ឥណទានសងយឺតលើសពី៣០ថ្ងៃក្នុងវិស័យមីក្រូហិរញ្ញវត្ថុមកើនឡើង៩%នៅត្រីមាសទី២ ខណៈការផ្តល់ឥណទានធ្លាក់ចុះ តើមកពីមូលហេតុអ្វី?

នៅក្នុងកិច្ចសម្ភាសជាមួយសារព័ត៌មានខេមបូណូមីសលោក កាំង តុងងី ប្រធាននាយកដ្ឋានទំនាក់ទំនង និងជាអ្នកនាំពាក្យសមាគមមីក្រូហិរញ្ញវត្ថុកម្ពុជាបានគូសបញ្ជាក់ថា នៅក្នុងត្រីមាសទី២ ឆ្នាំ២០២៤នេះ គ្រឹះស្ថានមីក្រូហិរញ្ញវត្ថុបានផ្ដល់ឥណទានជាង៥ពាន់១រយលានដុល្លារ ដល់អ្នកប្រើប្រាស់ជាង១,៥លានគណនី ដែលទំហំនេះមានការថយចុះប្រមាណជាង១% បើធៀបនឹងត្រីមាសទី១។

យ៉ាងណាមិញ នៅក្នុងរយៈពេលដូចគ្នានេះ ការទទួលប្រាក់បញ្ញើររបស់គ្រឹះស្ថានមីក្រូហិរញ្ញវត្ថុហាក់មានការកើនឡើងប្រមាណ១% ដោយមានទំហំប្រមាណជាង២ពាន់២រយលានដុល្លារជាមួយអតិថិជនជិត២លានគណនី។ ទន្ទឹមនេះ ចំនួនឥណទានដែលសងយឺតលើសពី៣០ថ្ងៃ មានការកើនឡើងជាង៩% បើធៀបនឹងត្រីមាសមុន។

បើតាមអ្នកជំនាញរូបនេះ កត្តាដែលជំរុញឱ្យការផ្ដល់ឥណទានរបស់គ្រឹះស្ថានមីក្រូហិរញ្ញវត្ថុមានការថយចុះនៅត្រីមាសទី២ឆ្នាំនេះ គឺដោយសារគ្រឹះស្ថានមីក្រូហិរញ្ញវត្ថុមានការប្រុងប្រយ័ត្នខ្ពស់ មុននឹងផ្តល់កម្ចីឱ្យអតិថិជន ដើម្បីការពាហានិភ័យនានា។ ហើយតាមរយៈការប្រុងប្រយ័ត្ននេះ ក៏នាំឱ្យអតិថិជនមិនសូវមានទំនុកចិត្តក្នុងការស្នើសុំកម្ចីយកទៅប្រើប្រាស់ផងដែរ ដោយសារស្ថានភាពសេដ្ឋកិច្ចមិនទាន់មានភាពអំណោយផល។ យ៉ាងណាមិញ ស្របពេលដែលស្ថានភាពសេដ្ឋកិច្ចមិនទាន់ច្បាស់លាស់បែបនេះ ក៏ជំរុញឱ្យប្រជាពលរដ្ឋដាក់លុយទុកនៅគ្រឹះស្ថានមីក្រូហិរញ្ញវត្ថុច្រើនជាងយកលុយទៅវិនិយោគផងដែរ ដែលជាហេតុនាំឱ្យប្រាក់បញ្ញើររបស់គ្រឹះស្ថានមីក្រូហិរញ្ញវត្ថុមានការកើនឡើងនៅត្រីមាសទី២នេះ។

ដោយឡែកចំពោះឥណទានដែលបង់យឺតលើសពី៣០ថ្ងៃមានការកើនឡើងជាង៩% នៅត្រីមាសទី២នេះ ត្រូវបានលោក កាំង តុងងី អះអាងថា គឺដោយសារសេដ្ឋកិច្ចកម្ពុជានៅតែបន្តប្រឈមនឹងបញ្ហាសកលមួយចំនួន ដែលធ្វើឱ្យកម្រិតចំណូលរបស់ប្រជាពលរដ្ឋមានការធ្លាក់ចុះ តែយ៉ាងណាចំនួននេះ ស្ថិតក្នុងកម្រិតទាបនៅឡើយបើធៀបនឹងបណ្តាប្រទេសផ្សេងៗ។

យ៉ាងណាក៏ដោយចុះ អ្នកជំនាញរូបនេះវាយតម្លៃថា ស្ថានភាពជារួមនៅក្នុងវិស័យមីក្រូហិរញ្ញវត្ថុកម្ពុជានៅក្នុងឆ្នាំ២០២៤នេះ នៅតែរក្សាបាននូវស្ថិរភាព និងភាពរឹងមាំរបស់ខ្លួន បើទោះបីជាមិនមានកំណើនប្រែប្រួលគួរឱ្យកត់សម្គាល់ក៏ដោយ៕