ឯកឧត្តម ងិន ឆាយ ប្រតិភូររាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានកសិកម្ម បានគូសបញ្ជាក់ថា មកទល់ពេលនេះក្រសួងកសិកម្ម រុក្ខាប្រមាញ់ និងនេសាទនៅតែបន្តចរចាជាមួយភាគីចិន ក្នុងការនាំចេញសម្បុកត្រចៀកកាំទៅកាន់ទីផ្សារដ៏ធំនៅតំបន់អាស៊ីមួយនេះ។ បើតាមមន្រ្តីជាន់ខ្ពស់រូបនេះ បច្ចុប្បន្នការចរចាបើកទីផ្សារនាំចេញសម្បុកត្រចៀកកាំកម្ពុជា ទៅកាន់ទីផ្សារចិន កំពុងស្ថិតក្នុងនីតិវិធីបច្ចេកទេស ហើយបន្ទាប់ពីរៀបចំនីតិវិធីបច្ចេកទេសរួចរាល់ ភាគីចិននឹងចុះមកពិនិត្យដល់ទីតាំងផ្ទាល់នៅក្នុងប្រទេសកម្ពុជា។ ជាមួយគ្នានេះ ប្រសិនបើការពិនិត្យរកឃើញថា កម្ពុជាបានអនុវត្តតាមស្តង់ដាអស់ហើយ នោះសម្បុកទឹកមាត់ត្រចៀកកាំខ្មែរនឹងអាចនាំចេញទៅកាន់ទីផ្សារចិនបាន។
ពាក់ព័ន្ធនឹងគម្រោងនាំចេញទឹកមាត់ត្រចៀកកាំទៅកាន់ទីផ្សារចិននេះដែរ លោក ស៊ុយ កុកធាន ប្រធានសមាគមត្រចៀកកាំខ្មែរ បានឱ្យដឹងថា សមាគមត្រចៀកកាំខ្មែរបានត្រៀមខ្លួនរួចរាល់ និងបានចុះអនុស្សារណៈនៃការយោគយល់ជាមួយអាជ្ញាធរគយខេត្តគ័ងស៊ី នៃទីក្រុងណាននីង ព្រមទាំងបានពិភាក្សាជាមួយវិទ្យាស្ថានមួយមកពីខេត្តហៃណាន ប្រទេសចិន កាលពីពេលថ្មីៗក្នុងការសម្របសម្រួលនាំចេញសម្បុកទឹកមាត់ត្រចៀកកាំទៅកាន់ទីនោះផងដែរ។
គួរបញ្ជាក់ថា បច្ចុប្បន្នសម្បុកទឹកមាត់ត្រចៀកកាំ ដែលពុំទាន់សម្អាត ឬពុំទាន់កែច្នៃមានតម្លៃចន្លោះពី៥០០ទៅ៦០០ដុល្លារក្នុង១គីឡូ និងសម្បុកដែលសម្អាតរួចរាល់មានតម្លៃចន្លោះពី១ពាន់ទៅ១ពាន់៥រយដុល្លារក្នុង១គីឡូ ពោលគឺអាស្រ័យលើគុណភាពនៃប្រភេទសម្បុកត្រចៀកកាំ។ កម្ពុជាមានសក្ដានុពលខ្ពស់ក្នុងការចិញ្ចឹមសត្វត្រចៀកកាំ ខណៈមកទល់ពេលនេះការចិញ្ចឹមត្រចៀកកាំនៅកម្ពុជា អាចមានក្នុងរង្វង់៧ពាន់ខ្នងអគារ ដែលអាចផ្តល់ផលទឹកមាត់ត្រចៀកកាំបានប្រមាណ១០០តោនក្នុង១ឆ្នាំ៕
អត្ថបទ៖ បូ ដូឡា
