គម្រោងនាំចេញសម្បុកទឹកមាត់ត្រចៀកកាំ ទៅកាន់ទីផ្សារចិន មិនទាន់មានពន្លឺនៅឡើយទេ

លោក ស៊ុយ កុកធាន ប្រធានសមាគមត្រចៀកកាំខ្មែរ បានឱ្យសារព័ត៌មាន ខេមបូណូមីស ដឹងថា មកទល់ពេលនេះ គម្រោងនាំចេញសម្បុកទឹកមាត់ត្រចៀកកាំ ទៅកាន់ទីផ្សារចិន នៅពុំទាន់មានភាពច្បាស់លាស់នៅឡើយទេ។ ប៉ុន្តែលោកបានគូសបញ្ជាក់ថា ការកែសម្រួលលើចំណុចខ្វះខាតមួយចំនួន នៃកិច្ចព្រមព្រៀងនាំចេញរវាងក្រសួងកសិកម្ម រុក្ខាប្រមាញ់ និងនេសាទជាមួយគយចិន ត្រូវបានបំពេញរួចរាល់ហើយ រង់ចាំតែការឆ្លើយតបមកវិញតែប៉ុណ្ណោះ។ បើតាមអ្នកជំនាញរូបនេះ បច្ចុប្បន្នការនាំចេញសម្បុកទឹកមាត់ត្រចៀកកាំ ទៅកាន់ទីផ្សារចិន កំពុងស្ថិតក្នុងការរង់ចាំចុះកិច្ចព្រមព្រៀងរវាងក្រសួងកសិកម្ម រុក្ខាប្រមាញ់ និងនេសាទជាមួយគយចិន ប៉ុណ្ណោះ។

​បើតាមលោក ស៊ុយ កុកធាន មកទល់ពេលនេះ សម្បុកទឹកមាត់ត្រចៀកកាំ ពុំទាន់កែច្នៃមានតម្លៃចន្លោះពី២៥០ដុល្លារ ដល់៤៥០ដុល្លារ ក្នុង១គីឡូក្រាម ហើយសម្បុកដែលកែច្នៃរួចមានតម្លៃចន្លោះពី៩០០ដុល្លារទៅ១,៥០០ដុល្លារក្នុង១គីឡូក្រាម អាស្រ័យលើគុណភាព។

​សូមបញ្ជាក់ថា កាលពីពេលថ្មីៗនេះ ស្ថានទូតចិន ប្រចាំនៅកម្ពុជា បានផ្ញើលិខិតមួយជូន​ក្រសួងកសិកម្ម រុក្ខាប្រមាញ់ និងនេសាទ ដោយឱ្យកែសម្រួលលើចំណុចមួយចំនួន នៃកិច្ចព្រមព្រៀងជាមួយគយចិន មុនឈានដល់ការនាំសម្បុកត្រចៀកកាំ ទៅកាន់ទីផ្សារចិន ដែលអាចនឹងធ្វើឡើងក្នុងពេលឆាប់ៗ​នៅក្នុងឆ្នាំ២០២៥ នេះ។ កម្ពុជា មានសក្ដានុពលខ្ពស់ក្នុងការចិញ្ចឹមសត្វត្រចៀកកាំ ខណៈមកទល់ពេលនេះការចិញ្ចឹមត្រចៀកកាំនៅកម្ពុជា អាចមានក្នុងរង្វង់៧ពាន់ខ្នងអគារ ដែលអាចផ្តល់ផលទឹកមាត់ត្រចៀក​កាំប្រមាណ១០០តោនក្នុង១ឆ្នាំ៕

អត្ថបទ៖ បូ ដូឡា​