បើតាមការស្រង់សំដីពីមន្ត្រីដែលបានដឹងអំពីរឿងរ៉ាវនេះបានបញ្ជាក់ថា លោកស្រី Pelosi និងគណៈប្រតិភូរបស់គាត់ នឹងទៅបំពេញទស្សនកិច្ចនៅប្រទេសឥណ្ឌូនេស៊ី ជប៉ុន ម៉ាឡេស៊ី និងសិង្ហបុរី ហើយនឹងទៅកោះហាវ៉ៃ ដែលជាទីស្នាក់ការកណ្តាលនៃយោធាជើងទឹកដ៏ធំរបស់សហរដ្ឋអាមេរិកនៅឥណ្ឌូប៉ាស៊ីហ្វិកផងដែរ។
ទោះជាយ៉ាងណា ខាងអាជ្ញាធរកោះតៃវ៉ាន់វិញបាននិយាយថា ខ្លួនមិនបានទទួលព័ត៌មានជាក់លាក់ណាមួយពាក់ព័ន្ធ អំពីដំណើរទស្សនកិច្ចរបស់ប្រធានរដ្ឋសភាសហរដ្ឋអាមេរិក មកកាន់ទីក្រុងតៃប៉ិនៅឡើយទេ។
លោកឌ្រូ ហាមមីល (Drew Hammill) មន្រ្តីដែលធ្វើការស្និទ្ធជាមួយលោកស្រី Pelosi បាននិយាយថា «អាមេរិកមិនបញ្ជាក់ថា យល់ព្រម ឬបដិសេធនៃការធ្វើដំណើរអន្តរជាតិណាមួយជាមុនទេ ដោយសារតែចង់ការពារសន្តិសុខ និងសុវត្ថិភាព»។
គួររំលឹកថា ពីខែមេសាកន្លងទៅ ដំណើរទស្សនកិច្ចរបស់លោកស្រី Pelosi នេះទៅកោះតៃវ៉ាន់ត្រូវបានពន្យារពេល បន្ទាប់ពីលោកស្រីបានធ្វើតេស្តវិជ្ជមានជំងឺកូវីដ១៩។ ហើយនៅពេលនោះ ចិនបាននិយាយថា ដំណើរទស្សនៈកិច្ចនេះ នឹងធ្វើឲ្យប៉ះពាល់យ៉ាងធ្ងន់ធ្ងរដល់ទំនាក់ទំនងចិន-អាមេរិក។
ថ្លែងនៅក្នុងទីក្រុងប៉េកាំង អ្នកនាំពាក្យក្រសួងការបរទេសចិន លោកចៅ លីចៀន (Zhao Lijian) បានសង្កត់ធ្ងន់ៗថា ដំណើរទស្សនកិច្ចណាមួយរបស់លោកស្រីប្រធានសភាអាមេរិក Pelosi នឹង «ធ្វើឱ្យប្រេះស្រាំអធិបតេយ្យភាព និងបូរណភាពទឹកដីរបស់ចិនយ៉ាងធ្ងន់ធ្ងរ»។
អត្ថបទគួរអាន
លោកបានបន្តយ៉ាងដូច្នេះថា «ប្រសិនបើភាគីអាមេរិកនៅតែប្រកាន់ខ្ជាប់នូវគោលជំហរបែបនេះ ប្រទេសចិននឹងចាត់វិធានការទាំងបង្ខំ ដើម្បីការពារអធិបតេយ្យភាពជាតិ និងបូរណភាពទឹកដីរបស់ខ្លួនយ៉ាងម៉ឺងម៉ាត់ ហើយសហរដ្ឋអាមេរិកត្រូវតែទទួលខុសត្រូវទាំងស្រុងចំពោះផលវិបាកទាំងអស់ដែលខ្លួនបង្កឡើង»។
ទោះបីបែបនេះក្តី អ្នកនាំពាក្យក្រុមប្រឹក្សាសន្តិសុខជាតិអាមេរិកម្នាក់មិនបានធ្វើសេចក្តីអត្ថាធិប្បាយលើរឿងនេះទេ ដោយគ្រាន់តែរំលឹកឡើងវិញថា «សហរដ្ឋអាមេរិកនៅតែប្តេជ្ញាចិត្តគោរពចំពោះគោលនយោបាយចិនតែមួយ»។
ពាក់ព័ន្ធនឹងទំនាក់ទំនងសែនតានតឹងរវាងអាមេរិក និងចិន ជុំវិញសំណុំរឿងកោះតៃវ៉ាន់នេះដែរ កាលពីថ្ងៃ១៩ ខែកក្កដា កងនាវាចរទី ៧ របស់កងទ័ពជើងទឹកសហរដ្ឋអាមេរិក បាននិយាយថា នាវាពិឃាតប្រភេទយូអេសអេស បេនហ្វូលដ៍ (Arleigh Burke-class USS Benfol) បានធ្វើការឆ្លងកាត់ច្រកសមុទ្រតៃវ៉ាន់ជាប្រចាំ ដោយបានហៅ «ច្រកសមុទ្រនេះជាដែនទឹកអន្តរជាតិ ហើយធ្វើដំណើររបស់ខ្លួនស្របតាមច្បាប់អន្តរជាតិទាំងស្រុង»។
ជាការឆ្លើយតប ទីបញ្ជាការកងទ័ពរំដោះប្រជាជនចិនភាគខាងកើត បាននិយាយនៅក្នុងសេចក្តីថ្លែងការណ៍របស់ខ្លួនមួយថា៖ «ទង្វើបង្កហេតុជាញឹកញាប់ដោយសហរដ្ឋអាមេរិកនេះបានបង្ហាញយ៉ាងច្បាស់ថា សហរដ្ឋអាមេរិក គឺកំពុងបំផ្លាញសន្តិភាព និងស្ថិរភាពនៅក្នុងច្រកសមុទ្រតៃវ៉ាន់ និងជាអ្នកបង្កើតហានិភ័យក្នុងតំបន់តែម្តង»។
មួយវិញទៀត កាលពីថ្ងៃទី១៨កក្កដា ប្រទេសចិនបានស្នើឱ្យសហរដ្ឋអាមេរិកលុបចោលជាបន្ទាន់នូវការលក់ជំនួយបច្ចេកទេសយោធាដ៏ធំរបស់ខ្លួន ដល់កោះតៃវ៉ាន់ដែលមានតម្លៃប្រមាណ ១០៨ លានដុល្លារ ក្រោយពីមានការយល់ព្រមដោយក្រសួងការបរទេសសហរដ្ឋអាមេរិក។
មែនទែនទៅ កោះតៃវ៉ាន់បានសម្តែងការពេញចិត្តយ៉ាងខ្លាំង ចំពោះការបន្តគាំទ្រដោយរដ្ឋបាលរបស់ប្រធានាធិបតីសហរដ្ឋអាមេរិកលោក Joe Biden ទាំងផ្នែកយោធា និងសេដ្ឋកិច្ចជាដើម ហើយលោកបៃដិនតែងនិយាយម្តងហើយម្តងទៀតថា «ការប្តេជ្ញាចិត្តរបស់ទីក្រុងវ៉ាស៊ីនតោនទៅលើទីក្រុងតៃប៉ិក គឺរឹងមាំដូចថ្ម»ដូច្នេះដែរ៕
