មេដឹកនាំអាស៊ាន

មេដឹកនាំមីយ៉ាន់ម៉ា កំពុងពិចារណាឡើងវិញលើទំនាក់ទំនងជាមួយអាស៊ាន


ក្រោយអវត្តមានពីកិច្ចប្រជុំកំពូលអាស៊ានអស់រយៈពេលជាច្រើនឆ្នាំចាប់តាំងពីខែតុលា ឆ្នាំ២០២១ មក ពេលនេះលោក មីន អោងលាំង ប្រធានាធិបតីមីយ៉ាន់ម៉ា ដែលគាំទ្រដោយយោធាបានចេញមុខអះអាងថា រដ្ឋបាលរបស់លោកកំពុងពិចារណាឡើងវិញអំពីទំនាក់ទំនងជាមួយអាស៊ាន។ ទីភ្នាក់ងារព័ត៌មាន Reuters បានរាយការណ៍ថា មេដឹកនាំមីយ៉ាន់ម៉ា រូបនេះ បានចោទប្រកាន់ថា អាស៊ាន កំពុងដាក់សម្ពាធយ៉ាងធ្ងន់ធ្ងរ និងមិនធ្លាប់មានពីមុនមកមកលើប្រទេសមីយ៉ាន់ម៉ា។
មេដឹកនាំមីយ៉ាន់ម៉ា កំពុងពិចារណាឡើងវិញលើទំនាក់ទំនងជាមួយអាស៊ាន
ដោយ

ប្រធានាធិបតីមីយ៉ាន់ម៉ា លោក មីន អោងលាំង បានអះអាងថា រដ្ឋបាលរបស់លោកកំពុងពិចារណាឡើងវិញលើទំនាក់ទំនងជាមួយអាស៊ាន។ ការលើកឡើងបែបនេះកើតឡើងភ្លាមៗ បន្ទាប់ពីអាស៊ានបានបញ្ចប់កិច្ចប្រជុំកំពូលដោយគ្មានវត្តមានមេដឹកនាំនយោបាយមីយ៉ាន់ម៉ា ដែលធ្វើឱ្យលោក មីន អោងលាំង ហាក់បង្ហាញការខកចិត្តយ៉ាងខ្លាំង ខណៈដែលលោកបានព្យាយាមបើកផ្លូវភ្ជាប់ទំនាក់ទំនងឡើងវិញជាមួយតំបន់នេះ។

អតីតមេដឹកនាំរបបសឹក ដែលបានធ្វើរដ្ឋប្រហារទម្លាក់រដ្ឋាភិបាលស៊ីវិលជាប់ឆ្នោតកាលពីឆ្នាំ២០២១ និងរុញច្រានប្រទេសឱ្យធ្លាក់ក្នុងភ្លើងសង្គ្រាមស៊ីវិលរូបនេះបានលើកឡើងថា អាស៊ានកំពុងអនុវត្តស្តង់ដាដាក់សម្ពាធលើតែមីយ៉ាន់ម៉ាមួយប៉ុណ្ណោះ។ លោកបានសង្កត់ធ្ងន់ថា កន្លងមកអាស៊ានមិនដែលដាក់សម្ពាធ ឬបង្ហាញអាកប្បកិរិយាមិនគោរពទៅលើប្រទេសសមាជិកណាមួយឡើយ ប៉ុន្តែបែរជាកំពុងធ្វើបែបនេះចំពោះមីយ៉ាន់ម៉ាទៅវិញ។
យ៉ាងណាក៏ដោយកាលពីថ្ងៃអាទិត្យកន្លងទៅ មេដឹកនាំអាស៊ានបានចេញសេចក្តីថ្លែងការណ៍ដោយបើកផ្លូវថា អាស៊ានអាចនឹងពិចារណាស្តារតំណាងនយោបាយពេញលេញរបស់មីយ៉ាន់ម៉ាឡើងវិញជាបណ្តើរៗ លុះត្រាតែមីយ៉ាន់ម៉ាបង្ហាញវឌ្ឍនភាពជាក់ស្តែងលើផែនការដោះស្រាយវិបត្តិដែលមានស្រាប់។

