លោកឧកញ៉ា ចេង ខេង អគ្គនាយកក្រុមហ៊ុនអលនទ្រព្យ CPL បានឲ្យដឹងថា តម្លៃអលនទ្រព្យនៅដើមឆ្នាំនេះ ក្នុងរាជធានីភ្នំពេញ មានសភាពទ្រឹង (មិនឡើង មិនចុះ) ស្របនឹងពេលដែលការប្រកាសដាក់លក់អចលនទ្រព្យក្នុងតម្លៃថ្លៃចាប់ពី ១០ម៉ឺនដុល្លារឡើងទៅ បានថយចុះតម្រូវការទីផ្សារ តែក៏ត្រូវបានដាក់ជំនួសមកវិញនូវការកើនឡើងវិញនូវតម្លៃអចលនទ្រព្យក្រោម ១០០ដុល្លារក្នុងមួយម៉ែត្រការ៉េ ឬតម្លៃសំណង់លំនៅដ្ឋាន ក្រោម ៥ម៉ឺនដុល្លារក្នុង១ល្វែង កំពុងពេញនិយមនិងមានតម្រូវការកើនឡើងខ្លាំង។
តើលោកឧកញ៉ា ចេង ខេង ជាអ្នកណា?
លោកឧកញ៉ាបញ្ជាក់ថា ៖ «និន្នាការប្រែប្រួលនៃតម្រូវការទីផ្សារនេះមិនបានធ្វើឲ្យទីផ្សារអចលនទ្រព្យ មានការធ្លាក់ចុះនោះឡើយ ដោយសារថា ទីផ្សារនេះកំពុងដាក់ជំនួសមកវិញនូវសកម្មភាពដោះដូរអចលនទ្រព្យនៅឯជាយរាជធានីដែលមានតម្លៃក្រោម ១០០ដុល្លារក្នុងមួយម៉ែត្រការ៉េ និងលំនៅដ្ឋានតម្លៃក្រោម៥ម៉ឺនដុល្លារក្នុងមួយល្វែងកំពុងមានចំណែកទីផ្សារកើនឡើង»។
ជាមួយគ្នានេះដែរ អ្នកជំនាញអចលនទ្រព្យមួយរូបទៀត លោកឧកញ៉ា នួន រិទ្ធី អគ្គនាយកក្រុមហ៊ុនអលនទ្រព្យ KFA បានធ្វើការវាយតម្លៃស្ថានភាពទីផ្សារអចលនទ្រព្យថា ការតភ្ជាប់តំបន់បឹងបួ ទន្លេ រួមទាំងការអភិវឌ្ឍស្ពាន ផ្លូវ និងផ្លូវក្រវាត់ក្រុង បានផ្ដល់ជាដង្ហើមរស់ដ៏សំខាន់សម្រាប់ការលូតលាស់នៃវិស័យអចលនទ្រព្យ ជាពិសេស នៅតាមតំបន់ជាយៗរាជធានី។
លោកឧកញ៉ា នួន រិទ្ធី បញ្ជាក់ថា ៖ «ការទិញដូរក្នុងតំណាក់កាលចុងក្រោយឆ្នាំ២០១៧នេះ មានសន្ទុះកើនជាលំដាប់នៅតំបន់ជាយរាជធានី ដូចជា តំបន់ខណ្ឌសែនសុខ ដែលមានគម្រោងផ្សារទំនើប AEON ទី២ រួមជាមួយនឹងផ្សារទំនើបផ្សេងៗទៀត ជាធ្នាក់ដ៏សំខាន់ដែលជាហេតុធ្វើឲ្យដីធ្លីនៅតំបន់នេះបានឡើងយ៉ាងគំហុក។ ខ្ញុំក៏ចង់ជម្រាបផងថា នៅជុំវិញទីក្រុងភ្នំពេញមានគម្រោងអភិវឌ្ឍន៍លំនៅដ្ឋានសាធារណៈដែលជាតម្រូវការចាំបាច់របស់ពលរដ្ឋដែលមានចំណូលទាប។ ទាំងអស់នេះបានធ្វើឲ្យដីធ្លីនៅតំបន់ជាយក្រុងមានសកម្មភាពដោះដូរខ្លាំងជាងឆ្នាំមុន»។
អ្នកជំនាញបានគូសបញ្ជាក់ឲ្យដឹងទៀតថា តម្លៃអចលនទ្រព្យក្នុងរាជធានីភ្នំពេញមានការប្រែប្រួលកើនឡើងតិចតួច និងមានកំណើនយឺតនៅឆ្នាំនេះ ដោយសារមានអចលនទ្រព្យប្រកាសដាក់លក់មានចំនួនតិចនៅក្នុងទីផ្សារ ខណៈនៅតាមតំបន់ជាយក្រុងមានការកើនឡើងលឿន ១០ ទៅ ១៥ភាគរយ។
ដីធ្លីនៅកណ្ដាលខណ្ឌទំាងបួនក្នុងរាជធានីភ្នំពេញ បច្ចុប្បន្ន តម្លៃស្ថិតនៅចន្លោះ ៤ពាន់ដុល្លារ ទៅ ៦ពាន់ដុល្លារក្នុងមួយម៉ែត្រការ៉េ ខណៈតំបន់ជាយក្រុងភាគខាងជើងមានតម្លៃចន្លោះពី ៥០០ដុល្លារទៅ១ពាន់ ២០០ដុល្លារ ក្នុងមួយម៉ែត្រការ៉េ ខណៈភាគខាងត្បូង ខាងកើត និងខាងលិចក្រុងមានតម្លៃចន្លោះ ២០០ ទៅ ១ពាន់២០០ដុល្លារក្នុងមួយម៉ែត្រការ៉េ៕
