អ្នកស្រាវជ្រាវដ៏លេចធ្លោម្នាក់របស់ចិនបាននិយាយថា ការពង្រឹងទំនាក់ទំនងរុស្ស៊ី និងកូរ៉េខាងជើងនេះនឹងបង្កើនការប្រឈមមុខដាក់គ្នារវាងប្លុកនិងប្លុកនៅអាស៊ីបូព៌ា។ នេះបើតាមការចុះផ្សាយដោយសារព័ត៌មាន South China Morning Post។
ការផ្គត់ផ្គង់គ្រាប់រំសេវពីសំណាក់ទីក្រុងព្យុងយ៉ាងទៅឱ្យរុស្ស៊ី ប្រៀងបីដូចជាសម្ព័ន្ធភាពសង្រ្គាមត្រជាក់ថ្មី ដែលប្រជែងជាមួយសម្ព័ន្ធភាពរវាងសហរដ្ឋអាមេរិក ជប៉ុន និងកូរ៉េខាងត្បូង ក្នុងតំបន់អាស៊ីប៉ាស៊ីហ្វិក។ នេះបើយោងតាមអ្នកស្រាវជ្រាវនៅវិទ្យាស្ថានទំនាក់ទំនងអន្តរជាតិសហសម័យចិន (CICIR) ដែលមានមូលដ្ឋាននៅទីក្រុងប៉េកាំង។ លោក Chen Xiangyang ប្រធានកម្មវិធីឧបទ្វីបកូរ៉េនៅ CICIR បានសរសេរនៅក្នុងអត្ថបទមួយថា ការពង្រឹងទំនាក់ទំនងទ្វេភាគីរុស្ស៊ី-កូរ៉េខាងជើងនឹងផ្តល់ផលជះដ៏ខ្លាំងលើស្ថានការតំបន់ និងអន្តរជាតិ»។
បើតាមអ្នកស្រាវជ្រាវរូបនេះ «អាស៊ីបូព៌ានឹងត្រូវក្លាយជាទីតាំងប្រឈមមុនដាក់គ្នារវាង«សម្ព័ន្ធភាពយោធាមិនផ្លូវការ»ដែលម្ខាងមានរុស្ស៊ីនិងកូរ៉េខាងជើង និងម្ខាងទៀតគឺសហរដ្ឋអាមេរិក ជប៉ុន និងកូរ៉េខាងត្បូង។ ស្ថានការនោះនឹងមិនងាយស្រួលជៀសរួចឡើយ។ បន្ថែមពីនេះ វារឹងតែពិបាកក្នុងការបំបាត់ការសាយភាយអាវុធនុយក្លេអ៊ែរនៅឧបទ្វីបកូរ៉េ និងកសាងសន្តិសុខ និងសន្តិភាពនៅក្នុងតំបន់នេះ។
អត្ថបទគួរអាន
កាលពីព្រឹកថ្ងៃពុធ ប៉ុន្មានម៉ោងមុនលោក គីម ជុងអ៊ុន ជួបលោក ពូទីន នៅមជ្ឈមណ្ឌលអវកាស Vostochny Cosmodrome កូរ៉េខាងជើងបានបាញ់មីស៊ីលរយៈចម្ងាយខ្លីពីរគ្រាប់ទម្លាក់ចូលសមុទ្រ។ ក្នុងជំនួបនោះ គេកត់សម្គាល់ឃើញថា លោក គីម ជុងអ៊ុន បានប្រាប់លោក ពូ ទីន ថាទំនាក់ទំនងប្រទេសទាំងពីរគឺជាអទិភាព។ លោក គីម បានសង្កត់ធ្ងន់ថា ព្យុងយ៉ាងនឹងគាំទ្ររាល់ការសម្រេចចិត្តទាំងអស់របស់រុស្ស៊ីនៅសង្គ្រាមនៅអ៊ុយក្រែន ដែលជាការប្រយុទ្ធ ដើម្បីអធិបតេយ្យភាព និងសន្តិសុខ។
ក្នុងកិច្ចប្រជុំនោះ បើទោះបីគ្មានការប្រកាសពីការផ្តល់សព្វាវុធណាមួយទៅឱ្យរុស្ស៊ីមែន ក៏ប៉ុន្តែវាមិនបានដកការសង្ស័យពីបច្ចឹមលោកឡើយ។ សហរដ្ឋអាមេរិកបានព្រមាននឹងដាក់ទណ្ឌកម្មបន្ថែមទៀតលើប្រទេសទាំងពីរ បើការផ្គត់ផ្គង់អាវុធណាមួយកើតឡើងមែន។ ក្រោយការបើកប្រទេសឡើងវិញ កូរ៉េខាងជើងបានចាប់ផ្តើមចូលរួមជាមួយប៉េកាំង និងម៉ូស្គូយ៉ាងសកម្មពិសេសយោធា និងការទូត។ កាលពីខែកក្កដា សារព័ត៌មាន Yonhap បានរាយការណ៍ថា រដ្ឋមន្ត្រីការពារជាតិរុស្ស៊ីលោក Sergei Shoigu បានស្នើទៅកាន់ទីក្រុងព្យុងយ៉ាង និងប៉េកាំងឱ្យមានសមយុទ្ធជើងទឹកត្រីភាគី។ ខណៈដែលកូរ៉េខាងជើងបានយល់ព្រម ចិនវិញមិនទាន់ឆ្លើយតបចំពោះសំណើរនេះនៅឡើយទេ។
