ទន្ទឹមនឹងរងផលប៉ះពាល់ដោយសារអាម៉េរិកផ្ដាច់ជំនួយ ប្រទេសក្រីក្រជាច្រើនក៏កំពុងប្រឈមនឹងវិបត្តិបំណុលរុំកោះ

ប្រទេសក្រីក្រជាច្រើនដែលស្ថិតក្នុងចំណោមបណ្ដាប្រទេសកំពុងអភិវឌ្ឍន៍កំពុងរងសម្ពាធកាន់តែខ្លាំងឡើងពីបន្ទុកបំណុលរីកកាន់តែធំ ខណៈដែលរំហូរកម្ចីឥណទានថ្មីៗពីប្រទេសចិន និងកម្ចីឥណទានក្នុងវិស័យឯកជនហាក់រីងស្ងួត។

យោងតាមធនាគារពិភពលោកបានឱ្យដឹងថា បំណុលបរទេសនៃបណ្ដាប្រទេសដែលមានប្រាក់ចំណូលទាប និងមធ្យមបានឈានដល់៨,៨ទ្រីលានដុល្លារអាម៉េរិក គិតត្រឹមឆ្នាំ២០២៣ ហើយប្រទេសក្រីក្រទាំងនោះត្រូវចំណាយរហូតដល់ទៅ១,៣៦ទ្រីលានដុល្លារអាម៉េរិកឯណោះគ្រាន់តែសម្រាប់បង់ការប្រាក់នៅក្នុងឆ្នាំនោះ ខណៈបំណុលចេះតែបន្តកើនឡើងមិនឈប់ដោយសារបន្ទុកការប្រាក់កើនឡើង។

ទិន្នន័យផ្លូវការរបស់ធនាគារពិភពលោកបានបង្ហាញថា ការបង់រំលស់ប្រាក់ដើមមានចំនួនជាង៩៥០ពាន់លានដុល្លារអាម៉េរិក ដោយកើនឡើងតែ០,៦% ក្នុងឆ្នាំ២០២៣ បើធៀបនឹងឆ្នាំ២០២២ ប៉ុន្តែបើងាកមកមើលការបង់ការប្រាក់វិញឃើញថា បានកើនឡើងរហូតដល់ទៅ៣៧% ឈានដល់ជាង៤០៥ពាន់លានដុល្លារអាម៉េរិក។

ទិន្នន័យដដែលបានបង្ហាញទៀតថា សម្រាប់បណ្ដាប្រទេសក្រីក្របំផុតដែលទទួលបានការជឿទុកចិត្តទាបសម្រាប់ការទទួលបានកម្ចីឥណទានបរទេស ការបង់ប្រាក់បានកើនឡើងជិត៤ដងក្នុងមួយទសវត្សរ៍កន្លងមកនេះ។

បណ្ដាប្រទេសដែលមានប្រាក់ចំណូលទាប និងមធ្យមកំពុងប្រឈមមុខនឹងស្ថានការណ៍ដ៏អាក្រក់ ខណៈដែលមូលនិធិវិនិយោគរបស់មហាក្សចិន និងមូលនិធិវិនិយោគក្នុងវិស័យឯកជនហូរចេញទៅក្រៅប្រទេសយ៉ាងគំហុក ជាហេតុបង្ខំឱ្យប្រទេសទាំងនោះត្រូវពឹងផ្អែកលើកម្ចីឥណទានរយៈពេលខ្លីដែលមានការប្រាក់ខ្ពស់ជាងធម្មតា ដែលពេលខ្លះខ្ចីគ្រាន់តែសម្រាប់យកទៅសងបំណុលដើម្បីដោះទាល់។ នេះមានន័យថា ខ្ចីបំណុលថ្មីយកទៅទូទាត់សងបំណុលចាស់ ហើយខ្ចីចុះខ្ចីឡើងបំណុលកាន់តែគរដូចភ្នំ កាន់តែរើខ្លួនលែងរួច។

លោក អ៊ីនដឺមីត ហ្គីល (Indermit Gill) ប្រធានសេដ្ឋវិទូនៃ World Bank Group បានគូសបញ្ជាក់ថា ស្ថានភាពបច្ចុប្បន្នមិនមាននិរន្តរភាពនោះទេ សម្រាប់ប្រទេសក្រីក្របំផុតជាច្រើន ពោលគឺស្ថិតក្នុងហានិភ័យខ្ពស់៕

ដោយ: តែម សុខុម