សមាគមមីក្រូហិរញ្ញវត្ថុកម្ពុជា បានចាត់ទុកការវិវត្តខ្លួនរបស់ អេ អឹម ខេ នាពេលនេះ គឺបានបង្ហាញពីភាពរឹងមាំរបស់វិស័យមីក្រូហិរញ្ញវត្ថុកម្ពុជា ដែលមានកំណើនរីកលូតលាស់ ស្របពេលដែលបច្ចុប្បន្នមានគ្រឹះស្ថានមីក្រូហិរញ្ញវត្ថុមួយចំនួនទៀតកំពុងរៀបចំផែនការវិវត្តខ្លួនទៅជាធនាគារពាណិជ្ជនាពេលអនាគតផងដែរ។
លោក កាំង តុងងី ប្រធាននាយកដ្ឋានទំនាក់ទំនង និងជាអ្នកនាំពាក្យសមាគមមីក្រូហិរញ្ញវត្ថុកម្ពុជា បានចាត់ទុកការវិវត្តខ្លួនរបស់គ្រឹះស្ថានមីក្រូហិរញ្ញវត្ថុ អេ អឹម ខេ ទៅជាធនាគារពាណិជ្ជជាផ្លូវការនាពេលនេះ គឺបានបង្ហាញពីភាពរីកចម្រើន នៃវិស័យមីក្រូហិរញ្ញវត្ថុនៅកម្ពុជា ដែលក្លាយជាប្រព័ន្ធហិរញ្ញវត្ថុដ៏រឹងមាំ និងមានកម្រិត នៃទំនុកចិត្តខ្ពស់ពីសាធារណជនរាប់លាននាក់ ក្នុងរយៈពេលជាច្រើនឆ្នាំកន្លងមកនេះ។ អ្នកជំនាញរូបនេះបានបន្ថែមថា ការវិវត្តនេះ ក៏បង្ហាញពីសមត្ថភាពគ្រប់គ្រងដ៏រឹងមាំរបស់គ្រឹះស្ថានមីក្រូហិរញ្ញវត្ថុលើការជំរុញកំណើនរីកលូតលាស់ ការបង្កើតនវានុវត្តន៍ និងការពង្រីកសេវាកម្ម ដើម្បីបំពេញតម្រូវការ ដែលកំពុងវិវត្តរបស់គ្រួសារ និងអាជីវកម្មនៅកម្ពុជា ផងដែរ។
ការបំប្លែងខ្លួនទៅជាធនាគារបស់ អេ អឹម ខេ វាជាដំណើរវិវត្តិជាធម្មតានៃវិស័យហិរញ្ញវត្ថុ ដែលមានសុខមាលភាពល្អ និងសកម្ម។ នេះបើតាមការបញ្ជាក់របស់លោក កាំង តុងងី ដែលបានបន្ថែមថា ក្រៅពី អេ អឹម ខេ ក៏មានគ្រឹះស្ថានមីក្រូហិរញ្ញវត្ថុមួយចំនួនទៀតដែរ ដែលកំពុងរៀបចំផែនការកែលម្អប្រតិបត្តិការរបស់ខ្លួន និងដាក់ពាក្យស្នើសុំអាជ្ញាបណ្ណធនាគារពាណិជ្ជ។ តែយ៉ាងណាលោកមិនបានបញ្ជាក់ឈ្មោះគ្រឹះស្ថានមីក្រូហិរញ្ញវត្ថុទាំងនេះនោះទេ។
អត្ថបទគួរអាន
ជាមួយគ្នានេះ លោក គា បូរាណ ប្រធាននាយកប្រតិបត្តិ អេ អឹម ខេ បានគូសបញ្ជាក់ថា ការសម្រេចចិត្តវិវត្តខ្លួនរបស់ អេ អឹម ខេ ទៅជាធនាគារពាណិជ្ជជាផ្លូវការនៅពេលនេះ គឺជាជំហានយុទ្ធសាស្ត្រដ៏សំខាន់ ដើម្បីឆ្លើយតបទៅនឹងការរីកចម្រើនយ៉ាងរហ័ស នៃតម្រូវការហិរញ្ញវត្ថុរបស់អតិថិជន និងសេដ្ឋកិច្ចជាតិទាំងមូល។
គោលបំណងចម្បងនៃការវិវត្តខ្លួននេះ គឺការបង្កើនលទ្ធភាពក្នុងការផ្តល់ជូននូវសេវាកម្មហិរញ្ញវត្ថុឱ្យបានកាន់តែសម្បូរបែប និងទូលំទូលាយ ដែលមិនត្រឹមតែផ្តោតលើការផ្តល់ឥណទានខ្នាតតូចប៉ុណ្ណោះទេ ប៉ុន្តែថែមទាំងផ្តល់ឥណទានអាជីវកម្មខ្នាតមធ្យម និងសាជីវកម្មធំៗផងដែរ។
ទោះបីជាដំឡើងឋានៈក៏ដោយ ប្រធាននាយកប្រតិបត្តិរូបនេះនៅតែប្តេជ្ញាចិត្តខ្ពស់ក្នុងការរក្សាចក្ខុវិស័យជាដៃគូហិរញ្ញវត្ថុដែលផ្តល់ទំនុកចិត្តបំផុតសម្រាប់ប្រជាជន។ អេ អឹម ខេ គ្រោងនឹងនាំមកនូវបច្ចេកវិទ្យាឌីជីថលទំនើបៗ ដើម្បីធ្វើឱ្យសេវាធនាគារកាន់តែងាយស្រួល សុវត្ថិភាព និងមានតម្លៃសមរម្យ។ ជាមួយគ្នានេះ បេសកកម្មក្នុងការជំរុញបរិយាបន្នហិរញ្ញវត្ថុ និងការអប់រំចំណេះដឹងផ្នែកហិរញ្ញវត្ថុដល់ពលរដ្ឋនៅតែជាអាទិភាពចម្បង ដើម្បីធានាថា ប្រជាជនកម្ពុជាគ្រប់រូបមានសមត្ថភាពគ្រប់គ្រងហិរញ្ញវត្ថុផ្ទាល់ខ្លួនបានយ៉ាងល្អប្រសើរ និងរួមចំណែកដល់ការរីកចម្រើននៃសេដ្ឋកិច្ចជាតិទាំងមូល៕
