ទិន្នន័យពីការស្ទាបស្ទង់ភូមិសាស្ត្ររបស់សហរដ្ឋអាមេរិកនៅក្នុងឆ្នាំ២០១៩ បានបង្ហាញថា ប្រទេសម៉ាឡេស៊ី គឺជាប្រភពមួយផ្នែកតូចនៃទុនបម្រុងសារធាតុរ៉ែកម្រក្នុងពិភពលោក ដែលមានទុនបម្រុងប្រហែល៣ម៉ឺនតោន ខណៈចិនគឺជាប្រភពដ៏ធំបំផុត ដែលមានទុនបម្រុងប្រមាណ៤៤លានតោន។ ទោះបីយ៉ាងនេះក្តី កាលពីពេលថ្មីៗលោក អានវ៉ា បានអះអាងថា ម៉ាឡេស៊ីនឹងហាមឃាត់ការនាំចេញសារធាតុរ៉ែកម្រ ដើម្បីបង្កើនឧស្សាហកម្មក្នុងស្រុក ហើយការសម្រេចចិត្តរបស់នាយករដ្ឋមន្ត្រីម៉ាឡេស៊ីនេះ បានធ្វើឡើងស្របពេល ដែលពិភពលោកកំពុងសម្លឹងរកការធ្វើពិពិធកម្មចេញឆ្ងាយពីប្រទេសចិនដែលជាអ្នកផលិតរ៉ែកម្រដែលត្រូវបានគេប្រើយ៉ាងទូលំទូលាយនៅក្នុងបន្ទះសៀគ្វី រថយន្តអគ្គិសនី និងឧបករណ៍យោធាមួយនេះ។
សម្រាប់លោក អានវ៉ា រដ្ឋាភិបាលរបស់លោកនឹងគាំទ្រដល់ការអភិវឌ្ឍឧស្សាហកម្មរ៉ែកម្រនៅក្នុងប្រទេសម៉ាឡេស៊ី ហើយការហាមឃាត់នេះនឹង«ធានានូវផលចំណេញអតិបរមាសម្រាប់ប្រទេស ប៉ុន្តែលោកមិនបានបញ្ជាក់ថាតើបម្រាមនេះនឹងចូលជាធរមាននៅពេលណានោះទេ។ ឧស្សាហកម្មរ៉ែកម្រត្រូវបានគេរំពឹងថា នឹងរួមចំណែករហូតដល់ទៅ២ពាន់លានដុល្លារក្នុងផលិតផលក្នុងស្រុកសរុបរបស់ប្រទេសម៉ាឡេស៊ីនៅឆ្នាំ២០២៥ និងបង្កើតឱកាសការងារបានជិត៧ពាន់នាក់។
អត្ថបទគួរអាន
បើតាមការលើកឡើងរបស់លោក អានវ៉ា ការគូសផែនទីលម្អិតពីប្រភពសារធាតុរ៉ែកម្រ និងគំរូអាជីវកម្មដ៏ទូលំទូលាយ ដែលរួមបញ្ចូលគ្នានូវឧស្សាហ៍កម្មថ្នាក់លើ ថ្នាក់កណ្តាល និងថ្នាក់ក្រោមនឹងត្រូវបានបង្កើតឡើង ដើម្បីរក្សាខ្សែច្រវាក់តម្លៃរ៉ែកម្រនៅក្នុងប្រទេសនេះ។ ការហាមប្រាមរបស់ម៉ាឡេស៊ីនេះអាចប៉ះពាល់ដល់ការលក់រ៉ែកម្រនេះទៅឱ្យប្រទេសចិនដែលបាននាំចូលប្រហែល៨% នៃរ៉ែកម្រមកពីប្រទេសអាស៊ីអាគ្នេយ៍មួយនេះនៅចន្លោះខែមករាដល់ខែកក្កដាឆ្នាំនេះ។ នេះបើយោងតាមទិន្នន័យគយរបស់ប្រទេសចិន។
នៅដើមឆ្នាំនេះប្រទេសចិនផ្ទាល់ក៏បានប្រកាសពីការរឹតបន្តឹងលើការនាំចេញលោហៈមួយចំនួន ដែលត្រូវបានប្រើយ៉ាងទូលំទូលាយនៅក្នុងឧស្សាហកម្មបន្ទះឈីបផងដែរ នៅក្នុងវិធានការមួយដែលគេមើលឃើញថា ជាការសងសឹកចំពោះការទប់ស្កាត់របស់អាមេរិកលើការលក់ បច្ចេកវិទ្យាទំនើបទៅឱ្យចិន។ ការទប់ស្កាត់របស់ម៉ាឡេស៊ីនេះបានបង្កឱ្យការភ័យខ្លាចថា ចិនក៏អាចដាក់ម្រិតលើការនាំចេញសារធាតុរ៉ែសំខាន់ៗផ្សេងទៀតរួមទាំងរ៉ែកម្រផងដែរ៕
