សហព័ន្ធសាជីវកម្មធានាឥណទានរបស់ជប៉ុនបាននិយាយថា ក្នុងអំឡុងត្រីមាសទី២ អាជីវកម្មខ្នាតតូចនិងមធ្យមមួយចំនួនបានងាកទៅរកសមាគមធានាឥណទាននេះក្នុងចំនួនជិត១ម៉ឺនករណីដើម្បីទូទាត់បំណុលប្រាក់កម្ចីពួកគេដោយបានកើនឡើង៧០%បើធៀបទៅនឹងឆ្នាំមុន ហើយគ្រាន់តែក្នុងខែមិថុនាតែមួយប៉ុណ្ណោះ គឺករណីខាងលើនេះបានកើនឡើងរហូតដល់ជាង៨០%បើធៀបនឹងឆ្នាំមុន។
ចំនួននៃការសងបំណុលកាន់តែកើនឡើងតាមរយៈកម្ចីពីសមាគមខាងលើនេះគឺជាសូចនាករឈានមុខគេមួយដែលបង្ហាញពីការបរាជ័យនៃអាជីវកម្មមួយចំនួននៅប្រទេសជប៉ុន ហើយករណីបែបនេះបានកើនឡើងរយៈពេល ៧ត្រីមាសជាប់ៗគ្នាតែម្ដង។
នៅក្នុងឆ្នាំសារពើពន្ធដែលបិទបញ្ចប់ត្រឹមខែមីនាឆ្នាំ២០២៣ ករណីបែបនេះបានកើនឡើង៤៥% គឺឡើងដល់ជាង៣ម៉ឺនករណី ពោលគឺមិនមែនតាំងពីការផ្ទុះឡើងនៃជំងឺកូវីដ១៩ កាលពី៣ឆ្នាំមុននោះឡើយ។
អត្ថបទគួរអាន
កាលពីចុងខែធ្នូ ឆ្នាំ២០២២ ការផ្ដល់ប្រាក់ម្ចីដល់អាជីវកម្មខ្នាតតូចពីគ្រឹះស្ថានហិរញ្ញឯកជន និងរដ្ឋដែលមិនទាន់សងមានចំនួនជាង ២ពាន់ពាន់លានដុល្លារ ដោយបានកើនឡើងពីចំនួនជាង ៣១៤ ពាន់លានដុល្លារចាប់ពីខែធ្នូ ឆ្នាំ២០១៩ គឺមុនពេលជំងឺកូវីដ និងមុនពេលនៃការបន្តកម្មវិធីជំនួយហិរញ្ញវត្ថុទៅទៀត។
ចាប់តាំងពីរដ្ឋាភិបាលបានបើកចំហសេដ្ឋកិច្ចជាថ្មីមក ប្រាក់ចំណូលបានស្ទុះងើបឡើងវិញជាពិសេសនៅក្នុងវិស័យភោជនីយដ្ឋាន ទេសចរណ៍ និងវិស័យសេវាកម្មផ្សេងទៀត ប៉ុន្តែអាជីវកម្មក្នុងវិស័យបែបនេះមិនអាចទទួលបានប្រាក់ចំណេញដូចកាលពីមុននោះទេ ដោយសារតែការចំណាយលើការផ្គត់ផ្គង់ និងកម្លាំងពលកម្មកាន់តែខ្ពស់។
ហើយអាជីវកម្មទាំងអស់នេះនៅតែត្រូវសងបំណុលដែលចេះតែកើនឡើងបណ្តាលឱ្យមានភាពតានតឹងផ្នែកហិរញ្ញវត្ថុធ្ងន់ធ្ងរសម្រាប់ក្រុមហ៊ុនអាជីវកម្មទាំងនេះកាន់តែកើនឡើង៕
អត្ថបទ៖ សុខ ជា
