យោងតាមទិន្នន័យពីក្រុមប្រឹក្សាអភិវឌ្ឍន៍កម្ពុជា បានឱ្យដឹងថា ចំនួនគម្រោងវិនិយោគក្នុងវិស័យឧស្សាហកម្មបានចូលរួមចំណែកដល់ទៅប្រមាណ៩២% នៃចំនួនគម្រោងវិនិយោគសរុប ខណៈទុនវិនិយោគប្រមាណ៤៦% បានមកពីវិស័យនេះ។ ដោយឡែក វិស័យហេដ្ឋារចនាសម្ព័ន្ធ និងផ្សេងៗ ដែលមានតែប្រមាណ២,៦% នៃចំនួនគម្រោងវិនិយោគសរុបបានចូលរួមចំណែកដល់ទៅប្រមាណ៤៤% នៃទុនវិនិយោគសរុប ដោយសារចរិតនៃការវិនិយោគក្នុងវិស័យនេះត្រូវការទុនវិនិយោគច្រើន។ គម្រោងថ្មីទាំងអស់នេះ ត្រូវបានក្រុមប្រឹក្សាអភិវឌ្ឍន៍កម្ពុជាអះអាងថា រំហូរទុនវិនិយោគឯកជននៅឆ្នាំ២០២៣ មានការកើនឡើងគួរឱ្យកត់សម្គាល់ក្នុងរង្វង់ប្រមាណ២២% បើធៀបនឹងឆ្នាំ២០២២។
យោងតាមទិន្នន័យដដែលបានឱ្យដឹងទៀតថា គម្រោងវិនិយោគលេចធ្លោប្រចាំឆ្នាំ២០២៣ រួមមាន នៅក្រៅតំបន់សេដ្ឋកិច្ចពិសេស ដែលសម្បូរការវិនិយោគលើវិស័យកសិកម្ម និងកសិ-ឧស្សាហកម្ម, វិស័យទេសចរណ៍, វិស័យហេដ្ឋារចនាសម្ព័ន្ធ និងផ្សេងៗ។ ចំណែកក្នុងតំបន់សេដ្ឋកិច្ចពិសេសវិញមានគម្រោងបង្កើតរោងចក្រផលិតសំបកកង់យានយន្ត, គម្រោងបង្កើតរោងចក្រផលិតដែកគ្រប់ប្រភេទ និងគម្រោងបង្កើតរោងចក្រផលិត និងបង្គំគ្រឿងអលង្ការ និងគ្រឿងលម្អជាដើម។
ពាក់ព័ន្ធនឹងគម្រោងវិនិយោគដែលក្រុមប្រឹក្សាអភិវឌ្ឍន៍កម្ពុជាបានអនុម័តទាំងនេះ រំហូរទុនវិនិយោគក្នុងឆ្នាំ ២០២៣ ភាគច្រើនមានប្រភពមកពីប្រទេសចិន និង ក្នុងស្រុក ដោយបានរួមចំណែកជិត ៩០% នៃទុនវិនិយោគសរុប។ ប្រសិនបើពិនិត្យមើលរបាយគម្រោងវិនិយោគក្នុងឆ្នាំ២០២៣ គម្រោងវិនិយោគភាគច្រើនមានទីតាំងស្ថិតក្នុងខេត្តកំពង់ស្ពឺ ហើយគម្រោងវិនិយោគមួយចំនួន ទៀតបានប្រមូលផ្តុំនៅរាជធានីភ្នំពេញ និងខេត្តជុំវិញរាជធានីភ្នំពេញ គឺខេត្តកណ្តាល និងខេត្តតាកែវ និងនៅតាម បណ្តាខេត្តដែលមានការអភិវឌ្ឍតំបន់សេដ្ឋកិច្ចពិសេស គឺខេត្តស្វាយរៀង និងខេត្តព្រះសីហនុ៕
