ទឹកប្រាក់ជាង ៥០០ពាន់លានដុល្លារនេះ នឹងឈានទៅបង្កើនការវិនិយោគលើរថយន្តអគ្គិសនី ដែលមានគោលបំណងកាត់បន្ថយអ្នកទិញ និងប្រើប្រាស់រថយន្តដំណើរការដោយប្រេងឥន្ធនៈ និងដើម្បីបំពេញតាមគោលដៅអព្យាក្រិតកាបូនឲ្យបានទាន់ពេលកំណត់។
បច្ចុប្បន្ន មានប្រទេសមួយចំនួន ទាំងនៅអាស៊ី និង អឺរ៉ុបបានផ្តើមដាក់ចេញ គោលនយោបាយហាមឃាត់ការលក់រថយន្តប្រើឥន្ធនៈឲ្យបានមុនឆ្នាំ ២០៣០ ដើម្បីឆ្លើយតបនឹងកិច្ចព្រមព្រៀងអាកាសធាតុ គោលដៅការកាត់បន្ថយឧស្ម័នពុលទៅក្នុងបរិយាកាស ដែលធ្វើឲ្យផែនដីឡើងកំដៅនៅត្រឹមឆ្នាំ២០៣០ និងកម្រិតឧស្ម័នកាបូនដល់កម្រិតសូន្យនៅឆ្នាំ២០៥០។
ដោយឡែក បើតាមការវិភាគចុងក្រោយបំផុត ដែលសារព័ត៌មានរ៉យទ័របានផ្សាយ បង្ហាញឲ្យឃើញថា ក្នុងអំឡុងពេល ៥ទៅ១០ឆ្នាំខាងមុខនេះ ក្រុមហ៊ុនផលិតរថយន្តធំៗ និង បែរមកអភិវឌ្ឍ ព្រមទាំងបង្កើតរថយន្តដែលប្រើអគ្គិសនីច្រើនជាងរថយន្តដែល ប្រើប្រេងឥន្ធនៈ។
ប៉ុន្តែក្រុមហ៊ុនទាំងអស់នោះ នៅតែមានការព្រួយបារម្ភថា តម្រូវការអ្នកប្រើប្រាស់សម្រាប់រថយន្តអគ្គិសនី អាចមានចំនួនតិចតួច ប្រសិនបើគ្មានគោលនយោបាយ លើកទឹកចិត្តបន្ថែមពីរដ្ឋសម្រាប់អ្នកប្រើប្រាស់ និងអ្នកផលិតនោះទេ។ ជាក់ស្តែង គេត្រូវចំណាយកាន់តែច្រើនលើហេដ្ឋារចនាសម្ព័ន្ធកន្លែងសាកអាគុយ និងសមត្ថភាពនៃបណ្តាញអគ្គិសនីនៅតាមផ្លូវឲ្យបានគ្រប់គ្រាន់ផងដែរ។
បច្ចុប្បន្នគេឃើញមានតែក្រុមហ៊ុនតេស្លារបស់អាមេរិកប៉ុណ្ណោះ ដែលជោគជ័យខ្លាំង ក្នុងការផលិតរថយន្តអគ្គិសនី ការលក់ និងជោគជ័យទាំងការសាងសង់ហេដ្ឋារចនាសម្ព័ន្ធកន្លែងសាកថ្ម ក្នុងប្រទេសដែលខ្លួនបានបណ្តាក់ទុនផងដែរ។ ក្រៅពីនោះ ក៏មានដែរក្រុមហ៊ុនជប៉ុន Toyota និងក្រុមហ៊ុនចិនមួយចំនួនទៀត ក៏បានខ្នះខ្នែងប្រជែងក្នុងទីផ្សាររថយន្តអគ្គិសនីនេះដែរ។ ប៉ុន្តែក្រៅពីនោះ គេឃើញមានក្រុមហ៊ុនខ្លះទៀត នៅរក្សាជំហរផលិតរថយន្តកូនកាត់ Hybrid ដែលអាចដំណើរការដោយ អាគុយអគ្គិសនីផង និងប្រេងឥន្ធនៈផងដែរ៕
