កីឡដ្ឋាននេះ សាងសង់ឡើងក្នុងគោលបំណង ដើម្បីត្រៀមរៀបចំការប្រកួតកីឡាស៊ីហ្គេម និងអាស៊ានប៉ារ៉ាហ្គេមនៅឆ្នាំ២០២៣ ដែលកម្ពុជាធ្វើជាម្ចាស់ផ្ទះ។
ក្រោយពន្យារពេលក្នុងការបញ្ចប់ការសាងសង់ជាបន្តបន្ទាប់ ដោយសារការរាតត្បាតនៃជំងឺកូវីដ-១៩ មកទល់ពេលនេះ ពហុកីឡដ្ឋានជាតិមរតកតេជោ បានបញ្ចប់ការសាងសង់ទីលាន និងហេដ្ឋារចនាសម្ព័ន្ធខាងក្នុង១០០%ហើយនៅតែផ្នែកលម្អរខាងក្រៅតែប៉ុណ្ណោះ។ នេះបើតាមការបញ្ជាក់របស់ឯកឧត្តម វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា។ តាមគម្រោងកីឡដ្ឋាននេះ គ្រោងបញ្ចប់ការសាងសង់នៅអំឡុងខែធ្នូ ឆ្នាំ២០២០ ប៉ុន្តែត្រូវបានពន្យារពេលមកដល់បច្ចុប្បន្នដោយសារការរាតត្បាតនៃជំងឺកូវីដ-១៩។
អគ្គលេខាធិការ គណៈកម្មាធិការជាតិអូឡាំពិកកម្ពុជារូបនេះបានអះអាងថា បើគ្មានការប្រែប្រួលទេក្រុមហ៊ុនសាងសង់របស់ចិន China State Construction Engineering Corporation នឹងប្រគល់កីឡដ្ឋានលំដាប់អន្តរជាតិមួយនេះ ជូនគណៈកម្មាធិការជាតិអូឡាំពិកកម្ពុជាគ្រប់គ្រង នៅថ្ងៃទី១៥ ខែសីហា ឆ្នាំ២០២១ នេះ។ ខណៈបច្ចុប្បន្ន គណៈកម្មាធិការជាតិអូឡាំពិកកម្ពុជា កំពុងដាក់សំណើទៅរាជរដ្ឋាភិបាល ដើម្បីស្នើសុំថវិកាសម្រាប់ទ្រទ្រង់ការចំណាយលើការថែទាំពហុកីឡដ្ឋាននេះ។
អត្ថបទទាក់ទង
ពាក់ព័ន្ធគោលបំណងនៃការសាងសង់ពហុកីឡដ្ឋានជាតិមរតកតេជោ ត្រូវបានឯកឧត្តម វ៉ាត់ ចំរើន អគ្គលេខាធិការ CAMSOC បានគូសបបញ្ជាក់ថា ពហុកីឡដ្ឋាននេះសាងសង់ឡើង ដើម្បីត្រៀមទទួលធ្វើជាម្ចាស់ផ្ទះការប្រកួតកីឡាអាស៊ីអាគ្នេយ៍លើកទី៣២ និងការប្រកួតកីឡាអាស៊ានប៉ារ៉ាហ្គេមនៅឆ្នាំ២០២៣។ ឯកឧត្តមបានចាត់ទុកពហុកីឡដ្ឋានជាតិនេះ ជាសមិទ្ធផលប្រវត្តិសាស្ត្រក្នុងសម័យតេជោ ដែលបង្ហាញពីភាពរឹងមាំនៃចំណងមិត្តភាពកម្ពុជា-ចិន។
