បាតុកម្មរបស់កម្មកររោងចក្រមួយចំនួននៅបង់ក្លាដែសនៅតែបន្ដ ទោះមានការដំឡើងប្រាក់ឈ្នួល ជាង៥៦%

យ៉ាងហោចណាស់ មានកម្មកររោងចក្រកាត់ដេររាប់រយនាក់នៅតែបន្ដចេញធ្វើបាតុកម្មតវ៉ានឹងការដំឡើងប្រាក់ឈ្នួល កាលពីថ្ងៃទី ១២ ខែវិច្ឆិកា ដោយពួកគេអះអាងថា ការដំឡើងប្រាក់ឈ្នួលដល់ប្រមាណ ១១៤ដុល្លារ​ ដែលរដ្ឋាភិបាលផ្ដល់ជូននេះ គឺនៅតែមានតិចតួច បើធៀបនឹងតួលេខដែលពួកគេទាមទារ ២០៨ ដុល្លារ​ក្នុងមួយខែ។

ប្រទេសបង់ក្លាដែស បានរំជើបរំជួលដោយភាពចលាចលការងារដ៏អាក្រក់បំផុតក្នុងរយៈពេលមួយទសវត្សរ៍មកនេះ ដោយកម្មកររាប់ម៉ឺននាក់បានប៉ះទង្គិចជាមួយប៉ូលិសក្នុងការតវ៉ាទាមទារឱ្យដំឡើងប្រាក់ឈ្នួលអប្បបរមាខ្ពស់ជាងមុនដល់ទៅជិត៣ដង គឺឡើងដល់ចំនួន ២០៨ដុល្លារក្នុងមួយខែ ខណៈដែលរោងចក្រជាច្រើនបានរងការបំផ្លិចបំផ្លាញ។ ការចេញមកតវ៉ានេះ ក៏បានបង្កឲ្យមានការប៉ះទង្គិចគ្នាជាមួយរវាងក្រុមកម្មករនិងអាជ្ញាធរ ដោយបានបង្កឲ្យមានអ្នកស្លាប់កើនដល់៤នាក់ផងដែរ។

រោងចក្រកាត់ដេរចំនួនជាង៣ពាន់កន្លែងនៅប្រទេសបង់ក្លាដែស មានចំណែកប្រហែល៨៥%នៃការនាំចេញប្រចាំឆ្នាំចំនួន ៥៥ពាន់លានដុល្លារ​របស់ប្រទេសនេះ ដោយបានផ្គត់ផ្គង់ម៉ាកយីហោល្បីៗមួយចំនួននៅក្នុងពិភពលោករួមមានម៉ាក Levi's ម៉ាក Zara និងម៉ាក H&Mជាដើម។

ប៉ុន្តែលក្ខខណ្ឌមួយចំនួនមានភាពលំបាកសម្រាប់កម្មករ ៤លាននាក់នៅក្នុងវិស័យនេះ ដែលភាគច្រើនជាស្ត្រី ដោយទទួលបានប្រាក់បៀវត្សរ៍ប្រចាំខែត្រឹមតែ ៧៥ដុល្លារប៉ុណ្ណោះ គិតនៅមុនពេលមានការប្រកាសពីការដំឡើងប្រាក់ឈ្នួលថ្មីចុងក្រោយនេះ។

គណៈកម្មាការដែលចាត់តាំងដោយរដ្ឋាភិបាល កាលពីថ្ងៃទី៧ខែវិច្ឆិកា បានដំឡើងប្រាក់ឈ្នួលបន្ថែមជាង ៥៦%សម្រាប់កម្មករកាត់ដេរ ពោលគឺ កើនពី ៧៥ដុល្លារ មកដល់ប្រមាណ ១១៤ដុល្លារក្នុងមួយខែ ប៉ុន្តែកម្មករកាត់ដេរមួយចំនួននៅតែច្រានចោលការដំឡើងប្រាក់ឈ្នួលនេះ។ ចាប់តាំងពីការដំឡើងប្រាក់ឈ្នួលនេះមក កម្មករបានបង្កើនការតវ៉ារបស់ពួកគេ និងមានរោងចក្រយ៉ាងតិច៧០កន្លែងត្រូវបានកម្មករចូលអុកឡុកកកូកកាយ។

នាយករដ្ឋមន្ត្រីបង់ក្លាដែស លោកស្រី ឆេក ហាស៊ី បានច្រានចោលការទាមទារដំឡើងប្រាក់ឈ្នួលបន្ថែមទៀត ហើយបានព្រមានថា ការតវ៉ាដោយហិង្សាអាចធ្វើឱ្យបាត់បង់ការងារ ប៉ុន្តែសហជីពនៅតែបន្តធ្វើកូដកម្មដដែល។

ប៉ូលិសបានប្រាប់ AFP ថា រោងចក្រចំនួន១៥០កន្លែងបានបិទនៅក្នុងទីក្រុងឧស្សាហកម្មធំៗស្ថិតនៅភាគខាងជើងនៃទីក្រុងដាកា ខណៈដែលក្រុមហ៊ុនផលិតកម្មបារម្ភថា នឹងមានកូដកម្មបន្ថែមទៀត។

អ្នកនាំពាក្យប៉ូលិសក្រុងដាកាលោក អ៊ីប្រាហ៊ីម កាន់ (Ibrahim Khan) បានប្រាប់ AFP ថា មនុស្សយ៉ាងតិច ១២២នាក់រួមទាំងអ្នករៀបចំការតវ៉ាជាច្រើនទៀតត្រូវបានចាប់ខ្លួន ចាប់តាំងពីការតវ៉ា បានចាប់ផ្តើមផ្ទុះឡើងមកទល់ពេលនេះ៕

អត្ថបទ៖ សុខ ជា