ការថ្លែងរបស់លោកស៊ី ជីនពីង ដូចនេះត្រូវបានគេមើលឃើញថា គឺជាការប្រតិកម្មខ្លាំងជាងលើកណាៗទាំងអស់ និងជាការនិយាយចំៗតែម្តង ចាប់តាំងពីពេលផ្ទុះសង្គ្រាមនៅថ្ងៃដំបូងរហូតមកដល់បច្ចុប្បន្ន។ កន្លងមក ទីក្រុងប៉េកាំង ភាគច្រើនគ្រាន់តែបានអំពាវនាវឲ្យភាគីទាំងអស់ សន្ទនា និង ដោះស្រាយដោយសន្តិវិធីប៉ុណ្ណោះ។
ក្នុងឱកាសកិច្ចពិភាក្សាតាមរយៈប្រព័ន្ធវីដេអូជាមួយប្រធានាធិបតីបារាំង លោក អេម៉ានូអេល ម៉ាក្រុង និងអធិការបដីអាល្លឺម៉ង់លោក អូលាវហ៍ ស្កុល, ប្រធានាធិបតីចិន លោក ស៊ី ជីនពីង បាននិយាយថា «ប្រទេសយើងទាំងបីគឺតែងរួមគ្នាគាំទ្រដល់កិច្ចចរចាសន្តិភាពរវាងរុស្ស៊ីនិងអ៊ុយក្រែន។» នេះបើតាមការចុះផ្សាយដោយសារព័ត៌មានរដ្ឋចិន CCTV។
ការចរចាសន្តិភាពរវាងទីក្រុងកៀវ និងម៉ូស្កូ បានធ្វើឡើងអស់៣ជុំរួចទៅហើយគិតត្រឹមថ្ងៃទី៨មីនា ខណៈកិច្ចខិតខំប្រឹងប្រែងទាំងនេះ មិនបានឈានទៅដល់បទឈប់បាញ់ ដូចតាមការចង់បានរបស់ភាគីអ៊ុយក្រែននោះទេ។ ផ្ទុយទៅវិញរុស្ស៊ីបានដាក់លក្ខខណ្ឌ៤ចំណុច ឲ្យអ៊ុយក្រែនជាថ្នូរនឹងការបញ្ឈប់ប្រតិបត្តិការយោធាភ្លាមៗ។
ដោយឡែក លោកស៊ី បានពិពណ៌នាស្ថានការណ៍ក្នុងប្រទេសអ៊ុយក្រែនថា កំពុងស្ថិតក្នុងស្ថានភាពគួរឲ្យព្រួយបារម្ភ។ បុរសខ្លាំងរូបនេះ សង្កត់ធ្ងន់ពីអាទិភាពដែលគួរតែធ្វើ គឺការពារវាពីការវិវត្តកាន់តែអាក្រក់ ឬការពារកុំឲ្យស្ថានការណ៍ឈានដល់ដំណាក់កាលមួយដែលមិនអាចគ្រប់គ្រងបាន។
អត្ថបទគួរអាន
លោកបានទទូចឲ្យ ប្រទេសបារាំង និងអាល្លឺម៉ង់គួរតែខិតខំប្រឹងប្រែងដើម្បីកាត់បន្ថយផលប៉ះពាល់អវិជ្ជមាននៃវិបត្តិនេះ ហើយព្រមទាំងបានសម្តែងការព្រួយបារម្ភអំពីផលប៉ះពាល់នៃទណ្ឌកម្មនានា ដែលលោកខាងលិចបានដាក់លើរុស្ស៊ី កំពុងប៉ះពាល់ស្ថិរភាពនៃហិរញ្ញវត្ថុសកល ការផ្គត់ផ្គង់ថាមពល ការដឹកជញ្ជូន និងខ្សែសង្វាក់ផ្គត់ផ្គង់ជាដើម។
ការលើកឡើងរបស់ប្រធានាធិបតីចិនដូចនេះ ប្រៀបដូចជាការស្តីបន្ទោសចំៗឲ្យបារាំងនិងអាល្លឺម៉ង់ដែរ រព្រោះប្រទេសទាំងពីរនេះ សុទ្ធតែបានរួមចំណែកធំ ដាក់ទណ្ឌកម្មលើរុស្ស៊ី ហើយអាល្លឺម៉ង់ឯណោះ ថែមទាំងបានបញ្ជូនគ្រឿងសព្វាវុធទៅឲ្យអ៊ុយក្រែន វាយទប់ទល់នឹងម៉ូស្កូថែមទៀត។
សូមជម្រាបថា កាលពីថ្ងៃចន្ទ ទីប្រឹក្សារដ្ឋចិន និងជារដ្ឋមន្ត្រីក្រសួងការបរទេសចិនលោក វ៉ាង យី បានលើកឡើងដែរថា ទំនាក់ទំនងរបស់ចិនជាមួយរុស្ស៊ី នៅតែរឹងមាំដដែល បើទោះជាមានការរិះគន់យ៉ាងភ្លូកទឹកភ្លូកដី អំពីប្រតិកម្មចិនលើសំណុំបញ្ហាវិបត្តិសង្គ្រាមនៅអ៊ុយក្រែនក៏ដោយ។ ទោះជាយ៉ាងនេះក្តី លោកវ៉ាង យីបានអំពាវនាវម្តងហើយម្តងទៀត ឱ្យមានការសន្ទនាគ្នាដោយសន្តិវិធីដើម្បីបញ្ចប់សង្គ្រាម។
ចិនដែលបានបង្កើតភាពជាដៃគូនយោបាយ និងសេដ្ឋកិច្ចថ្មីមួយជាមួយរុស្ស៊ីកាលពីខែមុន ជាអ្នកឈរនៅក្នុងចំណោមប្រទេសមួយចំនួនតូច ដែលមិនបានថ្កោលទោសទីក្រុងមូស្គូក្នុងការបញ្ជូនកងទ័ពចូលប្រទេសអ៊ុយក្រែន៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
