នាកិច្ចពិភាក្សាពិសេសអំពី«ស្ថានភាពនៃការអភិវឌ្ឍ និងការធ្វើប្រតិបត្តិការកំពង់ផែទេសចរណ៍អន្តរជាតិខេត្តកំពត»នាថ្ងៃទី៣ ខែឧសភា ឆ្នាំ២០២៤ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូនបានអះអាងថា កំពង់ផែទេសចរណ៍អន្តរជាតិខេត្តកំពតនឹងដាក់ឱ្យដំណើរការបណ្តោះអាសន្ននៅអំឡុងត្រីមាសទី៣ឆ្នាំនេះ ហើយបើពុំមានការប្រែប្រួលទេកំពង់ផែនេះនឹងដាក់ឱ្យប្រើប្រាស់ជាផ្លូវការនៅចុងឆ្នាំនេះតែម្តង។
នេះជាដំណឹងដ៏រីករាយមួយសម្រាប់ប្រជាពលរដ្ឋកម្ពុជាជាពិសេសប្រជាពលរដ្ឋរស់នៅក្នុងខេត្តកំពតតែម្តង ហើយដំណឹងនេះ ក៏ជាការជួយស្រាយបំភ្លឺចំពោះក្តីកង្វក់ និងការរិះគន់មួយចំនួនជុំវិញកំពង់ផែនេះផងដែរ។ បើតាមការគូសបញ្ជាក់របស់ឯកឧត្តម ប៉េង ពោធិ៍នា បច្ចុប្បន្នរាជរដ្ឋាភិបាលកំពុងបិទបញ្ចប់នីតិវិធីជ្រើសរើសក្រុមហ៊ុនឯកជន និងគ្រោងចុះហត្ថលេខាលើកិច្ចព្រមព្រៀងជាមួយក្រុមហ៊ុនវិនិយោគឯកជននៅក្នុងអំឡុងត្រីមាសទី២ ឆ្នាំ២០២៤។
អត្ថបទគួរអាន
ជាមួយគ្នានេះឯកឧត្តម ប៉េង ពោធិ៍នា ក៏បានបញ្ជាក់ដែរថា ដើម្បីធានាបានថា កំពង់ផែនេះមានសុវត្ថិភាពល្អ និងមាននិរន្តរភាព សម្រាប់នាវាគ្រប់ប្រភេទធ្វើចរាចរណ៍បានដោយរលូននោះ រាជរដ្ឋាភិបាលបានតម្រូវឱ្យប្រតិបត្តិករកំពង់ផែអនុវត្តកាតព្វកិច្ចចាំបាច់មួយចំនួនដូចជា ការជីកបូមស្តារផ្លូវទឹកឱ្យបានធំទូលាយ ការសិក្សាបន្ថែមលើបច្ចេកទេស ការបំពាក់ឧបករណ៍សញ្ញាជំនួយនាវាចរណ៍ និងការវិនិយោគមួយចំនួនលើហេដ្ឋារចនាសម្ព័ន្ធសុវត្ថិភាពមួយចំនួនផងដែរ ដើម្បីធានាឱ្យបានថា កំពង់ផែនេះ នឹងក្លាយជាកំពង់ផែទេសចរណ៍អន្តរជាតិពេញលេញស្របតាមបទដ្ឋានបច្ចេកទេសជាតិ និងអន្តរជាតិ។
បើតាមក្រសួងសាធារណការ និងដឹកជញ្ជូន ក្រោយកំពង់ផែទេសចរណ៍អន្តរជាតិនេះ ដាក់ឱ្យដំណើរការ វានឹងក្លាយជាច្រកទ្វារដ៏សំខាន់មួយសម្រាប់កម្ពុជាក្នុងការទទួលភ្ញៀវទេសចរជាតិ និងអន្តរជាតិ ជាពិសេសវានឹងជួយសម្រួលដល់ការធ្វើដំណើរកម្សាន្តតាមផ្លូវទឹកពីកន្លែងមួយទៅកន្លែងមួយ ពីប្រទេសមួយទៅប្រទេសមួយទៀតរបស់ភ្ញៀវទេសចរ។ លើសពីនេះវាក៏កាត់បន្ថយពេលវេលានៃការធ្វើដំណើរ និងថវិការបស់ភ្ញៀវទេសចរផងដែរ។
កំពង់ផែទេសចរណ៍អន្តរជាតិខេត្តកំពតនេះ មានទីតាំងស្ថិតនៅក្នុងស្រុកទឹកឈូ ខេត្តកំពត ដោយលាតសន្ធឹងលើផ្ទៃដីទំហំជាង៤ហិកតា ដែលបានបើកការដ្ឋានសាងសង់កាលពីខែសីហា ឆ្នាំ២០១៨ និងបានបញ្ចប់ការសាងសង់ជាស្ថាពរ កាលកាលពី ខែមិថុនា ឆ្នាំ២០២២ ជាមួយទុនវិនិយោគជាង៩,២លានដុល្លា ក្រោមថវិកាបដិភាគរវាងធនាគារអភិវឌ្ឍន៍អាស៊ី និងរាជរដ្ឋាភិបាលកម្ពុជា៕
None
