តម្លៃប្រេងលើទីផ្សារអន្តរជាតិ ធ្លាក់ចុះដល់កម្រិតទាបបំផុតមិនធ្លាប់មាន ក្រោយចិនដំឡើងពន្ធលើទំនិញអាម៉េរិក

មហាយក្សចិន ដែលជាប្រទេសនាំចូលប្រេងធំបំផុតរបស់ពិភពលោកបានប្រកាសថា ខ្លួននឹងដាក់ពន្ធបន្ថែម៣៤% លើទំនិញទាំងអស់របស់សហរដ្ឋអាម៉េរិក ចាប់ពីថ្ងៃទី១០ ខែមេសា។ ប្រទេសនានាជុំវិញពិភពលោកបានត្រៀមលក្ខណៈសងសឹករួចជាស្រេច បន្ទាប់ពីលោក ដូណាល់ ត្រាំ បានដំឡើងពន្ធដល់កម្រិតខ្ពស់បំផុតមិនធ្លាប់មានក្នុងរយៈពេលជាងមួយសតវត្សរ៍មកនេះ។

ទំនិញសំខាន់ៗរួមមានឧស្ម័នធម្មជាតិ សណ្តែកសៀង និងមាស ក៏បានធ្លាក់ថ្លៃយ៉ាងខ្លាំងដែរ ខណៈដែលផ្សារហ៊ុនទូទាំងពិភពលោកបានដ៏សំយុងក្បាលចុះ។ ធនាគារវិនិយោគខ្នាតយក្សរបស់សហរដ្ឋអាម៉េរិក JPMorgan បានអះអាងថា ពេលនេះ ខ្លួនប្រមើលឃើញឱកាស៦០% ដែលសេដ្ឋកិច្ចពិភពលោកអាចនឹងធ្លាក់ចូលក្នុងវិបត្តិនៅត្រឹមដំណាច់ឆ្នាំ២០២៥ នេះ ដោយកើនឡើងពីការព្យាករមុននេះ៤០%។

ទន្ទឹមនេះសន្ទស្សន៍ផ្សារប្រេងពិភពលោកបានធ្លាក់ថ្លៃ៤,៥៦ដុល្លារ មកនៅត្រឹម៦៥,៥៨ដុល្លារ ក្នុងមួយបារ៉ែល ខណៈដែលទីផ្សារប្រេងអាម៉េរិក បានធ្លាក់ថ្លៃ៤,៩៦ដុល្លារ មកនៅត្រឹម៦១,៩៩ដុល្លារ ដល់កម្រិតទាបបំផុតមិនធ្លាប់មានក្នុងរយៈពេលជិត៤ឆ្នាំមកនេះ។

ប្រធានធនាគារកណ្តាលអាម៉េរិក លោក ជើរ៉ូម ផៅវែល (Jerome Powell) បាននិយាយថា ពន្ធថ្មីរបស់លោក ដូណាល់ ត្រាំ គឺមានវិសាលភាពធំជាងការរំពឹងទុក ហើយផលប៉ះពាល់សេដ្ឋកិច្ច ក៏ទំនងជាមានវិសាលភាពធំធេងជាងការរំពឹងទុកដែរ។ លោកបានព្រមានថា ស្ថានភាពនេះអាចនឹងបង្ខំឱ្យធនាគារកណ្តាលអាម៉េរិក ឈានដល់ការចេញសេចក្ដីសម្រេចដ៏ពិបាក៕

ដោយ: តែម សុខុម