អាជ្ញាធរខេត្តព្រះសីហនុកំពុងជំរុញលើកទឹកចិត្តឲ្យពលរដ្ឋចូលរួមបង់ថ្លៃសំណល់ទឹកសម្អុយ

ឯកឧត្តម គួច ចំរើន អភិបាលខេត្តព្រះសីហនុ បានអះអាងថា ការចូលរួមរបស់ពលរដ្ឋនៅក្នុងខេត្តព្រះសីហនុ ក្នុងការរៀបចំលូបង្ហូរទឹកសម្អុយតាមលំនៅដ្ឋានរបស់ខ្លួន ចូលមកក្នុងលូបង្ហូរទឹកសម្អុយរបស់រដ្ឋ ដើម្បីបន្ដហូរចូលទៅក្នុងអាងប្រព្រឹត្តិកម្មទឹកសម្អុយ មុនបង្ហូរទឹកនោះចូលទៅក្នុងសមុទ្រ គឺជាទំនួលខុសត្រូវមួយ ដើម្បីចូលរួមធ្វើឲ្យបរិស្ថានស្អាត និងគុណភាពទឹក និងឆ្នេរសមុទ្រនៅក្នុងខេត្តព្រះសីហនុមានភាពល្អប្រសើរ។ ទន្ទឹមនឹងនេះ អាជ្ញាធរខេត្តព្រះសីហនុ ក៏បានអំពាវនាវឲ្យពលរដ្ឋនៅក្នុងខេត្ត ចូលរួមក្នុងការបង់ថ្លៃទឹកសម្អុយរបស់ខ្លួនផងដែរ ខណៈដែលកន្លងមក រដ្ឋាភិបាលបានចេញថ្លៃចំណាយលើការធ្វើប្រព្រឹត្តិកម្មទឹកសម្អុយទាំងនេះ ប្រមាណ ៧៤ម៉ឺនដុល្លារក្នុងមួយឆ្នាំ។
បច្ចុប្បន្ន ខេត្តព្រះសីហនុ មានអាងប្រព្រឹត្តិកម្មទឹកស្អាតកំពុងដំណើរការចំនួន ២កន្លែង ដែលមានសមត្ថភាពចម្រុះទឹកសម្អុយបានប្រមាណជាង ១ម៉ឺន២ពាន់ម៉ែត្រគីប នៅក្នុងមួយថ្ងៃ ខណៈបច្ចុប្បន្ន ខេត្តព្រះសីហនុ កំពុងសាងសង់អាងប្រព្រឹត្តិកម្មទឹកស្អាតថ្មីមួយទៀត ដែលមានសមត្ថភាពធំជាងមុន ពោលគឺអាចចម្រុះទឹកសម្អុយបានដល់ទៅ ២ម៉ឺនម៉ែត្រ ហើយគម្រោងនេះ នឹងអាចដំណើរការនៅចុងឆ្នាំ២០២៣។ សរុបតម្លៃវិនិយោគសាងសង់ លើអាងប្រព្រឹត្តិកម្មទាំង៣ទីតាំងនេះ គឺមានតម្លៃប្រមាណជាង ៣០លានដុល្លារអាមេរិក ដោយមិនរាប់បញ្ចូលថ្លៃដីនោះទេ។
លោកលី រឹទ្ធ នាយកប្រតិបត្តិនៃក្រុមហ៊ុន X-Water Technology ដែលជាក្រុមហ៊ុនទទួលការងារសាងសង់អាងប្រព្រឹត្តិកម្មទឹកសម្អុយនេះបានឱ្យដឹងថា អាងប្រព្រឹត្តិកម្មទឹកសម្អុយនេះ គឺបានប្រើប្រាស់នូវបច្ចេកវិទ្យាទំនើបចុងក្រោយមកពីប្រទេសអ៊ីស្រាអែល ដែលមានការចំណាយទាបលើការងារប្រតិបត្តិការប្រព្រឹត្តិកម្មទឹក បើធៀបនឹងបច្ចេកវិទ្យាចាស់ពីមុន។
អ្នកជំនាញរូបនេះ អះអាងថា អាងប្រព្រឹត្តិកម្មទឹកសម្អុយនេះ គឺមានសារសំខាន់ណាស់ ពីព្រោះថាទឹកកខ្វក់ទាំងនោះ មិនត្រូវបង្ហូរចូលទៅសមុទ្រភ្លាមៗទេ ពោលគឺត្រូវឆ្លងកាត់ការចម្រុះឱ្យបានស្អាតសិនទើបវាមិនប៉ះពាល់ដល់បរិស្ថាន ហើយថ្លៃចំណាយលើការចម្រុះទឹកសម្អុយនេះ ក៏មានការចំណាយគុណនឹង២ បើធៀបនឹងថ្លៃផលិតទឹកស្អាត។ យ៉ាងណាមិញ នៅប្រទេសរីកចម្រើនភាគច្រើន ពលរដ្ឋត្រូវចំណាយលើថ្លៃទឹកសម្អុយ ស្មើ ឬអាចលើសនឹងតម្លៃទឹកស្អាតក៏មាន៕