តាមរបាយការណ៍ដដែលនេះ បានឲ្យដឹងទៀតថា នៅក្នុងរយៈពេល ៥ខែ ដើមឆ្នាំ ២០២០នេះ ការនាំចេញទំនិញពី កម្ពុជា ទៅកាន់ប្រទេសថៃ សម្រេចបានជាង ៧២៥លានដុល្លារអាមេរិក កើនឡើងជិត ៩០% ធៀបនឹងពេលដូចគ្នាកាលពីឆ្នាំមុន ខណៈការនាំទំនិញពី ថៃ ចូលមកប្រទេសកម្ពុជា វិញ សម្រេចបាន ២,៨ ពាន់លានដុល្លារអាមេរិក មានការថមថយចុះ ២,៨%។
នាយកដ្ឋានពាណិជ្ជកម្មបរទេសនៃប្រទេសថៃ បានគូសបញ្ជាក់ថា ក្នុងរយៈពេល ៥ខែដើមឆ្នាំនេះ ទំហំពាណិជ្ជកម្មតាមព្រំដែនរបស់ ថៃ សម្រេចបានជាង ១៦,៧ពាន់លានដុល្លាអាមេរិក ក្នុងនោះ ការធ្វើពាណិជ្ជកម្មតាមព្រំដែន ជាមួយប្រទេសកម្ពុជា មានជាង ២,២ពាន់លានដុល្លារអាមេរិក កើនឡើង ៥%ផងដែរ។
យ៉ាងណាក៏ដោយ ទំហំពាណិជ្ជកម្មតាមព្រំដែនរបស់ថៃ ធ្លាក់ចុះ ៩,៧% ដោយសារតែសេដ្ឋកិច្ចប្រទេសជិតខាងមានផលប៉ះពាល់ដោយសារតែមេរោគកូវីដ-១៩ ដែលធ្វើឲ្យច្រកព្រំដែនសំខាន់ៗបិទទ្វារសឹងតែទាំងអស់។
អត្ថបទទាក់ទង
អគ្គនាយក នៃនាយកដ្ឋានពាណិជ្ជកម្មបរទេសរបស់ប្រទេសថៃ បានគូសបញ្ជាក់ ទំនងទំនាក់ពាណិជ្ជកម្ម និងការដឹកជញ្ជូនទំនិញឆ្លងព្រំដែនទៅវិញទៅមក នៅតែបន្តធា្លក់ចុះ ដោយសារតែវិបត្តិមេរោគនេះ ដែលបានធ្វើឲ្យ ថៃ បិទច្រកព្រំដែនអស់ ៦៩កន្លែង ក្នុងចំណោមច្រកទាំងអស់ ៩៧កន្លែង។
ទោះយ៉ាងណាក៏ដោយ ថៃ រំពឹងថា ស្ថានការណ៍នឹងប្រសើរឡើងវិញ នៅឆមាសទី ២នេះ ដោយប្រទេសជិតខាង នៅតែមានតម្រូវការប្រើប្រាស់លើ មុខទំនិញថៃ។
គួររំឭកបន្តិចដែរថា ស្ថានឯកអគ្គរាជទូតកម្ពុជា ប្រចាំនៅប្រទេសថៃ ធ្លាប់បានប្រកាសឲ្យដឹងថា កាលពីពេលថ្មីៗនេះ កម្ពុជា និងថៃ បានពិភាក្សាអំពី លទ្ធភាពនៃការបើកច្រកព្រំដែនឡើងវិញ ដើម្បីជំរុញលំហូរទេសចរ និងស្តារនូវចរន្តសេដ្ឋកិច្ចនៃប្រទេសទាំងពីរឡើងវិញ ប៉ុន្តែមកដល់ពេលនេះ ពុំទាន់មានព័ត៌មានជាផ្លូវការណាមួយ អំពីការចាប់ផ្តើមបើកច្រកព្រំដែនឡើងវិញនោះទេ៕
