តើមានកត្តាអ្វីខ្លះបានជារដ្ឋាភិបាលកម្ពុជា យល់ព្រមធ្វើអាជីវកម្មក្នុងតំបន់រ៉ែប្រេងត្រួតស៊ីគ្នានៅបាតសមុទ្រជាមួយថៃ?

តើគម្រោងធ្វើអាជីវកម្មរួមគ្នានៅតំបន់រ៉ែប្រេងត្រួតស៊ីគ្នានៅបាតសមុទ្រនេះ នឹងផ្ដល់ផលប្រយោជន៍បែបណាខ្លះដល់កម្ពុជា?

ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាអ្នកនាំពាក្យរាជរដ្ឋាភិបាលកម្ពុជា បានប្រាប់ខេមបូណូមីសថា គម្រោងធ្វើអាជីវកម្មរួមគ្នានៅតំបន់បាតសមុទ្ររវាងកម្ពុជា-ថៃ គឺធ្វើឡើងដើម្បីរក្សាសន្តិសុខថាមពល ខណៈពិភពលោកកំពុងជួបបញ្ហាស្មុគស្មាញមិនច្បាស់លាស់លើបញ្ហាថាមពលប្រេង។

តួយ៉ាងបញ្ហាសង្រ្គាមរវាងរុស្ស៊ី-អ៊ុយក្រែន និងបញ្ហាជាសកលនានា បានធ្វើឱ្យពិភពលោកមានភាពច្របូកច្របល់លើរឿងថាមពលប្រេង និងឧស្ម័ន។ កត្តានេះ ត្រូវបានថ្នាក់ដឹកនាំជាន់ខ្ពស់រូបនេះ អះអាងថា គឺជាទស្សនវិស័យវែងឆ្ងាយរបស់ថ្នាក់ដឹកនាំរាជរដ្ឋាភិបាល តាំងពីសម័យសម្ដេចតេជោ ហ៊ុន សែន អតីតនាយករដ្ឋមន្រ្តី រហូតដល់សម័យដឹកនាំរបស់សម្ដេចធិបតី ហ៊ុន ម៉ាណែត ជានាយករដ្ឋមន្រ្តី ដែលតែងតែដើរមុនសភាពការណ៍ និងត្រៀមលក្ខណៈបង្ការទុកជាមុន។

​បើតាមអ្នកនាំពាក្យរាជរដ្ឋាភិបាលរូបនេះ ការជជែកកំណត់ព្រំដែនទឹករវាងកម្ពុជា-ថៃ នឹងត្រូវប្រើពេលវេលាយូរបន្ថែមទៀត ខណៈរឿងនេះជាបញ្ហាស្មុគស្មាញ និងត្រូវពិភាក្សាដោះស្រាយយ៉ាងប្រុងប្រយ័ត្នដោយផ្អែកលើបច្ចេកទេស និងផែនទីជាដើម។ ទន្ទឹមនេះ ឯកឧត្តម ប៉ែន បូណា បានគូសបញ្ជាក់ថា រាជរដ្ឋាភិបាលកម្ពុជា តែងតែយកចិត្តទុកដាក់ដោយមិនឱ្យបាត់បង់ទឹកដីទាំងគោក ទាំងទឹក ទៅលើប្រទេសណាមួយ សូម្បីតែមួយចង្អាម ឬមួយមីលីម៉ែត្រនោះដែរ។

​ក្នុងពិធីបិទសន្និបាតនៅក្រសួងការងារ និងបណ្ដុះបណ្ដាលវិជ្ជាជីវៈ កាលពីថ្ងៃទី៨ ខែកុម្ភៈ ឆ្នាំ២០២៤ សម្តេចនាយករដ្ឋមន្ត្រី ហ៊ុន ម៉ាណែត បានថ្លែងថា កម្ពុជា និងថៃ ឯកភាពគ្នាទាញយកផលប្រយោជន៍លើតំបន់ប្រេង និងឧស្ម័នត្រួតស៊ីគ្នានៅឈូងសមុទ្រ ដែលជាប់គាំងតាំងពី២០ឆ្នាំមុន។ ការឯកភាពគ្នាទាញយកផលប្រយោជន៍លើតំបន់ប្រេងត្រួតស៊ីគ្នានេះ ត្រូវបានថ្នាក់ដឹកនាំកម្ពុជាអះអាងថា គឺដើម្បីធានាដល់សន្តិសុខថាមពល និងប្រយោជន៍ជាតិយូរអង្វែង៕

អត្ថបទ៖ បូ ដូឡា​