នាយកប្រតិបត្តិក្រុមហ៊ុន McDonald’s លោក Chris Kempczinski បាននិយាយនៅក្នុងសេចក្តីថ្លែងការណ៍មួយថា McDonald's នឹងបិទទ្វារជាបណ្តោះអាសន្ននូវភោជនីយដ្ឋាន ៨៤៧កន្លែងរបស់ខ្លួននៅក្នុងប្រទេសរុស្ស៊ី ដែលមានបុគ្គលិកសរុបប្រមាណ ៦ម៉ឺន២ពាន់នាក់។ បើទោះបីហាងត្រូវផ្អាកដំណើរការ ប៉ុន្ដែក្រុមហ៊ុនប្រកាសថា បុគ្គលិកក៏នៅតែទទួលបានប្រាក់ខែ។ ប៉ុន្ដែ ក្រុមហ៊ុននេះ មិនបានបញ្ជាក់ថា តើការបិទនេះ នឹងបន្ដដល់ពេលណានោះទេ។
នាយកប្រតិបត្តិក្រុមហ៊ុន McDonald’s លោក Kempczinski បានបន្ថែមទៀតថា ជម្លោះនៅអ៊ុយក្រែន និងវិបត្តិមនុស្សធម៌បានបង្កឱ្យមានការឈឺចាប់ដែលប៉ះពាល់ដល់ជនស្លូតត្រង់ ហើយការសម្រេចចិត្តបិទភោជនីដ្ឋាននេះ ជាផ្នែកមួយ ដែលចូលរួមជាមួយពិភពលោកក្នុងការថ្កោលទោសការឈ្លានពាន និងអំពើហឹង្សារបស់រុស្ស៊ី ដែលបានធ្វើលើប្រទេសអ៊ុយក្រែន ហើយក៏ជាការបង្ហាញពីការចង់បានសន្តិភាពត្រឡប់មកវិញផងដែរ។
ដោយឡែកហាងកាហ្វេ Starbucks ដែលមានសាខាប្រហែល ១០០ហាង នៅរុស្ស៊ី ក៏កំពុងបានផ្អាកសកម្មភាពអាជីវកម្មក្នុងប្រទេសរុស្ស៊ីដែរ ហើយក្នុងអំឡុងពេលផ្អាកនេះ ក្រុមហ៊ុនក៏នឹងជួយផ្ដល់ការផ្គត់ផ្គង់ទៅកាន់បុគ្គលិករបស់ខ្លួនប្រហែល២ពាន់នាក់ផងដែរ។ ស្របពេលដែល ក្រុមហ៊ុនភេសជ្ជដ៏ធំរបស់ពិភពលោក កូកាកូឡា និង Pepsi ក៏បានប្រកាសថានឹងផ្អាកការលក់ភេសជ្ជរបស់ពួកគេនៅរុស្ស៊ីដូចគ្នាដែរ។
អត្ថបទគួរអាន
ដោយឡែកហាង KFC និង Taco Bell បាននិយាយដែរថា ខ្លួននឹងផ្អាកការអភិវឌ្ឍភោជនីយដ្ឋានថ្មីនៅក្នុងប្រទេសរុស្ស៊ី ប៉ុន្ដែ ក្រុមហ៊ុននេះ មិនបានបញ្ជាក់នៅឡើយទេថា តើខ្លួននឹងផ្អាកប្រតិបត្តិការភោជនីយដ្ឋានដែលកំពុងមានដំណើរនៅរុស្ស៊ីដែរ ឬក៏អត់នោះទេ។ អ្នកជំនាញបាន ប្រាប់កាសែត The New York Times ថា បញ្ហាអាចមានភាពស្មុគ្រស្មាញក្នុងកិច្ចព្រមព្រៀងសិទ្ធិអាជីវកម្មក្នុងស្រុក ហើយអាចនឹងមានការសម្រេចចិត្តបិទដំណើរការនៃប្រតិបត្តិករកាន់តែច្រើនបន្ថែមទៀត នៅក្នុងប្រទេសរុស្ស៊ី។
គួរបញ្ជាក់ថា មានក្រុមហ៊ុនអាមេរិក និងលោកខាងលិចកាន់តែច្រើនឡើងៗ នៅក្រោយពេលផ្ទុះសង្គ្រាមឈ្លានពាននៅអ៊ុយក្រែន ពួកគេបានផ្អាកប្រតិបត្តិការដែលមាននៅរុស្ស៊ី ស្របពេលដែលរដ្ឋាភិបាលប្រទេសអាមេរិក និងលោកខាងលិច ក៏បាននិងកំពុងទម្លាក់ទណ្ឌកម្មកាន់តែធ្ងន់ទៅៗលើរុស្ស៊ីផងដែរ។ ជាក់ស្ដែង ទណ្ឌកម្មធំៗថ្មីៗចុងក្រោយ នាពេលនេះ គឺការបិទខ្ទប់ធនាគាររុស្ស៊ីពីប្រព័ន្ធទូទាត់សកល SWIFT, ការដកខ្លួនរបស់ក្រុហ៊ុនបច្ចេកវិទ្យាយក្សដូចជា ក្រុមហ៊ុន Netflix Inc ក្រុមហ៊ុន Apple និង ការផ្អាកប្រតិបត្តិការទូតាត់របស់ក្រុមហ៊ុន VISA, MasterCard និង Paypal ជាដើម ហើយថ្មីៗនេះ អាមេរិកក៏ទើបតែបានប្រកាសនឹងបិទលែងនាំចូលប្រេងពីរុស្ស៊ីផងដែរ៕
អត្ថបទ៖ វ៉ាន់ ស្រីរ័ត្ន
None
