ថ្មីៗនេះ អនុរដ្ឋមន្ត្រីពាណិជ្ជកម្មថៃបានដឹកនាំក្រុមមន្ត្រីចុះត្រួតពិនិត្យគុណភាពមាសនៅតាមហាងលក់មាស នៅក្នុងតំបន់យ៉ៅវ៉ារ៉ាត ក្នុងទីក្រុងបាងកក ។
យុទ្ធនាការចុះត្រួតពិនិត្យតាមហាងលក់មាសនេះ ធ្វើឡើងបន្ទាប់ពីអ្នកទិញមាសមួយចំនួនបានដាក់ពាក្យបណ្ដឹងប្ដឹងថា ពួកគេចាញ់បោកអ្នកលក់មាសក្លែងក្លាយ ។ ករណីឆបោកលក់មាសក្លែងក្លាយដែលកើតមានឡើង ទំនងជាបណ្ដាលមកពីការឡើងថ្លៃយ៉ាងគំហុកនៃតម្លៃមាស ដោយនៅប្រទេសថៃ តម្លៃមាសគិតត្រឹមថ្ងៃទី១៧ ខែកក្កដា ឡើងដល់ ២ម៉ឺន ៧ពាន់បាត ក្នុងមាសទម្ងន់មួយប្រាក់បាត ។ តម្លៃនេះ គឺខ្ពស់បំផុតក្នុងរយៈពេល ៨ឆ្នាំចុងក្រោយនេះ ។
យោងតាមសារព័ត៌មានក្នុងស្រុកថៃ មន្ត្រីជាន់ខ្ពស់ក្រសួងពាណិជ្ជកម្មថៃបានអំពាវនាវឲ្យប្រជាជនមានការប្រុងប្រយ័ត្នបន្ថែមចំពោះករណីលក់មាសក្លែងក្លាយ ដោយបានដាសតឿនថា "អ្នកទិញមាសគួរតែទិញពីអាជីវករដែលអាចទុកចិត្តបាន ដែលមានលិខិតបញ្ជាក់ពីសមាគមអាជីវករលក់មាស ។ ម្យ៉ាងទៀត អ្នកទិញត្រូវមើលត្រាចំណាំនៅលើដុំមាស ។"
អត្ថបទទាក់ទង
ប្រធានសមាគមអាជីវករលក់មាសថៃ បានឲ្យដឹងថា ការខូចខាតផ្នែកហិរញ្ញវត្ថុដែលបណ្ដាលមកពីករណីលក់មាសក្លែងក្លាយ គឺប្រហែល ២ពាន់លានបាត (ឬជាង ៦៣លានដុល្លារ) ក្នុងមួយឆ្នាំៗ ហើយអ្នកដែលរងគ្រោះខ្លាំងជាងគេបំផុត គឺហាងបញ្ចាំតូចៗ ដែលខ្វះឧបករណ៍ពិនិត្យគុណភាពមាស ។
ប្រធានសមាគមដដែលបាននិយាយថា សមាគមនឹងធ្វើការដិតដល់ជាមួយអាជីវកម្ម និងប្រតិបត្តិករហាងបញ្ចាំ ដើម្បីអប់រំអំពីការសម្គាល់មាសក្លែងក្លាយ ។
ចំពោះអ្នកទិញមាសតាមអញឡាញវិញ ប្រធានសមាគមបានដាសតឿនថា បើតម្លៃលក់វាថោកពេកដែលមិនគួរឲ្យជឿ លោកអ្នកគួរតែសន្មតថា វាជាករណីឆបោកហើយ ៕
