ក្រោយបង្រួមក្រសួង រដ្ឋាភិបាលវៀតណាមដាក់គោលដៅកាត់បន្ថយចំនួនមន្ត្រីរាជការឱ្យបាន៧០ម៉ឺននាក់បន្ថែមទៀត

បើយោងតាមការចុះផ្សាយរបស់សារព័ត៌មាន នីកេអេស៊ា ក្រោមកម្មវិធីកំណែទម្រង់កាត់បន្ថយចំនួនមន្ត្រីរាជការរបស់រដ្ឋាភិបាលវៀតណាម ដែលបានដាក់ចេញកាលពីពេលថ្មីៗកំពុងធ្វើឱ្យមន្ត្រីនៅតាមក្រសួងស្ថាប័នមួយចំនួនដេកភ័យបុកពោះ ខ្លាចបាត់បង់ការងារធ្វើ។ ការភ័យខ្លាចនេះធ្វើឡើងក្រោយស្ថាប័នរបស់ពួកគេជូនដំណឹងថា នឹងមានការធ្វើកំណែទម្រង់ជម្រុះមន្ត្រីនៅតាមមុខងារ តួនាទីមួយចំនួន។

ស្ថិតក្នុងស្ថានភាពបែបនេះ បុគ្គលិកធ្វើការនៅសហគ្រាសរដ្ឋនៅទីក្រុងហូជីមិញម្នាក់បានលើកឡើងថា អារម្មណ៍ព្រួយបារម្ភ និងការភ័យខ្លាចកំពុងលាយឡំគ្នា បន្ទាប់ពីរូបគេទទួលបានដំណឹងថា មានមន្ត្រីរដ្ឋការមួយចំនួនត្រូវបានចាប់ខ្លួនកាលពីប៉ុន្មានសប្តាហ៍មុនក្រោយពេលពួកគេផ្សព្វផ្សាយ ឬបញ្ចេញយោបល់អំពីការរៀបចំរចនាសម្ព័ន្ធការិយាធិបតេយ្យដែលជិតមកដល់។

កាលពីខែមករា បុគ្គលិករដ្ឋប្រហែល១ពាន់នាក់ ដែលបម្រើការងារនៅក្រុមហ៊ុនទូរទស្សន៍ Vietnam មួយត្រូវបានបាត់បង់ការងារក្រោយប៉ុស្តិ៍ទូរទស្សន៍ចំនួន១៣ ត្រូវបានប្រកាសបិទភ្លាមៗជាមួយនឹងការជូនដំណឹងតិចតួច។ បុរសនោះបាននិយាយទាំងស្រងូតស្រងាត់ថា បុគ្គលិកជាច្រើនដែលធ្វើការនៅទីនោះបានបាត់បង់ការងារភ្លាមៗដោយពួកគេមិនមានពេលរៀបចំខ្លួនជាមុនឡើយ។

ផែនការធ្វើកំណែទម្រង់ដ៏ក្តៅគគុកនេះត្រូវបានប្រកាសដោយអគ្គលេខាធិការគណបក្សកុម្មុយនីស្តវៀតណាមលោក តូ ឡឹម ដើម្បីត្រួសត្រាយផ្លូវប្រែក្លាយវៀតណាមទៅជាប្រទេសដែលមានប្រាក់ចំណូលខ្ពស់នៅឆ្នាំ២០៤៥។ ក្រៅពីបង្រួមក្រសួងពី១៨ មកនៅត្រឹម១៤ក្រសួង នៅពេលនេះវៀតណាមកំពុងរៀបចំបង្រួមខេត្តទាំង៦៣របស់ខ្លួន ហើយក៏កំពុងរៀបចំបម្រួមរដ្ឋបាលស្រុកទាំង៦៩៦ស្រុកបន្តទៀតផងដែរ។ គិតមកដល់ពេលនេះ មានមន្រ្តីរដ្ឋការជាង២ម៉ឺននាក់ហើយ ដែលបានបាត់បង់ការងារ ហើយរហូតដល់ខែសីហា នឹងមានមន្រ្តីរដ្ឋការ៨ម៉ឺននាក់ទៀតនឹងត្រូវបណ្តេញចេញពីការងារ។

ពាក់ព័ន្ធនឹងបញ្ហានេះលោក ហ្សាចារី អាប៊ូហ្សា (Zachary Abuza )សាស្ត្រាចារ្យផ្នែកសន្តិសុខនៅមហាវិទ្យាល័យសង្គ្រាមជាតិក្នុងទីក្រុងវ៉ាស៊ីនតោន បានលើកឡើងថា ការអនុវត្តបែបនេះ ដោយសារមេដឹកនាំវៀតណាមព្រួយបារម្ភពីអន្ទាក់នៃប្រទេសចំណូលមធ្យម ទើបលោកស្វែងរកមធ្យោបាយកែលម្អប្រសិទ្ធភាពរដ្ឋាភិបាល។

ដោយឡែកលោក ឃ្វៀន ខាកយ៉ាង (Nguyen Khac Giang) អ្នកស្រាវជ្រាវនៅវិទ្យាស្ថាន ISEAS-Yusof Ishak នៅប្រទេសសិង្ហបុរីបាននិយាយថា មន្ត្រីរដ្ឋការដែលមានចំនួន៧,៩% នៃការងារសរុបនៅក្នុងប្រទេសវៀតណាមជាអត្រាខ្ពស់បំផុតនៅអាស៊ីអាគ្នេយ៍។ លោកយល់ឃើញថា ផែនការរុះរើស្ថាប័នទាំងនេះ ជាដំណើរការភាវូបនីយកម្មបក្ស និងជាជំហានឆ្ពោះទៅរកការផ្តល់សិទ្ធិសេរីភាពកាន់តែច្រើនដល់ការិយាធិបតេយ្យ ដើម្បីប្រតិបត្តិការកាន់តែមានប្រសិទ្ធភាព៕

ដោយៈ សរ សុជាតិ