ការផ្គើនបាញ់សាកល្បងអាវុធមីស៊ីលជាថ្មីពីសំណាក់ទីក្រុងព្យុងយ៉ាងនេះ ធ្វើឡើងនៅមិនបានប៉ុន្មានថ្ងៃផងបន្ទាប់ពីការបាញ់សាកល្បងលើកទី៣ និងនៅបន្ទាប់ពីសហរដ្ឋអាមេរិកបានដាក់ទណ្ឌបន្ថែមមកលើមន្ត្រីដែលពាក់ព័ន្ធដល់កម្មវិធីអាវុធ នុយក្លេអ៊ែរកូរ៉េខាងជើង។
រដ្ឋាភិបាលជប៉ុននៅព្រឹកថ្ងៃច័ន្ទនេះបានរាយការណ៍ពីការបាះញ់សាកល្បងមីស៊ីលកូរ៉េខាងជើងចំនួន២គ្រាប់ទៀត ចេញពីតំបន់អាកាសយាន្តដ្ឋានមួយ នៃរដ្ឋធានីព្យុងយ៉ាង។ នេះបើតាមទីភ្នាក់ងារសារព័ត៌មានរ៉យទ័រ។ អ្នកជំនាញជប៉ុន កំណត់បានថាមីស៊ីលដែលកូរ៉េខាងជើងបាញ់សាកល្បងលើកនេះ ជាមីស៊ីលរយៈចំងាយជិត។ យ៉ាងណាក៏ដោយចុះ មន្ត្រីជាន់ខ្ពស់ក្រុងតូក្យូ បានចាត់ទុកការបាញ់បង្ហោះ ម្តងហើយម្តងទៀតនេះថា ជាការគំរាមកំហែងដល់សន្តិសុខនៅក្នុងតំបន់។
បើតាមទីភ្នាក់ងារសារព័ត៌មានបារាំង AFP ឯណេះវិញ កូរ៉េខាងត្បូងក៏បានរាយការណ៍ស្រដៀងគ្នានេះដែរ ពីការសាកល្បងមីស៊ីលកូរ៉េខាងជើង។ យ៉ាងណាមិញ យោធាកូរ៉េខាងត្បូង គ្រាន់តែអាចកំណត់ពីការបាញ់សាកល្បង តែមិនទាន់អាចកំណត់ពីប្រភេទមីស៊ីលបាននៅឡើយ ហើយគេគ្រាន់តែបានដឹងថា ការបាញ់នេះ គឺធ្លាក់ទៅមហាសមុទ្រនៅឆ្នេរសមុទ្រភាគខាងកើតរបស់កូរ៉េខាងជើង។
អត្ថបទគួរអាន
មិនមានការបញ្ជាក់ជាផ្លូវការណាមួយនៅឡើយទេពីភាគីកូរ៉េខាងជើង ចំពោះការបាញ់សាកល្បងលើកនេះ។ យ៉ាងណាមិញ ក្រសួងការបរទេសកូរ៉េខាងជើង តាមរយៈសារព័ត៌មានរដ្ឋ KCNA បានអះអាងថា ការបាញ់សាកល្បងមីស៊ីល នាប៉ុន្មានសប្តាហ៍ចុងក្រោយនេះ គឺជាការអភិវឌ្ឍន៍អាវុធប្រភេទថ្មី ហើយគ្រាន់តែជាផ្នែកមួយនៃកិច្ចខិតខំប្រឹងប្រែងរបស់ខ្លួន ដើម្បីធ្វើទំនើបកម្មសមត្ថភាពការពារជាតិតែប៉ុណ្ណោះ។ ទីក្រុងព្យុងយ៉ាង មិនបានកំណត់គោលដៅទៅលើប្រទេសជាក់លាក់ណាមួយ ឬចង់ធ្វើឲ្យប៉ះពាល់ដល់សន្តិសុខរបស់ប្រទេសជិតខាងឡើយ។
គួររំឭកថា កាលពីសប្តាហ៍មុន សហអាមេរិកបានដាក់ទណ្ឌកម្មលើកម្មវិធីអាវុធនុយក្លែអ៊ែរបស់កូរ៉េខាងជើង ដោយទណ្ឌកម្មនោះ គឺបានកំណត់គោលដៅលើជនជាតិកូរ៉េខាងជើងចំនួន៦នាក់ ជនជាតិរុស្ស៊ីម្នាក់ និងក្រុមហ៊ុនរុស្ស៊ីមួយផងដែរ។ ទីក្រុងវ៉ាស៊ិនតោន និយាយថា ពួកគេទាំងនេះ គឺជាអ្នកទទួលខុសត្រូវក្នុងការទិញទំនិញពីប្រទេសរុស្ស៊ី និងចិនសម្រាប់ប្រើប្រាស់ក្នុងកម្មវិធីផលិតអាវុធនុយក្លែអ៊ែរបស់កូរ៉េខាងជើង។
សូមជម្រាបថា ការបាញ់សាកល្បងក្បាលគ្រាប់មីស៊ីលទាំង៤ដង របស់កូរ៉េខាងជើងនៅដើមឆ្នាំ២០២២ រួមបញ្ចូលនូវមីស៊ីលច្រើនប្រភេទផ្សេងៗគ្នា ក្នុងនោះរួមមាន មីស៊ីលដែលមានល្បឿនលឿនជាងសម្លេង មីស៊ីលរយៈចំងាយឆ្ងាយ និងចំងាយជិត បូករួមនឹងមីស៊ីលដែលមានសមត្ថភាពអាចបាញ់ចេញពីទូររថភ្លើងផងដែរ៕
None
