ភាពស្ងប់ស្ងាត់ខុសធម្មតាកំពុងគ្របដណ្ដប់លើកំពង់ផែនេសាទធំបំផុតរបស់ថៃ ក្នុងខេត្តសាមុតសាខន ដោយបច្ចុប្បន្នទូកនេសាទជាងពាក់កណ្តាលត្រូវបានចតចោលរួចជាស្រេច ហើយទូកដែលនៅសេសសល់ ត្រូវបានគេរំពឹងថា នឹងឈប់ដំណើរការក្នុងរយៈពេលប៉ុន្មានថ្ងៃខាងមុខនេះ។
លោក ជុំភូល កាណាវ៉ារី (Jumpol Kanawaree) ប្រធានសមាគមអ្នកនេសាទនៅខេត្តសាមុតសាខនបានអះអាងថា ចាប់ពីថ្ងៃទី១ ខែមេសា តទៅ ថៃអាចនឹងលែងមានត្រីសមុទ្រទទួលទានទៀតហើយ ពីព្រោះអ្នកនេសាទលែងអាចទ្រាំទ្រនឹងការចំណាយលើការចេញទូកទៅនេសាទបន្តទៀតបាន ក្រោយតម្លៃប្រេងម៉ាស៊ូតហក់ឡើងខ្ពស់កប់ពពក។
នៅពេលនេះតម្លៃប្រេងម៉ាស៊ូតនៅថៃបានហក់ឡើងដល់១,១៩ដុល្លារក្នុងមួយលីត្រ ហើយបើវាឡើងដល់មួយលីត្រ១,៥០ដុល្លារនោះអ្នកនេសាទលែងចេញទូកតែម្តង។ តែយ៉ាងណាតម្លៃនេះ នៅទាបជាងតម្លៃប្រេងម៉ាស៊ូតនៅកម្ពុជានៅឡើយទេ។ លោក ជុំភូល បានបញ្ជាក់ថា វិបត្តិប្រេងលើកនេះធ្វើឱ្យអ្នកនេសាទពិបាកដកដង្ហើមជាងសម័យកូវីដ-១៩ ទៅទៀត ព្រោះក្រៅពីប្រេងថ្លៃ ធនធានត្រីក្នុងសមុទ្រក៏កាន់តែខ្សត់ទៅៗ។
ឧស្សាហកម្មនេសាទរបស់ថៃមានតម្លៃសរុបប្រមាណ៧ពាន់លានដុល្លារក្នុងមួយឆ្នាំ ដោយនាំចេញយ៉ាងច្រើនទៅកាន់ទីផ្សារអាម៉េរិក ជប៉ុន និងចិន។ ដោយឡែកគ្រាន់តែផ្សារត្រីនៅសាមុតសាខនមួយអាចផ្គត់ផ្គង់ត្រីបានរហូតដល់ទៅ៨០០តោនក្នុងមួយថ្ងៃ។
ទាក់ទងនឹងបញ្ហាដ៏ក្ដៅគគុកនេះ ក្រសួងហិរញ្ញវត្ថុថៃបានអះអាងថា រដ្ឋាភិបាលកំពុងប្រញាប់ប្រញាល់រៀបចំកញ្ចប់ថវិកាសង្គ្រោះ ដើម្បីជួយសម្រាលបន្ទុកដល់អ្នកនេសាទ និងទប់ស្កាត់ការឡើងថ្លៃទំនិញនៅលើទីផ្សារបន្ថែមទៀត៕
ដោយៈ សរ សុជាតិ
