ហ្វេសប៊ុកផ្លូវការរបស់សម្តេច ហ៊ុន សែន បានសរសេរដូច្នេះថា ”សម្តេចតេជោ ហ៊ុន សែន ក៏បានរំឭកផងដែរ ដល់មន្រ្តី គឺហាមដាច់ខាតកុំយកតួនាទីទៅវាតទីយកទ្រព្យសម្បត្តិរដ្ឋ ធ្វើជារបស់ខ្លួន ដូចជា ការលុបដីសមុទ្រនៅខេត្តកោះកុង យកធ្វើជាទ្រព្យសម្បត្តិផ្ទាល់ខ្លួនជាដើម។”
សម្តេច ហ៊ុន សែន បានអះអាងថា សម្ដេចបានក្រើនរំឭកបែបនេះនៅក្នុងពិធីបិទសន្និបាតគណៈចលនាមហាជន នៃគណៈកម្មាធិការកណ្តាល គណបក្សប្រជាជនកម្ពុជា នៅកោះពេជ្រ កាលពីថ្ងៃទី២២ ខែធ្នូ ឆ្នាំ២០១៩។
អត្ថបទទាក់ទង
សម្តេចក៏បានរំឭកដល់មន្រ្តីគណបក្ស ជាពិសេស មន្រ្តីរដ្ឋាភិបាល បន្តយកចិត្តទុកដាក់បម្រើប្រជាពលរដ្ឋឲ្យទទួលបាននូវសេវាសាធារណៈ ក្នុងនោះគឺមានទាំងសេវាតម្រូវការ និងសេវាចាំបាច់នានា ព្រមទាំងទទួលយកនូវសំណូមពរនានាពី ប្រជាពលរដ្ឋដើម្បីបង្កើននូវជំនឿ និងភាពកក់ក្តៅកាន់តែខ្លាំងដល់ប្រជាពលរដ្ឋ។
កាលពីថ្ងៃសៅរ៍ ទី២១ ខែធ្នូ ឆ្នាំ២០១៩ សម្តេចនាយករដ្ឋមន្រ្តី បានបញ្ជាឱ្យលោក ជា សុផារ៉ា និងអភិបាលខេត្តកោះកុង បើកការស៊ើបអង្កេតជាបន្ទាន់នូវការចាក់ដីចូលសមុទ្រ ដោយមានការពាក់ព័ន្ធនឹងមន្ត្រីយោធាជាន់ខ្ពស់នៅកោះកុង៕
