គួរអានអត្ថបទទាំងនេះផង !
ប៉ុន្តែបើយើងក្រឡេកទៅមើលប្រទេសជឿនលឿនដែលមានសេដ្ឋកិច្ចលូតលាស់ខ្លាំង ដូចជា អាមេរិក ជាដើម ពលរដ្ឋគេភាគច្រើន នរណាក៏ជាប់បំណុលធនាគារ ឬរដ្ឋ នោះដែរ។
កម្ចីដែលគេខ្ចីគឺប្រើប្រាស់នៅក្នុងការពង្រីកអាជីវកម្ម មុខជំនួញ ក៏ដូចជាការវិនិយោគផ្សេងៗ ក្នុងន័យបង្កើនអាជីវកម្មពួកគេកាន់តែរីកចម្រើនខ្លាំង។
ងាកមកនិយាយពីប្រទេសកម្ពុជា រយៈពេល ៥ឆ្នាំចុងក្រោយនេះវិញ មានប្រជាពលរដ្ឋរាប់លាននាក់ដែលកំពុងតែជាប់ជំពាក់បំណុលធនាគារ និងគ្រឹះស្ថានហិរញ្ញវត្ថុ និងអង្គការចងការប្រាក់ក្រៅប្រព័ន្ធជាច្រើន។ និន្នាការនេះ មើលទៅ ប្រជាពលរដ្ឋខ្មែរទំនងជាលែងខ្លាចខ្មាសគេ ខ្លាចអន់ ដូចទៅនឹងអ្វីដែលពួកគេនឹកគិតឃើញកាលពីមុនទៀតហើយ។
ក្រុមអ្នកជំនាញនៅក្នុងហិរញ្ញវត្ថុបានលើកឡើងថា ដើម្បីដើរឲ្យទាន់ទៅនឹងស្ថានភាពសេដ្ឋកិច្ចក៏ដូចជាការអភិវឌ្ឍប្រទេសដែលកំពុងមានការរីកចម្រើន ប្រជាពលរដ្ឋម្នាក់ៗខិតខំប្រកួតប្រជែងគ្នាទៅលើការរកស៊ី បើកក្រុមអាជីវកម្មថ្មីៗ ពង្រីកក្រុមហ៊ុន និងធ្វើការផ្លាស់ប្តូរជីវិតឲ្យទាន់សម័យស៊ីវិល័យជាដើម។ ទំាងអស់នេះហើយ សុទ្ធតែជារឿងចាំបាច់ ដែលត្រូវការដើមទុន និង កម្ចី ដើម្បីបើកអាជីវកម្ម និង ពង្រីកអាជីវកម្មរបស់ពួកឲ្យកាន់តែមានភាពរឹងមាំ។
ដូច្នេះ ដើម្បីពង្រីកអាជីវកម្ម បើកអាជីវកម្ម ក៏ដូចជាការរៀបចំជីវិតគ្រួសារឲ្យបានសមរម្យ (ទិញផ្ទះ ទិញដី) ពួកគេមិនអាចមើលរំលងធនាគារនិងគ្រឹះស្ថានមីក្រូហិរញ្ញវត្ថុនោះទេ។ ហើយការដែលពលរដ្ឋអាចខ្ចីលុយពីធនាគារ និងគ្រឹះស្ថានមីក្រូហិរញ្ញវត្ថុបាន លុះត្រាតែយើងមានលទ្ធភាពសងត្រឡប់ និងគោរពលក្ខខណ្ឌបានត្រឹមត្រូវ។
ជាក់ស្តែងគិតត្រឹមឆ្នាំ២០១៥ ទំហំប្រាក់កម្ចីនៅគ្រឹះស្ថានធនាគារនិងមីក្រូហិរញ្ញវត្ថុដែលបានផ្តល់ទៅឲ្យពលរដ្ឋនៅកម្ពុជា បានកើនដល់ជាង ១៥ពាន់លានដុល្លារ ដោយមានប្រជាពលរដ្ឋខ្ចីប្រាក់កម្ចី សរុប ២លាន៥សែននាក់។
ទំហំប្រាក់កម្ចីនេះបានកើនដល់ជាង ៨០ភាគរយនៃទំហំសេដ្ឋកិច្ចរបស់កម្ពុជា ផលិតផលក្នុងស្រុកសរុប GDP ដែលមានទឹកប្រាក់ជាង ១៦ពាន់លានដុល្លារអាមេរិកក្នុងឆ្នាំ២០១៥កន្លងមកនេះ។ នេះបើយោងតាមរបាយការណ៍ពីខាងធនាគារជាតិនៃកម្ពុជា គិតត្រឹមដំណាច់ឆ្នាំ២០១៥។
