នៅក្នុងកិច្ចប្រជុំគណៈកម្មាធិការថ្នាក់កំពូលនៃ អង្គការប្រទេសនាំចេញប្រេង OPEC ដែលរួមមានទាំងប្រទេសជាសមាជិក និងមិនមែនសមាជិក កំពុងតែមមាញឹក ចំពោះការសម្រេចកាត់បន្ថយផលិតកម្មប្រេងឆៅ ដើម្បីរក្សាស្ថិរភាពថ្លៃប្រេង ឲ្យបាននឹងនរ នៅក្នុងទីផ្សារដ៏ផុយស្រួយ នាពេលបច្ចុប្បន្ន។
លោក ខាលីដ អាល់ហ្វាលីស រដ្ឋមន្រ្តីក្រសួងប្រេង ប្រទេសអារ៉ាប៊ីសាអ៊ូឌីត ដែលជាប្រទេសផ្គត់ផ្គង់ប្រេងឆៅឈានមុខគេក្នុងពិភពលោក បានឲ្យដឹងថា ទាំងសមាជិកអង្គការ OPEC និងប្រទេសផលិតប្រេងធំៗជាច្រើនទៀត ធ្លាប់បានយល់ព្រម កាត់បន្ថយការផ្គត់ផ្គង់ប្រេងឆៅ ប្រមាណ ១លាន ២សែនបារ៉ែលក្នុងមួយថ្ងៃ ចំនួន ៦ខែពេញ ចាប់ពីដើមឆ្នាំ ២០១៩មក ហើយអាចនឹងមានការប្រែប្រួលនៅ ឆមាសទី ២ខាងមុខនេះ។
អត្ថបទទាក់ទង!
លោក បានពន្យល់ថា ទីផ្សារប្រេង នៅលើពិភពលោក នាពេលបច្ចុប្បន្ន គឺលំបាកគ្រប់គ្រងណាស់ ងាយនឹងប៉ះទង្គិច ហើយគ្រប់គ្នាក៏សម្រេច កាត់បន្ថយផលិតកម្ម ក្នុងរយៈពេលមួយ ដែលមានការផ្គត់ផ្គង់ប្រេងច្រើនជាងតម្រូវការ។
យ៉ាងណាមិញ កិច្ចប្រជុំគណៈកម្មាធិការថ្នាក់កំពូលនៃ អង្គការ OPEC នឹងធ្វើឡើងជាថ្មីម្តងទៀត នៅដើមខែមិថុនា ខាងមុខនេះ ដើម្បីស្វែងរក ដំណោះស្រាយ ដ៏ល្អបំផុត សម្រាប់បញ្ហានេះ។
លោក ខាលីដ បញ្ជាក់ដែរថា តម្រូវការប្រេងឆៅ នៅតំបន់អាស៊ី មានការកើនឡើង ខណៈដែល តម្រូវការប្រេងឆៅរបស់ អាមេរិក បានធ្លាក់ចុះ ហើយតម្លៃប្រេង មិននឹងនរ ក៏ដោយសារតែ គ្មាននរណាដឹងពី ផលិតកម្ម និងការនាំចេញប្រេងឆៅរបស់ ប្រទេសអ៊ឺរ៉ង់ ដែលកំពុងស្ថិតក្រោមគំនាបសង្កត់ពី អាមេរិក។
ទោះបីជាយ៉ាងណាក៏ដោយ សហរដ្ឋអាមេរិក ដែលមិនមែនជាសមាជិក អង្គការ OPEC តែជាដៃគូជិតស្និទ្ធជាមួយនឹង ប្រទេសអារ៉ាប៊ីសាអ៊ូឌីត ចង់ឲ្យប្រទេសផលិតប្រេងទាំងនោះ បង្កើនផលិតកម្មទៅវិញ ដើម្បីទាញតម្លៃប្រេងឲ្យកាន់តែចុះថោក។
ប្រធានាធិបតីអាមេរិក គឺលោក Donald Trump ធ្លាប់បានបង្ហាញភាពជឿជាក់ថា តម្លៃប្រេងឆៅ គួរតែទាបជាងនេះ ធៀបទៅនឹងការផ្គត់ផ្គង់ដែលលើស ហើយលោកសង្ឃឹមថា ប្រទេសអារ៉ាប៊ីសាអ៊ូឌីត និងអង្គការប្រទេសនាំចេញប្រេង OPEC នឹងមិនកាត់បន្ថយផលិតកម្មប្រេងរបស់ខ្លួននោះទេ។
ក្រោយពីកាលើកឡើងរបស់លោក ខាលីដ រដ្ឋមន្ត្រីប្រេងប្រទេសអារ៉ាប់ប៊ីសាអូឌីត ភ្លាមៗនោះតម្លៃប្រេងឆៅនៅលើទីផ្សារបានកើនឡើងវិញ សម្រាប់លក់ និង ចែកចាយក្នុងខែមិថុនា ដូចជាទីផ្សារប្រេង ប្រេន របស់អង់គ្លេស មានតម្លៃ ៧៣,១១ ដុល្លារអាមេរិក ក្នុងមួយបារ៉េល កើនឡើង ៩០សេន ខណៈទីផ្សារប្រេងអាមេរិក វេស មានតម្លៃ ៦៣,៤៧ ដុល្លារក្នុងមួយធុងបារ៉ែល កើនឡើង ៧១សេន៕
None
