អ្នកជំនាញអចលនវត្ថុដ៏មានបទពិសោធន៍យូរឆ្នាំ គឺលោក ឧកញ៉ា ចេង ខេង អគ្គនាយកក្រុមហ៊ុន ស៊ីភីអែល (CPL) បានបញ្ជាក់អំពីមូលហេតុមួយចំនួនដែលគេអាចយកមកពិចារណា ដើម្បីធ្វើការវិនិយោគក្នុងកាលៈទេសៈនេះ។
១. តម្លៃ៖ បច្ចុប្បន្ន ដោយសារតែមានការព្រួយបារម្ភជុំវិញជំងឺកូវីដ-១៩ និងបញ្ហាសេដ្ឋកិច្ចដែលធ្លាក់ចុះដោយសារជំងឺនេះ ធ្វើឲ្យអ្នកទិញអចលនវត្ថុពុំសូវមានច្រើនទេ ប៉ុន្តែអ្នកលក់មានចំនួនច្រើន ដែលជាកត្តាមួយអាចធ្វើឲ្យតម្លៃទាប។ ប្រសិន បើយើងរង់ចាំរហូតដល់ពេលដែលសេដ្ឋកិច្ចងើបស្ទុះឡើងវិញ ហើយជំងឺរាតត្បាតក៏បានរសាត់ផុតទៅ នោះតម្លៃរបស់ អចលនវត្ថុ ក៏នឹងកើនឡើងមកវិញ និងកើនឡើងលើសពីមុនដែរ។ តម្លៃនៅពេលនេះ ជាតម្លៃល្អ ហើយលោកអ្នកអាចសំឡឹង មើលលើការផ្សព្វផ្សាយ ឬព័ត៌មាននានាពីភ្នាក់ងារអចលនវត្ថុ ដែលអ្នកទុកចិត្ត ឬពីបណ្ដាញរបស់អ្នក។
២. អត្រាចំណេញ៖ ពុំមានវិស័យណាដែលផ្ដល់អត្រាចំណេញបានរហូតដល់ទៅ ៨ ទៅ ១០% ដូចវិស័យអចលនវត្ថុ ទេក្នុងពេលសព្វថ្ងៃនេះ។ អ្នកអាចចាប់ផ្ដើមការវិនិយោគ ដោយពិនិត្យពិច្ច័យលើអចលនវត្ថុដែលល្អ ហើយមានសុវត្ថិភាព សម្រាប់ការវិនិយោគ។
៣. តម្រូវការទីលំនៅ៖ អចលនវត្ថុជាប្រភេទលំនៅដ្ឋាននៅតែមានតម្រូវការគ្រប់ពេល ។ មិនថាជាពេលមានវិបត្តិ ឬជាពេលមានរោគរាតត្បាត ឬនៅពេលធម្មតានោះទេ មនុស្សនៅតែត្រូវការទីលំនៅសម្រាប់ជ្រកកោន។ ដូច្នេះ តម្រូវការនៃការទិញ និងការជួល នៅតែមានដដែល ដែលធ្វើឲ្យវិស័យអចលនវត្ថុអាចទទួលរងផលប៉ះពាល់តិចតួចជាងវិស័យ ផ្សេងៗ។ ទន្ទឹមនឹងនេះ អលនវត្ថុដែលជួលរយៈពេលវែង ជួយឲ្យលោកអ្នកអាចរកប្រាក់ចំណូលស្ថិតស្ថេរថែមទៀតផង។
អត្ថបទទាក់ទង
៤. តាមមើលអ្នកវិនិយោគជំនាញដែលមានបទពិសោធន៍៖ អ្នកវិនិយោគចាស់វស្សានានានៅតាមបណ្ដាប្រទេសជាច្រើន នៅតែបន្តបោះទុនទៅក្នុងវិស័យអចលនវត្ថុ បើទោះបីជាមានស្ថានភាពដូចជាជំងឺកូវីដ-១៩ នេះក្ដី។ ពួកគេមានជំនឿថា ក្រោយពេលជំងឺរាតត្បាតនេះកន្លងផុត វិស័យអចលនវត្ថុនឹងងើបឡើងមកវិញដែរ។
៥. វិស័យអចលនវត្ថុនៅមានការលូតលាស់ខ្លាំងទៅថ្ងៃអនាគត៖ វិស័យអចលនវត្ថុនៅកម្ពុជា នៅមានភាពក្មេងខ្ចីនៅឡើយ បើធៀបនឹងបណ្ដាប្រទេសផ្សេងៗ ដូច្នេះឱកាសនៃការទទួលបានផលចំណេញ នៅមានកម្រិតខ្ពស់។ ដូច្នេះមិនថាពេលវេលាណា នោះទេ ការវិនិយោគលើអចលនវត្ថុ នៅតែមានសក្ដានុពលដដែល។
លោក ឧកញ៉ា ចេង ខេង បានឲ្យដឹងថា ដោយយោងទៅលើហេតុផលខាងលើ ដូច្នេះ ពេលវេលានេះជាពេលដ៏ល្អប្រពៃក្នុងការទិញអចលនវត្ថុ សម្រាប់អ្នកដែលមានទុនដើម្បីធ្វើការវិនិយោគ ទាំងទុកជួល និងទុកលក់នៅពេលដែលតម្លៃអចលនវត្ថុ និងស្ថានភាពសេដ្ឋកិច្ចងាកមករកប្រកតីភាពឡើងវិញ ។
លោកឧកញ៉ា បានបន្ថែមថា៖ “ជាដំបូន្មានពីយើងខ្ញុំជាអ្នកជំនាញក្នុងវិស័យអចលនវត្ថុ គឺលោកអ្នកមិនគួររង់ចាំយូរ នោះទេ ប៉ុន្តែគួរតែឆក់យកឱកាសនេះឲ្យបាន ពីព្រោះមិនយូរមិនឆាប់ ឱកាសនេះក៏នឹងកន្លងផុតទៅវិញដែរ។ ទោះជាយ៉ាងណា ការវិនិយោគ គួរមានការប្រុងប្រយ័ត្ន ហើយគួរសហការជាមួយនឹងអ្នកជំនាញដើម្បីទទួលបានអត្ថប្រយោជន៍ផង និងសុវត្ថិភាព នៃការវិនិយោគផង”។
None
