សារព័ត៌មានអាមេរិក ស៊ីអិនប៊ីស៊ី បានផ្សាយថា ក្រុមហ៊ុនដែលបានបង្កើតវ៉ាក់សាំង Covid-19 ដែលត្រូវបានអនុញ្ញាតឲ្យប្រើមុនគេបង្អស់នៅសហរដ្ឋអាមេរិក ដោយសហការជាមួយក្រុមហ៊ុនផលិតឱសថអាល្លឺម៉ង់ BioNTech កាលពីខែមីនាកន្លងទៅ បានចាប់ផ្តើមការសាកល្បងដំណាក់កាលដំបូងនៃការព្យាបាលប្រឆាំងវីរុស សម្រាប់ជំងឺកូវីដ-១៩ ដោយប្រើថ្នាំគ្រាប់លេប ។
ថ្នាំគ្រាប់នេះ គឺជាផ្នែកមួយនៃពពួកថ្នាំដែលគេឲ្យឈ្មោះថា protease inhibitors និងមានប្រសិទ្ធភាព ដោយវារារាំងអង់ហ្ស៊ីម (enzyme) ដែលវីរុសត្រូវការដើម្បីចម្លងនៅក្នុងកោសិកាមនុស្ស ។ ឱសថព្យាបាលប្រឆាំងវីរុសបែបនេះ ត្រូវបានគេប្រើដើម្បីព្យាបាលភ្នាក់ងារបង្ករោគផ្សេងៗទៀតផងដែរ ដូចជា មេរោគអេដស៍ និងមេរោគរលាកថ្លើមប្រភេទ C ។
អត្ថបទទាក់ទង
ប្រសិនបើការសាកល្បងព្យាបាលដោយថ្នាំគ្រាប់នេះមានដំណើរការល្អ ហើយរដ្ឋបាលចំណីអាហារនិងឱសថរបស់សហរដ្ឋអាមេរិក (FDA) អនុម័តឲ្យប្រើ នោះថ្នាំគ្រាប់ព្យាបាលជំងឺកូវីដ-១៩របស់ក្រុមហ៊ុន Pfizer នេះ អាចត្រូវបានចែកចាយពាសពេញសហរដ្ឋអាមេរិក នៅចុងឆ្នាំ២០២១នេះ ។
អ្នកជំនាញផ្នែកសុខភាព និយាយថា ថ្នាំលេបនេះអាចនឹងនាំមកនូវការផ្លាស់ប្ដូរនៅក្នុងសង្គ្រាមប្រយុទ្ធប្រឆាំងនឹងជំងឺកូវីដ-១៩ ព្រោះអ្នកដែលទើបឆ្លងវីរុសនេះថ្មីថ្មោង នៅដំណាក់កាលដំបូងៗបំផុត អាចប្រើថ្នាំលេបនេះដើម្បីព្យាបាលនៅខាងក្រៅមន្ទីរពេទ្យ ។
ក្រុមអ្នកស្រាវជ្រាវសង្ឃឹមថា ការប្រើថ្នាំលេបអាចនឹងជួយទប់កុំឲ្យកូវីដ-១៩នេះវិវឌ្ឍទៅមុខបាន ហើយអ្នកជំងឺមិនចាំបាច់ទៅព្យាបាលនៅមន្ទីរពេទ្យនោះឡើយ ៕
