ផលិតផលក្នុងស្រុកសរុប (GDP) របស់នូវែលហ្សេឡង់ បានធ្លាក់ចុះដូចការរំពឹងទុករបស់អ្នកវិភាគ គឺរួញ ០.១% នៅក្នុងត្រីមាសទី១ ពីខែមករាដល់ខែមីនា។ អត្រាប៉ុណ្ណោះគឺទាបជាងការព្យាកររបស់ធនាគារកណ្តាលប្រទេសនេះដែលថា វាមានកំណើន ០.៣%។ លើសពីនេះទៀត ផលិតផល GDP ក្នុងត្រីមាសទី៤ឆ្នាំមុន ត្រូវបានកែសម្រួលពីការធ្លាក់ចុះ ០,៦% ទៅជាការធ្លាក់ចុះ ០,៧% វិញ។
ប្រាក់ដុល្លារនូវែលហ្សេឡង់បានធ្លាក់ចុះ ០,២% ធ្វើឱ្យតម្លៃ១ដុល្លារនូវែលហ្សេឡង់ ដូរបានប្រែល ០,៦២ ដុល្លារអាមេរិក ក្រោយពីមានទិន្នន័យស្ដីពីការធ្លាក់ចុះសេដ្ឋកិច្ចនេះ។ និន្នាការនេះគឺស្របនឹងការរំពឹងទុករបស់ទីផ្សារ ហើយធ្វើឱ្យធនាគារកណ្តាលនូវែលហ្សេឡង់យល់ឃើញថាមិនមានតម្រូវការដំឡើងអត្រាការប្រាក់បន្ថែមទៀតទេ។
ទិន្នន័យពីអង្គភាពស្ថិតិនូវែលសេឡង់បានបង្ហាញថា ឱនភាពសេដ្ឋកិច្ចរបស់នូវែលហ្សេឡង់នេះគឺដោយសារការធ្លាក់ចុះពាក់កណ្ដាលនៃទិន្នផលឧស្សាហកម្មនៅក្នុងប្រទេសនេះ ហើយកំណើនសេដ្ឋកិច្ចបានរងផលប៉ះពាល់ពីឥទ្ធិពលព្យុះស៊ីក្លូនធំៗចំនួន២ និងទឹកជំនន់ភ្លាមៗ នៅទីក្រុងអូកឡេន (Auckland) កាលពីខែមករា និងខែកុម្ភៈ។
លោក ម៉ៃឃែល ហ្គូដន (Michael Gordon) សេដ្ឋកិច្ចវិទូជាន់ខ្ពស់នៅក្រុមហ៊ុន វ៉េស្តផែក (Westpac) បាននិយាយថា វាច្បាស់ណាស់ថាសេដ្ឋកិច្ចនូវែលហ្សេឡង់កំពុងបាត់បង់សន្ទុះ ហើយអ្វីដែលគេចង់ឃើញនោះគឺថា តើអ្វីៗបានធ្លាក់ចុះគ្រប់គ្រាន់ល្មមឱ្យពួកគេវិលទៅរកអតិផរណាទាបនិងមានស្ថិរភាពវិញឬនៅ?
អត្រាមានការងារធ្វើនៅតែមានកម្រិតខ្ពស់នៅឡើយនៅក្នុងប្រទេសនូវែលហ្ស៊េឡង់ ជាហេតុធ្វើឱ្យឱនភាពសេដ្ឋកិច្ចមិនសូវប៉ះពាល់ខ្លាំងចំពោះប្រជាពលរដ្ឋ។ ទោះជាយ៉ាងណាក៏ដោយ ខណៈដែលការធ្លាក់ចុះសេដ្ឋកិច្ចមានលក្ខណៈជាបច្ចេកទេស បន្ទាប់ពីការធ្លាក់ចុះរយៈពេល២ត្រីមាសជាប់ៗគ្នា វាបានក្លាយជាបញ្ហានយោបាយដ៏សំខាន់មួយ ខណៈដែលប្រទេសនេះកំពុងឆ្ពោះទៅរកការបោះឆ្នោតនៅខែតុលា ហើយអ្នកបោះឆ្នោតកំពុងប្រឈមមុខនឹងបន្ទុកជីវភាពកាន់ខ្ពស់ឡើង។
អតិផរណានៅប្រទេសនូវែលសេឡង់កំពុងស្ថិតក្នុងអត្រា ៦.៧% គឺលើសពីកម្រិតគោលដៅដែលធនាគារកណ្តាលបានកំណត់ក្នុងចន្លោះពី ១% ទៅ ៣%។ ក្រុមសេដ្ឋវិទូបាននិយាយថា ការបង្ហាញឱ្យឃើញថាសន្ទុះសេដ្ឋកិច្ចកំពុងធ្លាក់ចុះនេះ គឺស្របតាមការចង់បានរបស់ធនាគារកណ្តាលដែលបាននិយាយថា ខ្លួនកំពុងព្យាយាមបង្កើតឱនភាពសេដ្ឋកិច្ចដើម្បីបញ្ចុះកម្រិតអតិផរណា តាមរយៈការរឹតបន្តឹងគោលនយោបាយដ៏ខ្លាំងក្លាបំផុតមិនធ្លាប់មាន គិតចាប់តាំងពីឆ្នាំ១៩៩៩មក ជាពេលដែលអត្រាការប្រាក់ត្រូវបានបង្កើតឡើង។ ឥឡូវអត្រាការប្រាក់គោលនៅប្រទេសនូវែលហ្ស៊េឡង់គឺ ៥,៥% ដែលជាកម្រិតខ្ពស់បំផុតក្នុងរយៈពេល១៤ឆ្នាំចុងក្រោយនេះ៕
