ប្រធានសមាគមអ្នកផលិត និងអ្នកនាំចេញផ្លែទុរេនមីយ៉ាន់ម៉ា លោក ក្យាវ មីន (Kyaw Min) បានប្រាប់ទីភ្នាក់ងារព័ត៌មាន ស៊ីនហួ របស់ចិន កាលពីថ្ងៃសៅរ៍ សប្តាហ៍មុនថា ប្រទេសមីយ៉ាន់ម៉ា មានគម្រោងចាប់ផ្តើមនាំចេញផ្លែទុរេនទៅកាន់ទីផ្សារប្រទេសចិន នៅឆ្នាំក្រោយ ឬនៅឆ្នាំ២០២៧ ដើម្បីបង្កើនប្រាក់ចំណូលបរទេស និងអភិវឌ្ឍន៍ឧស្សាហកម្មក្នុងស្រុក។ បើតាមការអះអាងរបស់លោក ក្យាវ មីន ពេលនេះ មីយ៉ាន់ម៉ា កំពុងដំណើរការចុះបញ្ជីជាមួយរដ្ឋបាលគយចិន ខណៈប្រទេសនេះកំពុងប្រឹងប្រែងអភិវឌ្ឍន៍ផលិតផលទុរេនស្រស់ និងកែច្នៃ ឱ្យស្របតាមតម្រូវការរបស់ទីផ្សារ និងមានបំណងទាក់ទាញវិនិយោគិនបរទេស អ្នកជំនាញ និងដៃគូអាជីវកម្មឱ្យចូលរួមគាំទ្រដល់ការកែច្នៃទុរេនរបស់ខ្លួន។
ប្រធានសមាគមរូបនេះ បានកត់សម្គាល់ថា ឧស្សាហកម្មទុរេនរបស់មីយ៉ាន់ម៉ា កំពុងត្រៀមខ្លួនជាស្រេចសម្រាប់ការរីកចម្រើនយ៉ាងឆាប់រហ័ស។ ប្រទេសចិន គឺជាអ្នកទិញផ្លែទុរេនធំជាងគេបំផុតលើពិភពលោក ដោយកាលពីឆ្នាំមុន ចិន បានទិញផ្លែទុរេនជិត១៦លានតោនក្នុងតម្លៃជិត៧ពាន់លានដុល្លារអាម៉េរិក ដែលទុរេនភាគច្រើនមកពីប្រទេសថៃ មានចំនួន៥៧% និងវៀតណាម មានចំនួនជិត៤២% ហើយនៅសល់ប៉ុន្មានទៀតត្រូវបានផ្គត់ផ្គង់ដោយប្រទេសហ្វីលីពីន និងម៉ាឡេស៊ី។
ប៉ុន្តែតម្រូវការរបស់ទីផ្សារចិន បានធ្លាក់ចុះនៅឆ្នាំ២០២៥ ដោយការនាំចូលបានធ្លាក់ចុះ១៥%មកនៅត្រឹមជិត៧១ម៉ឺនតោន នៅក្នុងឆមាសទីមួយ បើធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមទិន្នន័យរបស់គយចិន។
ទុរេនរបស់មីយ៉ាន់ម៉ា ក៏កំពុងដាក់គោលដៅប្រកួតប្រជែងជាមួយកម្ពុជា ដែលបាននាំចេញផ្លែទុរេនស្រស់ដំបូងរបស់ខ្លួនទៅកាន់ទីផ្សារចិន កាលពីខែកក្កដា ឆ្នាំ២០២៥ ខណៈឡាវ ក៏បានបង្ហាញបំណងចូលរួមការប្រណាំងប្រជែងនេះដែរ៕
ដោយ៖ សុខ មង្គល
