ហ្វីលីពីននឹងបង្វិលប្រាក់បង់ពន្ធលើតម្លៃបន្ថែមឱ្យភ្ញៀវទេសចរបរទេសវិញ ដើម្បីបង្កើនភាពទាក់ទាញ

កន្លងមក ប្រទេសហ្វីលីពីន បានតម្រូវឱ្យភ្ញៀវទេសចរបរទេសត្រូវបង់ពន្ធលើតម្លៃបន្ថែមចំនួន១២% លើការទិញទំនិញផ្សេងៗនៅក្នុងប្រទេស។ ប៉ុន្តែកាលពីពេលថ្មីៗលោក ហ្វឺឌីណាន់ ម៉ាកូស ជូនៀ (Ferdinand Marcos Jr.) ប្រធានាធិបតីហ្វីលីពីន បានចុះហត្ថលេខាលើគោលនយោបាយមួយ ស្ដីពីការបង្វិលសាច់ប្រាក់នៃការបង់ពន្ធលើតម្លៃបន្ថែមនេះទៅឱ្យភ្ញៀវទេសចរបរទេសវិញ ហើយវិធានការនេះត្រូវបានរំពឹងថា នឹងដាក់ឱ្យអនុវត្តនៅសប្ដាហ៍នេះ។

តាមរយៈវិធានការនេះ នៅពេលភ្ញៀវទេសចរចំណាយប្រាក់យ៉ាងតិច៥១ដុល្លារអាម៉េរិក លើការទិញទំនិញនៅតាមហាង ដែលទទួលស្គាល់ដោយរដ្ឋាភិបាល នោះពួកគេនឹងទទួលបានប្រាក់បង់ពន្ធលើតម្លៃបន្ថែមត្រឡប់មកវិញតាមរយៈអេឡិចត្រូនិក ឬក៏ជាសាច់ប្រាក់ផ្ទាល់នៅក្នុងរង្វង់៦០ថ្ងៃ។

លោក ម៉ាកូស ជឿជាក់ថា តាមរយៈវិធានការថ្មីនេះវានឹងជួយទាក់ទាញភ្ញៀវទេសចរឱ្យមកកម្សាន្តនៅប្រទេសហ្វីលីពីន ឱ្យបានកាន់តែច្រើនបន្ថែមទៀត ហើយវាក៏នឹងផ្តល់អត្ថប្រយោជន៍ដល់ឧស្សាហកម្មខ្នាតតូច និងធំនៅក្នុងប្រទេសនេះផងដែរ។ លើសពីនេះ តាមរយៈវិធានការនេះ លោករំពឹងថា វានឹងជួយបង្កើនការចំណាយរបស់ភ្ញៀវទេសចរ៣០% បន្ថែមទៀត។

គោលការណ៍ថ្មីនេះត្រូវបានគេរំពឹងថា នឹងចូលជាធរមានក្នុងរង្វង់៩០ថ្ងៃ បន្ទាប់ពីការចុះហត្ថលេខាដាក់ឱ្យចូលជាច្បាប់ធរមានរួចហើយ៕

អត្ថបទ៖ សុខ មង្គល