ សប្តាហ៍មុន។ ក្រុមអ្នកជាតិនិយមទាំងនោះ ក៏បានដាក់ញត្តិ ដែលមានហត្ថលេខាប្រជាពលរដ្ឋថៃជាង១សែននាក់ជូនរដ្ឋាភិបាលថៃ នៅក្នុងពេលនោះផងដែរ។

ភាពចលាចលពាក់ព័ន្ធគម្រោងអភិវឌ្ឍន៍រួមគ្នានេះ បានចាប់ផ្តើមនៅចុងខែតុលា នៅពេលដែលគណបក្ស ប៉ាឡាង ប្រាឆារ៉ាត ( Palang Pracharath ) ដែលគាំទ្រយោធា បានអំពាវនាវឱ្យលុបចោលអនុស្សរណៈនៃការយោគយល់គ្នាឆ្នាំ២០០១ រវាងប្រទេសថៃ និងប្រទេសកម្ពុជា លើតំបន់សមុទ្រ ដែលគ្មានព្រំដែនពិតប្រាកដរបស់ប្រទេសទាំងពីរ។

តំបន់ដែលកំពុងរងការរិះគន់ នៅឈូងសមុទ្រភាគខាងកើតនៃប្រទេសថៃនេះ មានទំហំប្រមាណ២ម៉ឺន៦ពាន់គីឡូម៉ែត្រការ៉េ ហើយសម្បូរដោយឧស្ម័នធម្មជាតិ និងប្រេងកាតឆៅមានតម្លៃសរុបប្រមាណ៥៧៧ ពាន់លានដុល្លារ។

អនុស្សរណៈយោគយល់គ្នារវាងកម្ពុជា និងថៃ កាលពីឆ្នាំ២០០១ បានបង្កើតក្របខណ្ឌមួយសម្រាប់ការចរចាឆ្ពោះទៅរកការអភិវឌ្ឍរួមគ្នារវាងប្រទេសថៃ និងកម្ពុជា ប៉ុន្តែគណបក្ស ប៉ាឡាង ប្រាឆារ៉ាត បាននិយាយថា ប្រទេសថៃ អាចនឹងបាត់បង់ទឹកដីនៅលើកោះ គុត ស្ថិតនៅឆ្នេរភាគខាងលិចនៃខេត្តត្រាតជាប់ព្រំប្រទល់ប្រទេសកម្ពុជា ហើយជាតំបន់ទេសចរណ៍ដ៏ពេញនិយមសម្រាប់ភ្ញៀវបរទេស។ តែយ៉ាងណាលោកស្រី ផែថងថា ស៊ីណាវ៉ាត្រា នាយករដ្ឋមន្រ្តីថៃបានច្រានចោលចំពោះការលើកឡើងរបស់ ប៉ាឡាង ប្រាឆារ៉ាត ដោយនិយាយថា កោះគុត គឺស្ថិតនៅក្រៅវិសាលភាពនៃអនុស្សរណៈ៕

ដោយៈ សរ សុជាតិ