កីឡដ្ឋានលំដាប់អន្តរជាតិនេះ សាងសង់ជាមួយបច្ចេកវិទ្យាចុងក្រោយបង្អស់របស់ចិន ដែលអាចចាត់ទុកជាកីឡដ្ឋានល្អដាច់គេមួយនៅតំបន់អាស៊ាន។ ដោយក្នុងនោះ មានទីលានបាល់ទាត់ សាងសង់លើផ្ទៃដីជាង១៦ហិកតា ដែលជាសាងសង់ក្នុងដំណាក់កាលពីទី២ និងទទួលបានជំនួយឥតសំណងពីរដ្ឋាភិបាលចិន។ កីឡដ្ឋាននេះ អាចផ្ទុកអ្នកទស្សនាបានប្រមាណ៦ម៉ឺននាក់ និងអាចជម្លៀសទស្សនិកជនត្រឹមតែ៧នាទីក្នុងករណីមានបញ្ហាអ្វីកើតឡើង។
សមិទ្ធផលទីពីរនៃពហុកីឡដ្ឋានជាតិមរតកតេជោនេះ បានបើកការដ្ឋានសាងសង់នៅថ្ងៃទី៤ មេសា ឆ្នាំ២០១៧ ក្រោមវត្តមានសម្តេចនាយករដ្ឋមន្ត្រី ហ៊ុន សែន ក្នុងអំឡុងពេលសម្ពោធដាក់ឲ្យប្រើប្រាស់សមិទ្ធផលដំណាក់កាលទី១ រួមមានមជ្ឈមណ្ឌលអាងហែលទឹក មជ្ឈមណ្ឌលកីឡាក្នុងសាល, ទីលានបាល់បោះ, និងអគារស្នាក់នៅរបស់អត្តពលិក។
អ្វីដែលគួរឲ្យចាប់អារម្មណ៍ នៅក្បែរនឹងពហុកីឡដ្ឋានខ្នាតអន្តរជាតិមួយនេះ ក៏មានគម្រោង«ភូមិកីឡដ្ឋានវើលដ៍ប្រ៊ីដ»(WorldBridge Sport Village) ដ៏ធំស្កឹមស្កៃមួយ បាននិងកំពុងសាង់សង់យ៉ាងសស្រាក់សស្រាំផងដែរ ដើម្បីត្រៀមសម្រាប់បម្រើដល់ការប្រកួតកីឡាប្រជាជាតិអាស៊ីអាគ្នេយ៍ និង អាស៊ានប៉ារ៉ាហ្គេម ក្នុងឆ្នាំ២០២៣។ ភូមិកីឡដ្ឋានវើលដ៍ប្រ៊ីដ ដែលជាសមិទ្ធផលចាប់ដៃរួមគ្នារវាងក្រុមហ៊ុនវើលដ៍ប្រ៊ីដរបស់អ្នកឧកញ៉ា សៀ ឬទ្ធី ជាមួយរាជរដ្ឋាភិបាលនេះលាតសន្ធឹងលើផ្ទៃដី៦ហិកតា ដោយគ្រោងចំណាយថវិកាជាង២០០លានដុល្លារអាមេរិក៕
អ្នកឧកញ៉ា សៀ ឫទ្ធី បានអះអាងកន្លងមកថា គម្រោងភូមិកីឡដ្ឋាន វើលដ៍ប្រ៊ីដនេះ នឹងក្លាយជាតំបន់ពាណិជ្ជកម្មថ្មីសឡាងមួយទៀត នៃទីក្រុងនាគសម្តេចតេជោសែន ដែលមានខុនដូរសម្រាប់ការស្នាក់នៅ១២អគារ ស្មើនឹងជាង១.៣០០បន្ទប់ មានខុនដូរប្រភេទស្ទូឌីយ៉ូ១អគារ ស្មើនឹង១៦៣បន្ទប់ កម្ពស់១៣ជាន់ ។ ក្រៅពីនេះ ក៏មានជាប្រភេទផ្ទះល្វែង ផ្ទះអាជីវកម្ម ផ្ទះវីឡា ផ្សារទំនើប និងសារមន្ទីរកីឡា ជាដើម ដែលគ្រោងបញ្ចប់ការសាងសង់ទាំងស្រុងនៅចុងឆ្នាំ ២០២២ ខាងមុខនេះ៕
None
