តម្លៃប្រេងបានធ្លាក់ចុះ៣% ចំពេលការដឹកជញ្ជូននៅសមុទ្រក្រហមមានភាពធូរស្បើយ

សន្ទស្សន៍ប្រេងឆៅនាពេលអនាគតរបស់ទីផ្សារអង់គ្លេស Brent សម្រាប់ខែមីនាឆ្នាំក្រោយបានបង្ហាញពីការធ្លាក់ចុះជាង២ដុល្លារ ឬស្មើនឹង៣% មកនៅត្រឹមតម្លៃជាង៧៧ដុល្លារក្នុងមួយធុងបារ៉ែល ប៉ុន្តែតម្លៃប្រេងឆៅសម្រាប់ខែកុម្ភៈ វិញ គឺបានធ្លាក់ចុះជាង១%ប៉ុណ្ណោះ មកនៅត្រឹមតម្លៃជាង៧៨ដុល្លារក្នុងមួយធុងបារ៉ែល។

ចំណែកសន្ទស្សន៍តម្លៃប្រេងឆៅនាពេលអនាគតរបស់ទីផ្សារប្រេងអាម៉េរិក West Texas Intermediate វិញបានធ្លាក់ចុះជាង២ដុល្លារ ឬស្មើនឹងជាង៣% មកនៅត្រឹមជាង៧១ដុល្លារក្នុងមួយធុងបារ៉ែល។ កាលពីថ្ងៃពុធ ទី២៧ ខែធ្នូ តម្លៃប្រេងឆៅបានធ្លាក់ចុះជិត២% ខណៈដែលក្រុមហ៊ុនដឹកជញ្ជូនធំៗបានចាប់ផ្តើម​ត្រឡប់ទៅដឹកជញ្ជូនតាមច្រកសមុទ្រក្រហមឡើងវិញ។

ក្រុមហ៊ុនដឹកជញ្ជូន មែក(Maersk) របស់ប្រទេសដាណឺម៉ាកនឹងបញ្ជូនកប៉ាល់កុងតឺន័ររបស់ខ្លួនស្ទើរតែទាំងអស់ដែលដឹកទំនិញរវាងអាស៊ី និងអឺរ៉ុប ត្រូវឆ្លងកាត់តាមព្រែកជីកស៊ុយអេ ចាប់ពីពេលនេះទៅដោយបើកវាងតែនាវាមួយចំនួនតូចប៉ុណ្ណោះ ដែលត្រូវធ្វើដំណើរទៅទ្វីបអាហ្រ្វិក។ នេះបើតាមកាលវិភាគរបស់ក្រុមហ៊ុន។

ចំណែកក្រុមហ៊ុនដឹកជញ្ជូនរបស់បារាំង គឺក្រុមហ៊ុន CMA CGM វិញក៏កំពុងតែបង្កើនចំនួននាវាដែលធ្វើដំណើរឆ្លងកាត់ព្រែកជីកស៊ុយអេ របស់អេហ្ស៊ីបផងដែរ។ នេះបើតាមរបាយការណ៍របស់ក្រុមហ៊ុននេះបានឱ្យដឹងកាលពីដើមសប្តាហ៍នេះ។

លោក ហ្វីល ភ្លីន (Phil Flynn) អ្នកវិភាគរបស់ក្រុមហ៊ុន Price Futures Group យល់ឃើញថា ផ្លូវសមុទ្រក្រហមកំពុងតែបើកឡើងវិញហើយ ហើយវានឹងនាំការផ្គត់ផ្គង់ទៅកាន់ទីផ្សារកាន់តែលឿន។

សូមរំលឹកថា កាលពីដើមខែធ្នូ នេះ ក្រុមហ៊ុនដឹកជញ្ជូនធំៗជាច្រើនបានចាប់ផ្ដើមឈប់ប្រើប្រាស់ផ្លូវដឹកជញ្ជូនតាមសមុទ្រក្រហម និងព្រែកជីកស៊ុយអេ បន្ទាប់ពីក្រុមសកម្មប្រយុទ្ធហ៊ូធី មានមូលដ្ឋាននៅប្រទេសយេម៉ែន បានចាប់ផ្តើមកំណត់គោលដៅវាយប្រហារទៅលើកប៉ាល់ដឹកជញ្ជូន ដែលមានទំនាក់ទំនងនឹងប្រទេសអ៊ីស្រាអែល៕

អត្ថបទ៖ សុខ ជា