ដោយឡែកក្នុងឆ្នាំ២០១៦ ទ្រព្យសកម្មសរុបនៅក្នុងប្រព័ន្ធធនាគារទំាងអស់បានកើនដល់ជាង២៧ពាន់លានដុល្លារអាមេរិក កើន ១៧ភាគរយ។
ក្នុងនោះ ប្រាក់កម្ចីដែលពលរដ្ឋខ្មែរបានជំពាក់ធនាគារ និង គ្រឹះស្ថានមីក្រូហិរញ្ញវត្ថុមានការកើនឡើងដល់ទៅ ១៧ ពាន់លានដុល្លារអាមេរិក ខណៈប្រាក់បញ្ញើមានកើន ១៥ ពាន់លានដុល្លារ។
ខ្ចីបុលមិនអាក្រក់ទេ ឲ្យតែបម្រើដល់ការពង្រីកអាជីវកម្មឲ្យកាន់តែលូតលាស់
ក្រុមអ្នកជំនាញនៅក្នុងវិស័យហិរញ្ញវត្ថុ បានអះអាងថា ការខ្ចីបុល ឬចងការប្រាក់ពីធនាគារ និងគ្រឹះស្ថានមីក្រូហិរញ្ញវត្ថុ វាមិនបានបង្ហាញពីភាពអន់ថយនៅក្នុងសេដ្ឋកិច្ចជាតិនោះទេ ផ្ទុយទៅវិញវាបានបង្ហាញពីភាពរីកចម្រើននៃប្រទេសជាតិ។
ម្យ៉ាងវិញទៀត ការខ្ចីប្រាក់ពីធនាគារ គ្រឹះស្ថានមីក្រូហិរញ្ញវត្ថុ វាមិនមែនជាការខ្មាសអៀន ឬខ្លាចអន់អីនោះទេ បើយើងចង់អភិវឌ្ឍខ្លួនយើង អាជីវភាពយើងឲ្យមានការរីកចម្រើនយូរអង្វែង យើងត្រូវតែស្វែងរកប្រភពហិរញ្ញវត្ថុ ប្រាក់កម្ចី និងជំនួយ ប៉ុន្តែ ត្រូវចាំថា កម្ចីនោះយកទៅប្រើប្រាស់ចំគោលដៅ។ អ្នកជំនាញសេដ្ឋកិច្ចមួយចំនួនបានយល់ឃើញថា បើមិនមានបំណុល ក៏មិនការរីកចម្រើននោះដែរ។
បើយោងតាម លោក ឧកញ៉ា ហួត អៀង តុង ប្រធានសមាគមគ្រឹះស្ថានមីក្រូហិរញ្ញវត្ថុកម្ពុជា និងអគ្គនាយកគ្រឹះស្ថានមីក្រូហិរញ្ញវត្ថុហត្ថាកសិករបានប្រាប់ឲ្យដឹងថា សន្ទុះនៃការកើនឡើងនៃប្រាក់កម្ចី មិនមែនជារឿងអាក្រក់ទេ ការកើនឡើងឥណទាននេះ វាជារឿងល្អ។ លោកបន្តថា ជារួម លោកមើលឃើញថាតម្រូវការស្វែងរកប្រាក់កម្ចីពីប្រជាពលរដ្ឋមានការកើនខ្លំាងដើម្បីប្រកបអាជីវកម្មផ្សេងៗ។ ហើយនៅពេលដែលសេដ្ឋកិច្ចកាន់តែមានការរីកចម្រើនខ្លាំង ប្រជាជនចាំបាច់ត្រូវការដើមទុនសម្រាប់ប្រកបមុខរបររបស់ខ្លួន។
លោកឧកញ៉ា ហួត អៀងតុង បញ្ជាក់ថា ការដែលកើនឡើងខ្លាំងនៃប្រាក់កម្ចីរបស់ប្រជាពលរដ្ឋទៅប្រកបអាជីវកម្មនេះ វាជួយជំរុញឲ្យមានដំណើរការសេដ្ឋកិច្ចជាតិផងដែរ។
ដូច្នេះ ការដែលខ្ចីលុយពីធនាគារនិងគ្រឹះស្ថានមីក្រូហិរញ្ញវត្ថុ វាមិនមែនធ្វើយើងអន់ ឬខ្មាសគេនោះទេ ប៉ុន្តែ យើងដូរពីការខ្ចីលុយគេ ដើម្បីពង្រីកមុខរបរ អាជីវកម្មរបស់យើងឲ្យកាន់តែមានភាពរីកចម្រើន។ អ្នកជំនាញហិរញ្ញវត្ថុបានអះអាងថា ត្រូវប្រើប្រាស់ប្រាក់កម្ចីពីធនាគារនិងហិរញ្ញវត្ថុ ឲ្យចំគោលដៅ ទើបមិនជួបហានិភ័យ៕
