ក្នុងនោះដែរ ប្រទេសថៃ កំពុងពន្លឿនគម្រោងពង្រីកព្រលានយន្ដហោះរបស់ខ្លួនចំនួន៣ ខណៈដែលការសាងសង់ស្ថាននីយអ្នកដំណើរថ្មីរបស់ព្រលានយន្ដហោះនៅសិង្ហបុរីក៏បានដំណើរការឡើងវិញផងដែរ។ នេះបើតាមការចុះផ្សាយដោយសារព័ត៌មាន Nikkei Asia។
ប្រទេសថៃបាននឹងកំពុងពន្លឿនផែនការពង្រីកនៅអាកាសយានដ្ឋានក្នុងតំបន់បាងកកចំនួនបីរបស់ខ្លួន គឺអាកាសយានដ្ឋានសុវណ្ណភូមិ (Suvarnabhumi) ដុនមឿង (Don Mueang) និងយូ តាប៉ាវ (U-Tapao)។ អ្នកនាំពាក្យម្នាក់បានប្រាប់ប្រព័ន្ធផ្សព្វផ្សាយក្នុងស្រុកថា រដ្ឋាភិបាលថៃកំពុងសម្លឹងមើលការកើនឡើងនៃអ្នកធ្វើដំណើរ និងភ្ញៀវទេសចរណ៍ ដែលរំពឹងទុកនៅក្នុងរដូវកាលដ៏មមាញឹកនាពេលខាងមុខនេះ។
គម្រោងធំជាច្រើនកំពុងដំណើរការនៅអាកាសយានដ្ឋានសុវណ្ណភូមិ ដែលជាច្រកទ្វារអន្តរជាតិដ៏សំខាន់របស់ប្រទេសថៃ។ ហើយផ្លូវរត់យន្ដហោះ ទីបីក្នុងអាកាសយានដ្ឋាននេះ គ្រោងនឹងបញ្ចប់នៅឆ្នាំនេះ ហើយរាជរដ្ឋាភិបាលថៃគ្រោងនឹងស្នើសុំការដេញថ្លៃនៅឆ្នាំក្រោយ សម្រាប់ការសាងសង់ស្ថានីយអ្នកដំណើរថ្មីមួយទៀត ដែលការបន្ថែមនេះ ត្រូវបានគេរំពឹងថា នឹងអាចឱ្យអាកាសយានដ្ឋាននេះ អាចទទួលអ្នកដំណើរដល់ទៅ ១២០លាននាក់ក្នុងមួយឆ្នាំ។
អត្ថបទគួរអាន
រដ្ឋមន្ត្រីក្រសួងទេសចរណ៍ និងកីឡាថៃ លោក ភីផាត់ រចឆាគីត ប្រាកាន បានបង្ហាញក្ដីរំពឹងខ្ពស់ថា វត្តមានចូលរួមកិច្ចប្រជុំកំពូល Apec នៅទីក្រុងបាងកករបស់ប្រធានាធិបតីចិន លោក ស៊ី ជីនពីង នឹងអាចជួយឲ្យប្រទេសថៃ នឹងទទួលបានភ្ញៀវទេសចរអន្តរជាតិដល់ទៅ១២លាននាក់ នៅឆ្នាំ គឺនឹងកើនលើសគោលដៅកំណត់ ១០លាននាក់របស់រាជរដ្ឋាភិបាលទៅទៀត។
ដោយឡែក នៅប្រទេសសិង្ហបុរីឯណោះវិញ លោកនាយករដ្ឋមន្ត្រី Lee Hsien Loong បានប្រកាសកាលពីខែសីហាកន្លងទៅថា ប្រតិបត្តិការនឹងចាប់ផ្តើមឡើងវិញចំពោះគម្រោងស្ថានីយអ្នកដំណើរទី៥ថ្មីនៃអាកាសយានដ្ឋានឆាងហ្គី (Changi)។ គម្រោងនេះ គ្រោងបញ្ចប់នៅពាក់កណ្តាលទសវត្សរ៍ឆ្នាំ២០៣០ ដោយវានឹងជួយជំរុញសមត្ថភាពអាកាសយានដ្ឋាន Changi ឲ្យទទួលអ្នកដំណើរដល់ ១៤០ លាននាក់ក្នុងមួយឆ្នាំ កើនឡើង៦៥% បើធៀបមុននឹងការឆ្លងកូវីដ១៩។
ទាំងនេះគឺជាផ្នែកមួយនៃការជំរុញការពង្រីកព្រលានយន្តយ៉ាងទូលំទូលាយជុំវិញតំបន់ ក៏ដូចជាលើកស្ទួយសេដ្ឋកិច្ចដែលរងគ្រោះដោយជំងឺរាតត្បាត និងការជំរុញឧស្សាហកម្មទេសចរណ៍ និងតាមរយៈការជំរុញសេដ្ឋកិច្ចពីគម្រោងសាងសង់ផងដែរ។
គួរជម្រាបដែរថា បើយោងតាមក្រុមហ៊ុន Fitch Solutions ប្រទេសសេដ្ឋកិច្ចអាស៊ីធំៗចំនួនប្រាំបីកំពុងវិនិយោគទឹកប្រាក់ចំនួន ១៦៤ ពាន់លានដុល្លារ ក្នុងគម្រោងព្រលានយន្តហោះ ហើយហ្វីលីពីន និងវៀតណាម កំពុងមានប្រៀបជាងចិនដីគោក ដោយប្រទេសទាំងពីរនេះ មានការចំណាយចំនួនជាង ៤៤ ពាន់លានដុល្លារ ខណៈដែលចិនដីគោកមានការចំណាយតែជាង ២៣ ពាន់លានដុល្លារដុល្លារប៉ុណ្ណោះ លើការអភិវឌ្ឍព្រលានយន្ដហោះនេះ៕
