នេះបើតាមការចេញផ្សាយរបស់សារព័ត៌មាននីកេអេស៊ា។
វិទ្យាស្ថានជាតិស្រាវជ្រាវប្រជាជន និងសន្តិសុខសង្គមរបស់ជប៉ុនបានប៉ាន់ប្រមាណថា ស្ត្រីជប៉ុនប្រហែល ៤២%ដែលកើតក្នុងឆ្នាំ២០០៥ គឺពួកគេមិនចង់យកកូនពេញមួយជីវិតរបស់ពួកគេ។
របាយការណ៍នេះបានប៉ាន់ប្រមាណទៀតថា អត្រាភាគរយរបស់ស្ត្រីគ្មានកូននេះគឺខ្ពស់ជាងតួលេខសម្រាប់បុរស ដែលមិនចង់រៀបការជាងស្ត្រីទៅទៀត ដោយចំនួនបុរសពាក់កណ្តាល ដែលមានអាយុ១៨ឆ្នាំ នឹងមិនចង់បានកូននោះទេ។
គ្មានមូលហេតុណាមួយបញ្ជាក់ពីការកើនឡើងនៃអត្រាមិនមានកូនរបស់ស្ត្រីនេះទេ ប៉ុន្តែគេសង្កេតឃើញយុវជនកាន់តែច្រើនឡើង មិនសូវចាប់អារម្មណ៍ពីរឿងរៀបការ និងមានកូននោះទេ នៅចំពេលប្រាក់ឈ្នួលនៅទ្រឹង និងភាពមិនច្បាស់លាស់ពីអនាគតរបស់ពួកគេកាន់តែខ្លាំង។
អត្រាកំណើតរបស់ប្រទេសជប៉ុនបានធ្លាក់ចុះរហូតដល់ ១,២%នៅក្នុងឆ្នាំ២០២២ជាអត្រាទាបបំផុតមួយមិនធ្លាប់មានក្នុងរយៈពេល១៧ឆ្នាំមកនេះ ហើយនេះគឺជាការធ្លាក់ចុះប្រចាំឆ្នាំលើកទី៧ជាប់ៗគ្នាដោយសារចំនួនរៀបការបានធ្លាក់ចុះ បណ្ដាលមកពីការរឹតបន្តឹងសង្គមក្នុងសម័យជំងឺកូវីដ១៩។
អត្ថបទគួរអាន
តួលេខបឋមបានឱ្យដឹងថា ចំនួនកំណើតសរុបរួមទាំងជនបរទេសមានជិត៨០ម៉ឺននាក់ក្នុងឆ្នាំ២០២២គឺបានធ្លាក់ចុះជាង៥%បើធៀបនឹងឆ្នាំ២០២១ ប៉ុន្តែចំនួនកំណើតសម្រាប់តែពលរដ្ឋជប៉ុនដែលរស់នៅក្នុងប្រទេសជប៉ុន គឺមិនទាន់បានចេញផ្សាយនៅឡើយទេ។
ដោយហេតុតែអត្រាស្ត្រីមិនចង់បានកូនកើនឡើង និងអត្រាកំណើតធ្លាក់ចុះបែបនេះដូច្នេះហើយរដ្ឋាភិបាលបានប៉ាន់ប្រមាណថា ចំនួនប្រជាជនជប៉ុនសរុបនឹងធ្លាក់ចុះមកនៅក្រោម ១០០លាននាក់នៅត្រឹមឆ្នាំ២០៥៦ ហើយចំនួនកំណើតនឹងធ្លាក់ចុះមកនៅក្រោម៥០ម៉ឺននាក់ក្នុងមួយឆ្នាំ។
ការយឺតយ៉ាវក្នុងការស្ដារសេដ្ឋកិច្ច និងការកើនឡើងការចំណាយលើសន្ដិសុខសង្គម បានបង្កើនបញ្ហាដល់ពលរដ្ឋជាច្រើនស្ទាក់ស្ទើរក្នុងការរៀបការ ឬមានកូន។ ជាមួយគ្នានេះ ប្រាក់ឈ្នួលមានការថយចុះ ដោយសារតែអតិផរណា ក៏ជាកត្តានាំឲ្យគូស្វាមីភរិយានៅប្រទេសជប៉ុនក៏សូវគិតគូចង់បានកូននោះដែរ។
រាជរដ្ឋាភិបាលជប៉ុនពេលនេះ កំពុងពិចារណាពង្រីកប្រាក់ឧបត្ថម្ភសម្រាប់កុមារ និងអត្ថប្រយោជន៍មួយចំនួន នៅអំឡុងពេលសម្រាកថែទាំកុមារក្នុងរយៈពេល ៣ឆ្នាំ ដែលគេរំពឹងថា វាជាផ្នែកមួយនឹជំរុញឲ្យអត្រាកំណើនកើនឡើងវិញ៕
