លោកស្រី មីន លឿង (Mint Leong) ប្រធានសមាគមទេសចរណ៍ប្រទេសម៉ាឡេស៊ី បានគូសបញ្ជាក់ថា កាលពីខែមករា កន្លងទៅម៉ាឡេស៊ី បានស្វាគមន៍ភ្ញៀវទេសចរចិន ប្រមាណ៦ម៉ឺននាក់ មានការកើនឡើងជាង៤ម៉ឺននាក់ បើធៀបនឹងឆ្នាំមុន។ ហើយបានកើនឡើងខ្ពស់បំផុតដល់១២ម៉ឺននាក់ ក្នុងខែកុម្ភៈ ក្នុងអំឡុងពេលបុណ្យចូលឆ្នាំចិន ដែលជាការមកដល់របស់ភ្ញៀវទេសចរចិនច្រើនបំផុត បន្ទាប់ពីជំងឺកូវីដ-១៩។
លោកស្រីរំពឹងថា ការមកដល់របស់ភ្ញៀវទេសចរចិន នឹងកើនឡើងដល់ចន្លោះជាង៣លាន ទៅជាង៤លាននាក់ នៅឆ្នាំនេះ ហើយរំពឹងថា ពួកគេអាចនឹងចំណាយជាមធ្យមពី១ពាន់ ទៅ១ពាន់២រយដុល្លារក្នុងពេលធ្វើដំណើរកម្សាន្តនៅប្រទេសម៉ាឡេស៊ី។ នៅមុនពេលផ្ទុះជំងឺរាតត្បាតកូវីដ-១៩ ចិន គឺជាប្រភពទេសចរធំជាងគេទី៣ របស់ម៉ាឡេស៊ី បន្ទាប់ពីប្រទេសសិង្ហបុរី និងឥណ្ឌូនេស៊ី ដោយភ្ញៀវទេសចរចិនជាង៣លាននាក់ បានទៅលេងប្រទេសម៉ាឡេស៊ី នៅឆ្នាំ២០១៩។
អត្តបទគួរអាន
រដ្ឋាភិបាលម៉ាឡេស៊ី បានកំណត់គោលដៅទាក់ទាញភ្ញៀវទេសចរចិន ឱ្យបាន៥លាននាក់ នៅឆ្នាំ២០២៤នេះ ដោយសង្ឃឹមថា វានឹងផ្តល់នូវការងើបឡើងវិញនៃវិស័យទេសចរណ៍ នៅក្រោយវិបត្តិជំងឺកូវីដ-១៩ ដល់ប្រទេសដែលមានសេដ្ឋកិច្ចធំបំផុតទី៥ នៅក្នុងតំបន់អាស៊ានមួយនេះ។
កាលពីឆ្នាំ២០២៣ កន្លងទៅ ម៉ាឡេស៊ីសម្រេចបានកំណើនសេដ្ឋកិច្ច៣,៧% ដែលជាកម្រិតមួយទាបជាងការកំណត់គោលដៅផ្លូវការរបស់ប្រទេសនេះ និងទាបជាងអត្រាកំណើនសេដ្ឋកិច្ចនៃបណ្ដាប្រទេសជិតខាងរបស់ខ្លួនដូចជាឥណ្ឌូនេស៊ី និងហ្វីលីពីនជាដើម។ ដូច្នេះហើយដើម្បីជួយជំរុញបង្កើនសេដ្ឋកិច្ចឱ្យសម្រេចបានតាមគោលដៅកំណត់ រដ្ឋាភិបាលក្រុងកូឡាឡាំពួរ កាលពីខែធ្នូ ឆ្នាំមុន បានបង្កើតកម្មវិធីលើកលែងទិដ្ឋាការសម្រាប់ពលរដ្ឋចិន ដោយអនុញ្ញាតឱ្យពួកគេអាចស្នាក់នៅប្រទេសនេះ រហូតដល់៣០ថ្ងៃសម្រាប់ការធ្វើដំណើរទេសចរណ៍ និងការកម្សាន្តផ្សេងៗ៕
អត្ថបទ៖ សុខ ជា
None