គួរកត់សម្គាល់ថា ចាប់តាំងពីឡើងកាន់តំណែងជាប្រធានាធិបតីកាលពីខែមេសា បន្ទាប់ពីការបោះឆ្នោតដែលរងការរិះគន់ លោក មីន អោងលាំង បានបំពេញទស្សនកិច្ចទៅកាន់ប្រទេសសមាជិកអាស៊ានមួយចំនួនដូចជាថៃ ម៉ាឡេស៊ី វៀតណាម និងកម្ពុជា ខណៈប្រទេសសមាជិកជិតពាក់កណ្តាលនៃសមាជិកទាំង ១១របស់អាស៊ានបានបង្កើនទំនាក់ទំនងទ្វេភាគីជាមួយមីយ៉ាន់ម៉ាឡើងវិញ។

តែយ៉ាងណាលោក មីន អោងលាំង បានគូសបញ្ជាក់ថា ដើម្បីឱ្យមីយ៉ាន់ម៉ា និងអាស៊ានអាចវិលទៅរកប្រក្រតីភាពឡើងវិញ រដ្ឋបាលរបស់លោកនឹងថ្លឹងថ្លែងរវាងជំហររបស់មីយ៉ាន់ម៉ា និងបំណងរបស់បណ្តាប្រទេសសមាជិកអាស៊ាន។

សូមរំលឹកថា ចាប់តាំងពីអាស៊ានសម្រេចមិនអនុញ្ញាតឱ្យមេដឹកនាំនយោបាយមីយ៉ាន់ម៉ាចូលរួមកិច្ចប្រជុំកំពូលកាលពីខែតុលា ឆ្នាំ២០២១ មក កម្ពុជាក៏ធ្លាប់បានខិតខំប្រឹងប្រែង និងដាក់ចេញគំនិតផ្តួចផ្តើមនានា ដើម្បីជួយនាំមីយ៉ាន់ម៉ាចូលមកក្នុងមហាគ្រួសារអាស៊ានដោយស្មើមុខស្មើមាត់ឡើងវិញ ក្នុងគោលដៅរក្សាឯកភាព និងមជ្ឈភាពរបស់អាស៊ាន។

ប៉ុន្តែរហូតមកដល់កិច្ចប្រជុំកំពូលក្នុងខែវិច្ឆិកា នេះ ស្ថានភាពទំនាក់ទំនងរវាងមីយ៉ាន់ម៉ា និងអាស៊ាននៅតែជាប់គាំងដដែល ដោយអាស៊ាននៅតែទាមទារឱ្យមានការអនុវត្តកិច្ចព្រមព្រៀងជាឯកច្ឆន្ទ៥ចំណុច ដែលភាគីទាំងពីរបានព្រមព្រៀងគ្នាកាលពីខែមេសា ឆ្នាំ២០២១៕
ដោយៈ សរ សុជាតិ




អត្ថបទបន្ទាប់


អឺរ៉ុប ជំរុញឲ្យពលរដ្ឋត្រៀមខ្លួនទប់ទល់នឹងវិបត្តិឱ្យបានយ៉ាងហោចណាស់៣ថ្ងៃ ប៉ុន្តែពលរដ្ឋអឺរ៉ុបភាគច្រើនខ្វះលទ្ធភាព

ស្របពេលពិភពលោកមានការប្រែប្រួល និងប្រឈមនឹងការគំរាមកំហែងគ្រប់រូបភាព តាំងពីសង្គ្រាម ការវាយប្រហារតាមអ៊ីនធឺណិត រហូតដល់គ្រោះមហន្តរាយធម្មជាតិ …

ឡាវ មានមហិច្ឆតាប្រែក្លាយខ្លួនជាមជ្ឈមណ្ឌលផ្លូវដែក និងថាមពលប្រចាំតំបន់អាស៊ាន

ក្នុងនាមជាប្រទេស ដែលសម្បូរវារីអគ្គីសនី និងមានផ្លូវរថភ្លើងតភ្ជាប់ផ្ទាល់ជាមួយចិន ប្រទេសឡាវ កំពុងជំរុញផែនការយុទ្ធសាស្ត្រ ដើម្បីប្រែក្លាយខ្លួនទៅ…
More

Related Stories


ផ្សេងទៀត


ច្រើនទៀត

ពេញនិយមបំផុត


ច្រើនទៀត

ថ្មីៗ