រដ្ឋមន្ត្រីសុខាភិបាលថៃ លោក សុំសាក់ ថេបស៊ូទីន (Somsak Thepsutin) បាននិយាយនៅក្នុងសេចក្តីថ្លែងការណ៍មួយកាលពីថ្ងៃសៅរ៍ថា ការចំណាយផ្នែកវេជ្ជសាស្រ្តសរុបសម្រាប់ជំងឺដែលព្យាបាលដោយឱសថផ្សំពីកញ្ឆាបានកើនឡើងពី៤០៧លានដុល្លារទៅជាង៥៧១លានដុល្លារបន្ទាប់ពីរដ្ឋាភិបាលបានដាក់ឱ្យប្រើប្រាស់កញ្ជាស្របច្បាប់សម្រាប់វេជ្ជសាស្ត្រកាលពីពីរឆ្នាំមុន។ តួលេខនេះត្រូវបានប្រៀបធៀបនឹងការចំណាយកាលក្នុងការព្យាបាលកាលពីឆ្នាំ២០១៩ និង២០២១ ដែលមានតម្លៃ៨៧លានដុល្លារ និង១០០លានដុល្លារៀងគ្នា។
នាយករដ្ឋមន្ត្រីថៃ លោក ស៊្រីថា ថាវីស៊ីន កំពុងព្យាយាមកែប្រែគោលនយោបាយកញ្ឆាដ៏សំខាន់របស់ប្រទេសនេះដោយចាត់ទុករុក្ខជាតិនេះថា ជាសារធាតុញៀនឡើងវិញព្រមទាំងដាក់កម្រិតលើការប្រើកញ្ឆាចំពោះគោលបំណងវេជ្ជសាស្ត្រ និងសុខភាពផងដែរ។ ក្រសួងសុខាភិបាលគ្រោងដាក់កញ្ឆាជាប្រភេទថ្នាំញៀនប្រភេទទី៥ឡើងវិញ ដែលនឹងធ្វើឱ្យវាក្លាយជាបទឧក្រិដ្ឋក្នុងការកាន់កាប់ និងប្រើប្រាស់ឱសថនេះ។
អត្តបទគួរអាន
លោក សុំសាក់ បាននិយាយថា ការប្រើប្រាស់កញ្ឆាសម្រាប់គោលបំណងភ្លើតភ្លើនអារម្មណ៍ ត្រូវបានគេរកឃើញថា បានធ្វើឱ្យខូចដល់ការអភិវឌ្ឍខួរក្បាល និងនាំឱ្យមានជំងឺធ្លាក់ទឹកចិត្ត និងធ្វើអត្តឃាតផងដែរ ហើយថា ប្រហែល៤០%នៃយុវជនថៃ ដែលញៀនថ្នាំហេរ៉ូអ៊ីន គឺដើមឡើយពួកគេបានប្រើប្រាស់កញ្ឆានេះឯង។
ការប្រើប្រាស់កញ្ឆាដោយសេរីបានក្លាយជាបញ្ហានយោបាយដ៏ក្តៅគគុកនៅមុនការបោះឆ្នោតជាតិរបស់ប្រទេសថៃ កាលពីឆ្នាំមុន។ គណបក្សភឿថៃរបស់លោក សេដ្ឋា បានផ្សព្វផ្សាយយុទ្ធនាការប្រឆាំងគ្រឿងញៀនដ៏តឹងរ៉ឹងមួយនៅមុនការបោះឆ្នោត ហើយបានសន្យាថា នឹងលុបបំបាត់គ្រឿងញៀនចេញពីសង្គមថៃ ឱ្យខាងតែបាន៕
អត្ថបទ៖ សុខ មង្គល
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
